Markwas 4
4
Nda makwakwaca hulefey
(Mat 13.1-9; Luk 8.4-8)
1Ava dəɓa ana, Yesu ka sasərak ndana hay da ma te təker mazlakava te Gelile saya. Ndana hay gaa ka kwas vaw kad cak tata. Mafay ana, Yesu ke tep pa kaslkaslah, ka njah pa. Kaslkaslah ana aŋga da yaŋ təker mazlakava, amaa ndana hay sə, ac fa vara da ma te təker ana. 2Dapa mesesərek tata ana, ke ŋguzdec jene hay gaa ava ma hay maɗəva, gege:
3«Macak zləmay! Ndana ɓa ke dey ka ta kwakwac hulef de ley. 4Dapa masa a kwakwac hulefey ana sə, hulef leŋgeɗ hay ec ke kwi a ma te cəvey. Ɗiyak hay ec ke dekey, ac ka ndana avəda. 5Hulef leŋgeɗ hay, ec ke kwi fa ɗəsa masa wuyak fətiya pahata. Manjah kusetke ava dəɓa ana, ec ke pəcek zef, afa wuyak fətiya pahata. 6Pas ka tay, ke ɓətec avəda, ac ka kulata, afa slaslalay ana dapa veɗ gaa aabay. 7Hulef leŋgeɗ hay, ec ke kwi kad pa mətak hay. Mətak ana hay ec e gəleceŋ, ec ke ŋgeŋgəɗecec avəda, ke heyek wudiya ana hay aabay. 8Amaa hulef hay dərziya ec ke kwi kad pa slam mambəla ana, ec ke pəceceŋ, ec ke gəleceŋ, ec ke heyə mabay. Wudez amta sə, ke heyek wudiya ana hay kwakwar mahkar, ŋgeɗ hay kwakwar makwa, dərziya hay temere.»
9Yesu ke gweɗec saya, gege: «Macak zləmay mambəla ana, daha nda masa aŋga ava zləmay ɓa sə, da cəna.»
Megweɗ ava ma hay maɗəva sə, mafay te mey?
(Mat 13.10-15; Luk 8.9-10)
10Masa Yesu ac babəla ava ndah masasəraka jene tata kuraw dapa yaŋ ana ecew va ndah dərziya deveŋ ndah macəkafa zləmay ac ka nəkafa ma da yaŋ ma maɗəva masa aŋga te gweɗey. 11Ke gweɗ, gege: «Jə maraɓa te Meŋgə bay ta Zlavay aŋga mava kad akwar, amaa kad ndah dərziya sə, jene hay fakwanay ac ara ma maɗəva. 12Ara nesey#4.12 Wuzaɗ Izay 6.9-10; Zaŋ 12.39-41; Raw 11.8.
Ndah ana ece njerey,
amaa aca wala ndey bay.
Aca cak zləmay,
amaa aca cəna bay.
Daha efes aca cəna sə,
ec ke vehekec kad vara Zlavay,
Zlav ke pəlecen mebər teceŋ.»
13Yesu gege: «Akwar ka cəna ma da yaŋ ma maɗəva sə, aabay geyey? Naa akwar da cəna ma da yaŋ ma maɗəva hay dərziya fakwanay sə, gwagumaw?
Mapan ma da yaŋ makwakwac hulefey
(Mat 13.18-23; Luk 8.11-15)
14Nda makwakwaca hulefey sə, aŋga nda mabəzada ma ta Zlavay. 15Ndah leŋgeɗey ac ara ma te cəv masa hulef te kezl kad pa. Aca cəna ma ta Zlavay, amaa Saadan, e dekey, a kəsa ma ana avəda dapa rav teceŋ. 16Ara aŋga ana, ŋgeɗ hay masa ece kwi kad pa slam ɗəsa sə, ndah ana ŋgesey, ndah masa aca cəna ma ta Zlavay, aca kəsiya zef eve mewesley, 17amaa aca ŋgat slaslalay aabay, ac ndah masa ta manjah kusetke war. Pas masa marga hay, daha aabay mayah ma hay ke ŋgetefeceŋ mafay ta ma ta Zlavay sə, ece təɗec zef. 18Hulef hay dərziya masa ece kwi kad pa mətak sə, ŋgesey ndah masa ac ka cəna ma ta Zlavay, 19amaa mawulak yaŋ ta vavara, mafəca nda te zleley hay va mekekesl ta vaw fe jene hay dərziya, ece sehwey, aca ŋgaŋgəɗac ma ana. Ma ana e heyə ɓasabay. 20Ndah dərziya saya, aca kəs ma ta Zlavay ara hulef hay masa ece pəcek dapa slam mambəla ana, aca cəna ma ana, aca kəsiya. Ara nesey, ma ana e heyə dapa rav teceŋ kwakwar mahkar, ŋgeɗey kwakwar makwa, ŋgeɗ saya, temere.»
Ma maɗəva da yaŋ petərla
(Luk 8.16-18)
21Yesu ke gweɗec saya, gege: «Daha ndana ka gəɗa kwakwaw fa petərla sə, a vərkwaɗ pa maŋgam daha aabay a dara kelvek ta manah geyey? E ŋgə ara na aabay! Amaa a paɗ sə, fa slam te ndey. 22Jene hay maraɓa fakwanay sə, ac ta ŋguzdakata kad a vəda, ara megweɗey, jene hay masa ac dapa ləvaŋ sə, ac ta ŋguzdakata pa slam mawaɗa, ndana hay ac ta səna avəda. 23Macak zləmay mambəla ana, daha nda masa aŋga ava zləmay ɓa sə, da cəna.»
24Yesu ke gweɗec saya, gege: «Mep leŋgesl fa ma hay masa akwar ta cəna nesey! Jene hay masa akwar ta viya kad ndana hay sə, Zlav a ta vakwar ara aŋga ana may, a ta viya kad akwar sə, mafəna ana saya. 25Yaw, nda masa aŋga ava jene kusetke ɓa sə, Zlav a ta vana kad yaŋ ana saya, amaa nda masa aŋga ava jene ɓa, e ŋgə mezlər ava aŋga ara masa Zlav ta waya aabay sə, mekusetke ana tata ŋgesey, Zlav a ta kəsan avəda.»
Ma maɗəva da yaŋ hulef masa ndana ta sləkiya
26Yesu ke gweɗec saya, gege: «Ara aŋga ana Wunam ta bay ta Zlavay sə, aŋga ara ndana te slək jene de ley tata. 27Jeŋ ana sə, ke pəcekey, hwavavaɗ, hwapapas, e gəley. Kwa nda ana a njawaŋ, aŋga eve ndey, jeŋ ana e gəley jaŋgata. Amaa nda ana ka sən jeŋ ana e gəl gwagumaw sə, aabay. 28Jeŋ ana e pəc fə yaŋ tata aŋga amta. Mavana gədaŋ te mepəc sə, wuyak. Macaaca ana, e pəcek ara kəzeŋ, e gəley, ava dəɓa ana, e telek yaŋ kad a vəda, mamaɗ yaŋ ana e heyek bəley ava wudiya ana hay masasala. 29Daha bəley ana ka nəhata cay, nda ana e kezl pa maciya ava matəhway tata, afa kiya te meŋgə jene hay kad a wunam ka husakata cay.»
Wut te venjeh
(Mat 13.31-32, 34; Luk 13.18-19)
30Yesu ke gweɗec saya, gege: «Andaw ta cacalakwa Wunam ta bay ta Zlavay sə, eve mey? Ya da ŋguzdakwaɗ ava ma maɗəva wula? 31Wunam ta bay ta Zlavay ana sə, aŋga ara wut te venjeh masa ndana ta sləkiya e ley tata. Wut te venjeh ana sə, aŋga kusetke deveŋ hulef hay fakwanay dapa vavara. 32Amaa daha masləka cay sə, e pəcey, e gəl mazlakava ana ka fəna lak hay fakwanay de ley ana. A cə ha hay zambəla zambəla ana, kwa ɗiyak hay aca zlafa manjah da dara meezeŋ ta ha ta gamslak ana.»
Mesesərek hay ava ma maɗəva
(Mat 13.34-35)
33Ara nesey, Yesu ke sesərekec ma ta Zlavay kad ndana hay ava ma hay maɗəva gaa ara masa magwaɗa. E sesərekec ndah macəkafa zləmay sə, ara masa ac ta zlafa macəna avəda. 34E gweɗeceŋ sə, maŋgara ava ma maɗəva, amaa masa ac babəla ava ndah masasəraka jene tata sə, e ŋguzdecen ma da yaŋ ana fakwanay.
Yesu a zlac bərgadaŋ da yaŋ təker mazlakava
(Mat 8.23-27; Luk 8.22-25)
35Ta fakwaɗ pəsaŋga ana ŋgesey, Yesu ke gweɗec ndah masasəraka jene tata, gege: «Mazlaŋgakwa kad a ma te təker mazlakava jaka luwa leŋgeɗey.»
36Dapa ŋgesey ana, ndah masasəraka jene sə, ac ka gərda ndah makwasa da ma te təker ana faŋga. Ac ka ŋgatafa Yesu dapa kaslkaslah masa aŋga dapa, ec ke zleŋgey ava Yesu ana fa slam ana. Kaslkaslah hay mekele ɓa mazlaca da cak ta kaslkaslah masa Yesu aŋga dapa. 37Bərgadaŋ mazlakava ana ke ŋgə ava gədaŋ, meŋgeŋgel ta yam ke ceweslə kad pa kaslkaslah ana, kaslkaslah sə, mbala weh ava yam. 38Yesu a njawaŋ dapa kaslkaslah ana jaka ava dəɓa ta ndah masasəraka jene tata, yaŋ mapa fa slam ta yaŋ. Ndah masasəraka jene tata ac ka pəraka, ac ka gwaɗa, gege: «Bay taciya, andaw ta zakwa sə, a ŋgakaa dapa yaŋ hese aabay geyey?»
39Yesu ke zleftek, ka ɓaɓəc bərgadaŋ ava gədaŋ, ka gwaɗa yam mafayakfayak ana, gege: «Kəɗa yaŋ! Ka ɓəla vaw sabay.» Faŋga faŋga ana, bərgadaŋ sə, ka kəɗa ma, jene maɓəla vaw ɓasabay. 40Yesu gege: «Akwa ŋgə zidaw gaa ara nesey sə, mafay te mey? Akwar ava makəsparav aabay hel geyey?»
41Amaa, ndah masasəraka jene tata sə, zidaw ke kəɗec mabay, ec ke gweɗ fa vaw teceŋ, gege: «Nesey ana sə, ndana wa masa kwa bərgadaŋ va yam mafayakfayak ana aca nahan yaŋ kad aŋga?»
Currently Selected:
Markwas 4: CUVnt
Highlight
Share
Copy
Want to have your highlights saved across all your devices? Sign up or sign in
© 2022 CABTAL
