Zâŋ 10
10
Béla a njuku koro hɛ̧hɔ́la
(Zâŋ 9:24-38; Eze 34:1-19; 1Pí 5:1-4)
1Zezú sa: «Katína, mi kaw sa hí̧ wǎyri ɓá, njuku ka zi ri ɓil hɛlɛ a mbóléri ka nzáʼaŋgboro yá, ka a he lá gel a féké ɓórí, lá tûl gekén, ké ɓá ríwa rá̧ njuku naʼa hɛ̧ a ŋgɛ́rɛ. 2Dáy njuku ka ri lá nzáʼaŋgboro, ɓá njuku koro mbólé. 3Njuku koro nzáʼa hɛlɛ e ŋgburu nzáʼaŋgboro hí̧ nɛ́, mbóléri e lá kɔ́ŋɛ́. Ké e ɗí mbólé a mɛ̌ri̧ ka rɛŋ a kuriri mbêw mbêw too, a ɓá kuriri tɛ̧́ kála. 4Fal ɓá kuriri tɛ̧́ kála, ké e sé ɗambɛl a kuriri, mbóléri e tɔ́ŋ nɛ́, ɓayhí̧lé kú tu ŋgboro kɔ́ŋɛ́.» 5Dáy, kú zi ma tɔ́ŋ fal a gɔ́rɔ́njuku yá, «kú e ŋgú nɛ́ ɓá ɗínáké, ɓayhí̧lé kú zi tu ŋgboro kɔ́ŋɛ́ yá.» 6Zezú sa galaɓay nɔ́, dáy njukuri zi lá ɓil ɓay ka ké zi ɓay a sanáké yá.
Zezú ɓá njuku koro hɛ̧hɔ́la a béláké
(Zâŋ 14:6; Efɛ 5:2, 25-27; 2:11-19)
7Zezú resa ɓáy ɓá: «Katína, mi sa hí̧ wǎyri ɓá gbátɓay: Mǐ, pé ɓá nzáʼaŋgboro rí ɓil hɛlɛ a mbóléri. 8Njukuri too ka gí ɗambɛl hí̧ míy, ɓá ríwari, ɓá njuku naʼa hɛ̧ ka ŋgɛ́rɛri, dáy mbóléri zi lá kuriri yá. 9Mǐ, mi ɓá nzáʼaŋgboro, njuku ka ri tá lá gel ní, e ziŋ pɛ̧́na, ké e rína ka tɛ̧́, ka ziŋ lâʼa a mɛ̌. 10Dáy njuku ríwa gí ɓay a ríw hɛ̧, í hûl rá̧ gbɛʼɛrɛ hɛ̧ri̧. Mǐ, mi gí ɓay a njukuri kú ziŋ ndísɛ̌ʼɛ, a kú ziŋ káwa a ndísɛ̌ʼɛ a béláké.
11Mi kaw ɓá njuku koro hɛ̧hɔ́la a béláké. Njuku koro hɛ̧hɔ́la a béláké kaw ɗɛ́ŋ ɓay a hí̧ ndísɛ̌ʼɛ a mɛ̌ hí̧ mbólé a mɛ̌ri̧. 12Dáy, njuku ka niŋ péna ɓay a lari, zi tí ɓá gbát njuku koro hɛ̧hɔ́la yá, mbóléri zi tí ɓá, ɓála a mɛ̌ri̧ nyá. Ké e sáŋ kuriri a ŋgú, gelka ké mí kó hɛ̧ ŋgbáhɛ̧ kaw gínay. A goló, hɛ̧ ŋgbáhɛ̧ e gí ŋgbá mbólé a há̧narí̧, ka gbɛʼɛrɛ a fékéri ŋgú mbêw mbêw too. 13Ɓayhí̧lé, njuku ka niŋ péna ɓá ɓay a lari, zi kɛrɛ béla a mbóléri yá. 14Mǐ, mi ɓá njuku koro hɛ̧hɔ́la a béláké. Mí tu mbólé a mǐri̧, mbólé a mǐri̧ tu mí, 15ɓá báŋké nɔ́ ka Bâa a mǐ tu mí, ka mǐ kɔ́, mi tu Bâa a mǐ. Dáy, mi kaw ɗɛ́ŋ ɓay a ziŋ hûl ɓay a tûl mbólé a mǐri̧. 16Mi erú ka mbólé a fékéri ka zi tí ɓil hɛlɛ nɛ́ nyá kɔ́. Belɓá mí ɗá kuriri, kú e lá kɔ́ŋ ní, ka mára̧ há̧narí̧ ɓá hɛ̧hɔ́la mbêw, kuu njuku koro hɛ̧hɔ́la mbêw.
17Bâa a mǐ zi mí, ɓayhí̧lé mi hí̧ ndísɛ̌ʼɛ a mǐ, ɓay a rezíŋ ndísɛ̌ʼɛké ɓá a féké ɓáy. 18Njuku a há̧na mbêw ma lú ndísɛ̌ʼɛ a mǐ nyá, dáy mí hí̧ ka zína a mí. Mi erú ka kpɔ́ŋa ɓay hí̧ ndísɛ̌ʼɛ a mí, a re erú ka kpɔ́ŋa ɓay rezíŋaké ɓá féké ɓáy. A nɔ́ pé ɓá hí̧nzáʼa ka mi ziŋ a gel a Bâa a mǐ.»
19Wála re ná ɓáy a bazeŋ a njukuri, ɓay tûl ɓay nɔ́rí̧. 20Njukuri ɓá ŋgɛ̧́náké a bazeŋ a kuriri sa ɓá: «Ké erú ka têm ɓéké! Ké ɓá dɔ̂ʼɔ! Ɓayhí̧ i lá nɛ́ lé?» 21Njuku a fékéri sa ɓá: «Njuku ka erú ka têm ɓékéy, ma saɓay nǎŋnɔ́ nyá. Dáy têm ɓéké ma ŋgburu nûn a râ̧wri̧ lé?»
Njukuri sáŋ Zezú
22Ɓá ɓil fêw lékétêl, dáy njukuri kaw záymûn a Zerúzalɛ̂m, ɓay a vûn a Gáŋvbôn a kú záy. 23Dáy Zezú kaw há̧ra̧ ka bɔʼɔ bóró a Salomoŋ ka gbaŋ vûn a Gáŋvbôn. 24Njukuri mára̧ há̧narí̧ gí ɗɔ́ŋ nɛ́ a vbí nɛ́ ɓá: «Sêe sí̧ rá, mɔ́ e sa gbátɓay hí̧ rú lé? Mɔ̌ mí ɓá Kiris lé, mɔ́ sa hí̧ rú gbátɓay.» 25Zezú rerú hí̧ kuriri ɓá: «Mi sa hí̧ wǎyri dá, dáy i zi zibɔʼɔké yá. Pénari̧ ka mi niŋ ka rɛŋ a Bâa a mǐ, kaw tɔ́ʼɔ káwa a mǐ. 26Dáy, i zi zibɔʼɔké yá, ɓayhí̧lé i zi tí a ɓil a mbólé a mǐri̧ nyá. 27Mbólé a mǐri̧ tu kɔ́ŋ ní, mi tu kuriri dáy kú tɔ́ŋ mí. 28Mi hí̧ kuriri káwa a ndísɛ̌ʼɛ dát, kú ma hûl bɔʼɔ mbêw yá, njuku a há̧na zi ma gí naʼa kuriri ka ndɔ̂ʼɔ ní nyá. 29Bâa a mǐ ka ɓá kuriri hí̧ mí, ndé njukuri too ka hɔ̧́na, njuku a há̧na mbêw zi ma gí naʼa kuriri ka ndɔ̂ʼɔ a Bâa a mǐ nyá. 30Bâa a mǐ kuu mǐ, rú mbêw.»
31A goló njukuri fa̧ saw ɓay a kú vbú nɛ́rú̧. 32Dáy Zezú sa hí̧ kuriri ɓá: «Mi ɓá wǎyri kó béla pénari̧ ɓá a ŋgɛ̧́náké ka gí ka ŋgboro a Bâa a mǐ. Dáy a ɓil péna nɔ́rí̧, ɓala sí̧ a bazeŋké nɔ́ rá̧ i zi ɓay a í mí ka saw ɓayké lé?» 33Kú fere a sa: «Tí ɓá ɓay tûl béla péna, pé rú zi ɓay a í mɔ́ nyá, ɓá ɓay a fára Gáŋvbôn: Mɔ̌, mɔ́ ɓá njuku ɓǎŋ, dáy a zi ɓay a mɔ́ mbí mûn nɔ́ ɓá Gáŋvbôn!» 34Zezú sa hí̧ kuriri ɓá: «Tá kú ɗé ka̧n ɓil Mbété a sáŋna a wǎyri, ɓá Gáŋvbôn sa ɓá: “I kaw ɓá vbônri̧ nyá lé?” 35Dáy rú tu ɓá, njuku a há̧na zi ma gí lú hɛ̧ ka ɗé ka̧n ɓil Mbété a Gáŋvbôn gefal yá. A tu ɓá Gáŋvbôn ɗí njukuri a ké saɓay a mɛ̌ hí̧ kuriri, ɓá kú ɓá vbônri̧. 36Dáy mǐ, ka Gáŋvbôn ten mí, ka a pé mí gí tísiri, ná a̧ní rá̧ i sa hí̧ mí ɓá: Mi fára Gáŋvbôn lé? Dáy, ɓá ɓay ka mí sa, mí kaw ɓá Gun a Gáŋvbôn. 37Mǐ, mí niŋ péna a Bâa a mǐ nyáy, i láɓulaw hí̧ mí nyá! 38Dáy mǐ, mí niŋ pénákéri rá̧ ka i zi láɓulaw hí̧ mí nyá kɔ́y, i láɓulaw, ɓay tûl pénákéri nɔ́ ka mi niŋ. Rá̧lǒo i tu ɓá, Bâa a mǐ e kuu mǐ, a mǐ, mi e kuu Bâa a mǐ.» 39A goló, kú ɛ́ ŋgboro ɓáy, ɓay a ŋgbá nɛ́, dáy ké tɛ̧́ a bazeŋ a kuriri a kála.
40Zezú resé ɓáy sé helkála mbii a Jurdɛ́ŋ, ka gel ka Zâŋ tí ɓá njukuri nyá batêm rúy. Dáy a gé kawrú. 41Njukuri ɓá ŋgɛ̧́náké gí gé lé, a sa: «Zâŋ zi niŋ hɛ̧sáʼama a há̧na mbêw yá, dáy ɓayri too a ké sa sé tûl a njuku nɛ́ ɓá gbátɓay.» 42A goló, njukuri ɓá a ŋgɛ̧́náké láɓulaw hí̧ Zezú.
Currently Selected:
Zâŋ 10: pnz
Highlight
Share
Copy
Want to have your highlights saved across all your devices? Sign up or sign in
© 2023 CABTAL
