Luk 10
10
Yeso tom ba ighumi sambigə cho bigə
1Amaʼazənə mbə məŋə-anó ŋu, Asɨyisəg choʼ ba ighumi sambigə cho bigə anigə tom úŋwən ubigə ubigə kwi uŋuw imbey abú uŋwən ungɨŋ ubey nə usin ujum mbənə uŋwən mi zaʼa inu awu ungɨŋ.#10.1 Uŋwaʼanayn moʼ mbə ghayn kwi ba ighumi sambigə. 2#Mat 9.37, 38Wə ghayn abú úŋwən kwi, “Ughəy ijaŋa mbə nanaʼ anigə ba faʼa umbə kweʼe mbən chaʼara Nwiye ŋunə aghəy jaŋa amə umbi ma kwi u cha ba faʼa u zaʼa ijaŋ ughəy ma. 3#Mat 10.16Mbən kyay kwi ayə cha ngwen ni buŋ injəg akaʼa ifuŋ. 4Ka mbən num ngwən utagayi, kə abam, kə utabay, ka mbən chaʼara ngwən wa moʼ anji. 5Mbən bə nyi a na moʼ mbən dey ighayn kwi, ‘Aborobod ayə igun ba jum mbənə umə akə ungɨŋ na.’ 6Wa ŋunə umə́ kaba aborobod ubə mə awu ungɨŋ na, aborobod zənə mbən ghayn a yi tənə abú uŋwən abə mə chama wa ŋunə ukaba aborobod awu ungɨŋ na, aborobod zənə mbən ghayn ayi wene izaʼa inen. 7#1Ko 9.14; 1Ti 5.18Mbən chomo aba a na zənə mbən mi pey inyi ungɨŋ mbən jəg inugə u aghəy mbənə umi na inen damugə yə kəʼ kwi utuw wa faʼa. Mbən mə́ duw ngwen a na feyn iŋu akə chini. 8Mbən mbə́ nyi asin moʼ ubə num ngwən anji chuŋ, mbən jəg u ghəy mbənə umi naʼ inen. 9Mbən zwey ba sɨgə mbənə umə asin wu mbən ghayn abú ba mbənə amə asin wu kwi, ‘Anó ufon Nwiye si tinə izaʼa inen.’ 10#Ifa 13.51Mbən bə nyi asin moʼ uki num ma ngwen anji chuŋ, mbən ŋuw iguni nji asin wu ghayn kwi, 11#Mat 10.7-14; Mak 6.8-11; Luk 9.3-5Kaba imbuy injən asin zənə mba beʼe umba ughəw mba yi koro itən injim i tey anwini kwi mbən ton ukən uchuŋ anigə mbən koni anó zəŋ kwi anó ufon Nwiye si tinə.”
12 #
Mat 11.24;
Mat 10.15
A yə ghayn inen kwi aney zənə Nwiye mi mə saʼa ba, u yi mə nə akənə abú ba Sodom chigə ma akə inji zənə u mi mə nə adiri abú ba mbənə umə akə ungɨŋ asin zəŋ.
Usin mbənə cha ba beni ukən uchuŋ awu
(Mat 11.20-24)
13Yeso gha ghayn kwi, “Ingəʼ kyayn yi nyi igun nigə ungwə Chrazin! Ingəʼ kyayn yə igun nigə ungwə Batsayida. Mbə́ ghayn kwi mbə di bi aghəy uyere unó mbənə mbə aghəy ungɨŋ inen amə abú Tyre nə Sidon inji ba mbənə u mə awu mi si chomo asey zi ndwi idey itu aboroy inyo uma itey kwi mbə si waʼ unó iboŋ ma. 14Aney zənə Nwiye mi saʼa ba, u yi tey adiri nanaʼ abú ba mbənə umə ungɨŋ Tyre ni Sidon chigə ma umugə umi tey inen. 15Ami nigə ungwə Kapenawum! Ngwə mə kaba ibeʼere inji inyo iŋu azobo? Chama umbi swiʼiri ayə imaʼ ungɨŋ abey uwu ba.”
16 #
Mat 10.40; Mak 9.37; Luk 9.48; Jon 13.20 Yeso ghayn abú mbə́ məŋə-anó ma kwi, “Wa moʼ ŋunə u zəw anó zənə mbən ghayn yə zəw anó zənə a ghayn. Wa ŋunə u ton ngwen uŋwən ton aŋu. Wa ŋunə u ton aŋu yə ton wa ŋunə yə tomo aŋu.”
Ba wu ighumi sambigə chuʼ bigə yeŋ zaʼa
17Ba wu ighumi bigə choʼ bigə yeŋ zaʼa, mbə́ pey yi ghayn kwi, “Asɨyisəg kaba uzugə iboŋ mbə zəw anó zənə mba ghayn akə ungwə ukum.”
18Yeso ywiri abú úŋwən kwi, “Mə zən satan u fwayn azobo ni imbəŋ muʼa.” 19Mbən zəw! Mə si naʼ ikay inen nu mbən mi yeŋ igun jugə ni igun agaʼafuʼ ma naʼ ikay inen nu ichigə ma akə ikay ba abana ujum. Cha aghəy moʼ mi nywi ma ngwən. 20Anigə mbən mə wuʼe ngwən damugə uzugə iboŋ zəw ngwən. Mbən ni wuʼe ngwən amə damugə Nwiye si ŋwaʼanayn itən ikum azobo.
Ifiŋ Yeso sugi ni iwuʼi
(Mat 11.25-27; 13.16, 17)
21Akə amaʼa wu, Azugə zayn zayn aghəy iwuʼi sugi afiŋ Yeso anigə u ghayn kwi, “Uŋu mbaʼ Asɨyisəg abú azobo nə isey ayə naʼa uyaka inigə damugə ngwə noy unó mbəŋ abú ba mbənə umə́ nə iwe foro abú mbə́ kyayn unoʼo isiy tey abú buŋ kuŋe, aŋ uŋu mbaʼ amə inji zənə ngwə kaba.”
22 #
Jon 3.35;
Jon 10.15
“Uŋu mbaʼ si naʼ u aghəy ujum iniŋ cha ma wa moʼ kyayn ma ŋwə̂ anji chuŋ chigə akə mbaʼ, cha ma wa moʼ kyayn ma mbaʼ inji chuŋ chigə akə ŋwə̂ foro wa ŋunə ŋwə̂ choʼo itey uŋwən abugə.”
23Umugə yə ghayn nigə, yə gha ma ighayn abú mbə məŋə-anó ma anjim anjim kwi, “Nwiye zi aborobod iguni inen i zən u aghəy mbənə mbən mə́ zənə! 24A yə ghayn inen kwi ba ukən uchuŋ nanaʼ nə ifon nanaʼ kaba izən u aghəy mbənə mbə zənə anigə cha mbə́ di zən. Mbə́ kab izəw unó mbənə mbən zəw anigə cha mbə́ di zəw.”
Inayn maʼa da wa Samariya
25 #
Mat 22.35-40; Mak 12.28-34 Aney moʼ, ataʼa ba akə unoʼo moʼ ŋu abú Yeso ikwaʼara uŋwən. Anigə yə biri abú uŋwən kwi, “Ataʼa ba ami aghəy ngiya ki jəg itəni yi chama imi noʼo imey.”
26Yeso biri abú uŋwən kwi, “Mbə ŋwaʼanayn ungɨŋ ikɨy Mose kwi ngiya? Ngwə foŋ yə ghayn kwi ngiya?”
27Ataʼa unoʼo wu ywere kwi, “Wuʼ Asɨyisəg Nwiye nə injə fiŋ ujum nə injə itəni ujum nə injə ikay ujum, nə iti ikono ujum. Nibi wuʼ wa ŋunə umə tinə ma inji iyad numugə ngwə wuʼi injə iyə inyo.”
28Yeso ghayn abú uŋwən kwi, “Ngwə ywiri anji chuŋ ni aghəy nigə ngwə yi mə ni itəni.”
29Ataʼa unoʼo wu kaba itey kwi anó zənə u mə ighəy yə kəʼ anigə ubiri abú Yeso kwi, “Wa ŋunə umə tinə ma inyi iyad amə ngwa?”
30Yeso ywiri abú uŋwən kwi, “Anom moʼ noʼ a Yerusanem mə swiʼi ŋuw Jeriko, iji yi ibiya uŋwən anji. Iji wu feyn u aghəy ma ujum som uŋwən umə sə baʼa iku anigə u sayn uŋwən noʼ ŋu ma. 31Umugə yə́ chigə nigə, wa faʼa ambəŋ Nwiye moʼ mə swiʼi akə inji awu Amaʼazənə yə zən anóm awu, yə chigə ma aba inji zi. 32Anigə, anóm moʼ ni amə wa unebey Levi mə ŋuw pey asin awu zən uŋwən ichigə ma aba inji zi. 33Amə anóm moʼ nu amə Samariya nu yə mə yeŋ ma iŋu pey asin zənə anóm wu mə́ awu. Umugə yə zən uŋwən, akənə sugi ungɨŋ fiŋ ma. 34Anigə yə ŋu abú anóm wu i səw anay ma akə unoʼ i zoʼ ni ungəd ikod. Wə aghəy nigə ibeʼere uŋwən niŋe igun jakas num iŋu ungɨŋ na zənə ba isoʼ mə yə ineŋ awu ungɨŋ ipara uŋwən. 35Aney kuŋ, yə chi ukab ichuʼ ibigə na abú wa ŋunə yə mə faʼa awu ighayn kwi u para uŋwən Amaʼazənə ami wene zaʼa a yi wiy ukab chini ŋunə ngwə cheŋe igun uŋwən.”
36Yeso nwi ibiri abú uŋwən kwi, “Akə inji ikono amə ngwə akaʼa ba mbəŋ uta nu utey kwi amə wa ni utinə ma iyad anóm uyugə nu yə fwayn abugə iji?”
37Ataʼa unoʼo wu ywiri kwi, “Amə ŋunə yə kənə akə uŋwən.” Yeso ghayn abú uŋwən kwi, “Ngwə ŋuw ni aghəy nigə.”
Yeso ŋu chaʼara Mata nə Mari
38 #
Jon 11.1
Umugə Yeso nə mbə məŋə-anó ma mə́ yeŋ iŋuw, mbə ŋu pey ungɨŋ asin moʼ. Ayey moʼ nu ukum ma mə Mata num Yeso ungɨŋ na ma. 39Mata mə nə unya ayey ma nu ukum ma mə Meri. Meri wu chomo iyad ughəw Asɨyisəg ni zwaray unó mbənə yə́ mə́ ghayn. 40Anigə Mata mə somo inyo ungɨŋ afaʼa umugə yə mə tana aghəy jəji abú úŋwən ma zeʼe. Anigə yə ŋu ghayn abú Yeso kwi, “Asɨyisəg ngwə ki zən ayə umugə uŋu unya ayey sayn amə faʼa ufaʼa ujum umugə zeʼe? Ghayn abú uŋwən u zaʼa ywere aŋu.”
41Asɨyisəg ywiri abú uŋwən kwi, “Mata, Mata! Ngwə yə somo inyo zəw ingəʼ ungɨŋ ufaʼa nanaʼ, 42abəma anó feyn umə kaba Mari chi aba chuŋ nu cha amə aghəy u num abú uŋwən.”
Currently Selected:
Luk 10: NGI
Highlight
Share
Copy
Want to have your highlights saved across all your devices? Sign up or sign in
© 2023 CABTAL
