Markwas 5

Yesu a mbas damkwaw hay dapa ndana

(Mat 8.28-34; Luk 8.26-39)

1Ava dəɓa ana, Yesu va ndah masasəraka jene tata aca husa a ma te təker mazlakava te Gelile jaka luwa ta vavara ta ndah te Geraza hay. 2Masa Yesu e bəreŋgek dapa kaslkaslah sə, faŋga faŋga ana, ac ka cə yaŋ ava ndana ɓa aŋga ava damkwaw dapa yaŋ. Nda ana e dek dapa jav hay. 3Manjah tata sə, dapa jav hay. Ndana mazlafa majawiya kwa ava jajarɓay aabay. 4Ndana hay ac ka daraw pe sesele#5.4 Sesele: A wal megweɗ hap ta makəta nda. Hap ana sə, mahwahurkwa, aca zlafa matalaɗ sek ta ndana pa aca dara ava ɓəray, ndana a zlafa meseɗek sek tata kad a vəda aabay. Wuzaɗ ɗelewer te (Mezlər ta Maslaŋ hay 16.24.) Asaya, ac ka jawaw ava jajarɓay pa ha hay, amaa, ke rewec avəda fakwanay. Ndana mafəna ava gədaŋ ta makətiya aabay. 5Cəɗem cəɗem, hwavavaɗ hwapapas, a ŋgway dapa jav hay va dapa wudam hay, a cə lalaw ava gədaŋ, a pəɗak vaw tata ava kekeŋ hay.

6Masa a wala Yesu dəreŋ sə, ka hway kad vara vaw, ke kekəred fəma tata. 7Ka cə lalaw ava gədaŋ, gege: «Yesu wut ta Zlav da Wudam, ka wal fe yey mey? Ya ŋgakaa mbahw eve mezel ta Zlavay, ke te ŋgediyey hahar bay.» 8E gweɗ ara nesey sə, afa Yesu ka gwaɗa, gege: «Kaa, damkwaw, daɓa dapa nda nesey!»

9Yesu ka nəkafa, gege: «Mezel takaa mey?»

Nda sə, ka vahan, gege: «Mezeley aɗaw sə, “Miya”, afa andaw gaa.»

10Nda sə, ka bərakw Yesu, afa de mbəsec damkwaw hay dapa vavara ana bay.

11Dapa slam ana faŋga sə, bakw te vetem hay gaa ac dapa manday da rav ta wudam. 12Damkwaw hay dapa nda sə, ac ka bərakw Yesu, ac ka nəkafa, gege: «Mbahw vandaw cəvey, andə ta sahwaɓa pe vetem hay antisey.»

13Yesu ke vec cəvey. Ara nesey ana, damkwaw hay sə, ac ke hweyec kad a vəda, ec ke sehw pe vetem hay. Vetem ana hay faŋga sə, ece ŋgə mbala bakatar ecew. Ece tetelem da ma ta mazaŋgalaŋ, ec ke kwiyec kad pe təker mazlakava, ec ke bezlec fakwanay.

14Gwalay vetem ana hay aca wala jeŋ ana e ŋgə ara nesey sə, ac mahway ke te ŋguzdecen labara ana kad ndana hay dapa pe berne va wunam hay masa zef eve eceŋ da ma ta səɓak ana faŋga. Mafay ana, ndana hay ec ke dekey ka ta wuzaɗ jene hay masa ke ŋgey dapa slam ana faŋga. 15Ece husek a cak te Yesu, aca wala nda masa miya ta damkwaw hay ka njah dapa sə, manjaha, aŋga ava rəkwat fa vaw, aŋga werwer cay. Mafay ana, zidaw ke kəɗec mabay. 16Ndah mawala jeŋ ana hay masa e ŋgə faŋga da yaŋ nda ava damkwaw hay va vetem hay sə, ec ke kərecen maɗay ana kad ndah medek ka ta wuzaɗ jeŋ ana hay. 17Ndah ana ac ka bərakw Yesu da daɓa dapa vavara teceŋ.

18Masa Yesu a daɓa, e tep kad pa kaslkaslah sə, nda masa damkwaw hay ka njah dapa sə, a ŋgana mbahw Yesu a wal aca ra njah ava aŋga fa slam ana. 19Yesu sə, ka vana cəv aabay, amaa ka gwaɗa, gege: «Vahaɗ kad a wunam kad vara ndah takaa, te ŋguzdecen jene hay masa Bay Mazlakava ta ŋgiya kad kaa fakwanay, ŋguzdecen ara gwagumaw masa aŋga ta ŋgafakaa metekweney.»

20Nda sə, ka data, ke bəzedecen labara ana kad ndana hay da yaŋ jene hay masa Yesu ta ŋgiya kad aŋga fakwanay dapa vavara mezel Dikapawl#5.20 Dikapawl A wal megweɗ wunam hay kuraw. Mat 4.25. . Ndah macəna labara ana fakwanay sə, ec ke rəzley.

Yesu aŋga ava gədaŋ da yaŋ mehecey va maməcay

(Mat 9.18-26; Luk 8.40-56)

21Yesu ka vahakata ava kaslkaslah jaka luwa leŋgeɗey te təker mazlakava. Ndana hay gaa ec ke kwesek vaw kad cak tata. Ke zlec da ma te təker ana. 22Ndana ɓa mezel Jayrus, aŋga nda amta deveŋ mesnendə hay dapa Way ta macə mbahw te Zuwef hay faŋga, ke dekey. A ta wala Yesu sə, kwerjejekw! E kekəred fəma tata. 23Ka bərkwaw, ka gwaɗa, gege: «Dəm aɗaw ɓa aŋga gwabay, mbala a ta məcay. Mbahw, dekey ta pafa ha, a da mbəlata.» 24Yesu ec ke dey ava aŋga ana.

Miya makwasa faŋga sə, ac ka cəp Yesu, aca ŋgaŋgəɗaciya vəla vəla. 25Dapa taɓa teceŋ ana faŋga, ŋgwaz ɓa ke ŋgə mavay kuraw dapa yaŋ ana ecew, aŋga eve mehecey ta magajə bembez. 26Ke dey a vara daɓtar hay mekele mekele mabay ka ta yah membəley. Menjev hay masa ac ta vana sə, ec ke bezləŋgeɗek mehecey ana saya. Ka ndəvda zleley tata hay fakwanay kad pa, amaa kwa ka ŋgana afəcaka aabay. Sesəker mehecey ana, a ŋgada hahar fəma fəma ava gədaŋ. 27Ŋgwaz ana ka cəna labara te Yesu. Mafay ana, ke dey kad pa taɓa ta ndah makwasa sə, jaka ava dəɓa te Yesu, ka pafa ha rəkwat tata. 28A ŋgiya ara nesey sə, afa ka wulakaw dapa rav tata, gege: «Kwa daha ya ka ta pafa ha ma ta rəkwat tata sə, ya mbəlata.» 29Dapa masa ŋgwaz ana a pafa ha rəkwat te Yesu sə, bembez masa e gejə sə, ndeŋ! A ŋgəla ma faŋga faŋga ana. Dapa faŋga ka ŋgana laŋlaŋ dapa vaw, a cəna sə, ka mbəlata cay. 30Faŋga faŋga ana, Yesu ka cəna gədaŋ dapa vaw tata ka dakata kad a vəda. Mafay ana, pəla! A ŋgwad ma kad ava dəɓa dapa taɓa ta miya, ke nəkefec ndana hay, gege: «Mapafa ha rəkwat aɗaw wa?»

31Ndah masasəraka jene tata ac ka vahan, gege: «Ka wala ndana hay fakwanay aca ŋgaŋgəɗacakaa vəla vəla ara nesey sə, ka nəkafandaw: “Mepefiyey ha wa” sə, a ŋgana gwagumaw?»

32Amaa, Yesu ke pə ndey ava zlalav jaŋgata, a wal a da wala nda mapafa ha rəkwat tata ana. 33Ŋgwaz sə, zidaw ka ŋgana, ke kekesley, afa a sən jə masa aŋga te ŋgə dapa vaw tata. Ara nesey, ke dey, ke kekəred fəma te Yesu. Ka gwaɗan jə masa aŋga te ŋgey dapa vaw tata sə, fakwanay eve metehwe ana. 34Yesu a wala sə, a gwaɗa, gege: «Dəm aɗaw, makəsparav takaa ka mbəlakaa cay. Daɗ eve metehey, mehecey takaa ɓasabay.»

35Dapa masa Yesu e gweɗ kad ŋgwaz ana heley sə, maslaŋ hay ec ke dek da way ta Jayrus, mesnendə ta Way ta macə mbahw te Zuwef hay sə, ac ka gwaɗa Jayrus ana, gege: «Daŋgwayak sə, ka məcata, ka yiva nda masasəraka nda sabay.»

36Amaa Yesu ka cak zləmay fa ma teceŋ ana mambəla ana aabay, ka gwaɗa Jayrus, gege: «Təka rav takaa, ka ŋgə zidaw bay, kəs ma aɗaw war!»

37Dapa medə teceŋ, ka və cəv kad ndana da padan ma sə, aabay, say a kəs Piyer, Zak va Zaŋ malamaŋ ta Zak ana babəla. 38Aca husa a way ta mesnendə ta Way ta macə mbahw te Zuwef hay, ac ka ŋgat ndana hay makwasa mabay. Ndah ana aca cə lalaw, aca kuɗa, aca cə marbazlay ava gədaŋ. 39Yesu ke sehw kad a way ana, ke nəkefec, gege: «Akwa cə lalaw, akwa kuɗa sə, mafay te mey? Dem ana ka məc aabay, a njawaŋ.»

40Ndana hay fakwanay ac ka sasarafa. Ara nesey, Yesu ke mbesekec avəda fakwanay kad a vəda. Ka kəs papaŋ, mamaŋ te dem ana va ndah masasəraka jene tata mahkar, ec ke sehw kad way masa dem ana manaha dapa. 41Yesu ka təhaz dem ana pa ha, ka gwaɗa, gege: «Talita Kwami#5.41 Talita Kwami Ara megweɗey «Dəm aɗaw, ya ta gwaɗa ka zleftek.» Ma ana nesey ava ma ta Gərek. Dapa masa Yesu e ŋgə mezlər heley sə, ndana hay gaa aca ŋgə mezlərey maŋgara ava ma te Gərek.» ara megweɗey, dəm aɗaw, ya gwaɗakaa, zleftek.

42Dəm sə, ke zleftek faŋga faŋga ana, ke zlecey, ke dey. [Mavay te dem ana kuraw dapa yaŋ ana ecew.] A faŋga ana, ndah da way sə, ec e rəzlec mabay. 43Amaa Yesu ke ɓeɓəceceŋ, gege: «Jeŋ masa e ŋgə meendey takwar nesey sə, akwar ta ŋguzda ma ana kad ndana mekele bay.» Ava dəɓa ana, gege: «Mavana jə ta manday.»

Currently Selected:

Markwas 5: CUVnt

Highlight

Copy