Matiye 20
20
Galaɓay a njuku pénari̧ a ɓil wâʼa ví̧nyɛ
1Pû a Gáŋvbôn ɛ́ŋ há̧na kuu njuku wâʼa ví̧nyɛ a há̧na ka tɛ̧́ ka gel a pélé rím, ka a sé ɛ́ njukuri ɓay a kú sé niŋ péna a ɓil wâʼa ví̧nyɛ a mɛ̌. 2Kú láhá̧narí̧ ɓá péna sêe mbêw ɓá mínya mbêw#20:2 Mínya mbêw kú ɗí ka nzáʼa Girɛ́k ɓá deniyé, zi ɓay a sa ɓá lari péna a nâm mbêw., dáy a ké pé kuriri sé ɓil wâʼa ví̧nyɛ a mɛ̌. 3Ké tɛ̧́ ɓáy a sɛl a sêe zíndɔ̂ʼɔmbêw, a sé ziŋ njuku a fékéri ka kaw baa a ɓil ɓara táŋ pénay. 4Ké sa hí̧ kuriri: I sé wǎyri kɔ́, sé niŋ péna a ɓil wâʼa a mǐ, a mí pú wǎyri hɛ̧ ka e ma gelké. 5Dáy kú sé. Sêe gí law gel a tûl lé, ké retɛ̧ ɓáy, a gé ziŋ njukuri, a pé kuriri sé ɓil wâʼa a mɛ̌ ɓay a sé niŋ péna. 6Sɛl a sêe sáy a bɔʼɔlêw lé, ké retɛ̧ ɓá féké ɓáy, a gé ziŋ njukuri ka ew ka gbaŋ ŋgboro, dáy a sa hí̧ kuriri: Ɓayhí̧ i kaw a gelé sêe sêe táŋ niŋ péna há̧na lé? 7Dáy kú sa hí̧ nɛ́ ɓá: Ɓayhí̧lé njuku a há̧na zi ŋgá̧má ɓurú ɓay a niŋ péna nyá. Dáy, ké sa hí̧ kuriri, í sé niŋ péna a ɓil wâʼa ví̧nyɛ a mǐ. 8Gelka bɔʼɔlêw gí ká̧y, njuku wâʼa sa hí̧ njuku kɔ́rɔ́ wâʼa a mɛ̌, ɓá: Mɔ́ ɗí njukupénari̧ gí, a mɔ́ pú kuriri lari a kuriri. Mɔ́ tí ka tûl a njukuri, ka gí a fal, a mɔ́ ɔrɔ a tûl a njukuri ka tí gíy. 9Njukuri ka gí a fal gí, a gí nyá kuriri too mínya mbêw mbêw. 10Njukuri ka sé a tí pélé gí, a kɛrɛ ɓá kú e nyá ndé lé. Dáy a gí nyá kuriri kɔ́ mínya mbêw mbêw too ɓá báŋké ka njuku a ǎ̧wrí̧ nyáy. 11Gelka kú nyá lariy, kú tí ŋgɔ̧rɔ̧ ɓay ziŋ njuku wâʼa, 12a sa: Njuku a fal nɛ́rí̧ niŋ péna ɓá sɛl a sêe mbêw yáŋ, lé mɔ hí̧ kuriri mínya mambɛ̧́nɛ́ kuu ɓurú, ka niŋ péna sêe sêe a ɓil hɔrɛ sêe. 13Dáy ké rerú hí̧ njuku mbêw a bazeŋ a kuriri: Mbáŋa a mǐ, mi zi niŋ ɓéké ziŋ mɔ́ nyá, tá ná láhá̧na ɓá mi e pú mɔ́ mínya mbêw yá lé? 14Mɔ́ nyá lari a mɔ̌, a mɔ́ kála. Mi e hí̧ njuku gína a fal nɔ́rí̧ mambɛ̧́nɛ́ kuu mɔ̌. 15Mi tí niŋ hɛ̧ ka mi ziy, ka hɛ̧zíŋa a mǐ nyá lé? Malé, mɔ niŋ sɛ́rɛ ɓay ka mi niŋ béla lé? 16Nǎŋnɔ́ Zezú sa ɓá, njukuri ka e a fal, e reɗambɛl, a njukuri ka e a mbɛl, e regí fal.
Zezú saɓay a hûl rá̧ toma a mɛ̌ a bɔʼɔ sáyké
(Mrk 10:32-34; Luk 18:31-34)
17Zezú kaw sé Zerúzalɛ̂m. Ké ɗí gunbɛʼɛri bôo a sére, kɔ̧ ɓórí, a tûl séna a sa hí̧ kuriri ɓá: 18I kó, ná e gé ɓá Zerúzalɛ̂m, a sá̧, kú e ŋgbá Gun a njuku hí̧ gáŋnjuku nzáʼaká̧nari̧ rá̧ njuku tɔ́ʼɔ sáŋnari̧. Kú e ɓá ɓay ŋgbá nɛ́ ɓay í nɛ́. 19Dáy, kú e ɓá nɛ́ hí̧ njukuri ka zi tu ɓay a Gáŋvbôn nyáy, ɓay kú sáʼa nɛ́, a kú vbá̧ nɛ́, a kú ɓara nɛ́ ka̧n tûl dii vbatay. Dáy nâm sáy a falké lé, ké e toma ka hûl.
Vbí ɓay a mâa a Zakí rá̧ Zâŋ
(Mrk 10:35-45)
20Dáy mâa a gun a Zebedéri gí gbaŋa a Zezú kuu gun a mɛ̌ri̧, a gí huku mbɛlɛ́, ɓay a vbí nɛ́ hɛ̧. 21Dáy Zezú sa: A̧hí̧ mɔ zi lé? Ké rerú hí̧ nɛ́ ɓá: Mi zi ɓá, mɔ́ hí̧nzáʼa ɓá gun a mǐri̧ a sére nɛ́, kú ziŋ gelkáwa a ɓil pû a mɔ̌. Gun mbêw a ŋgboro lâʼa rá̧ gun a mbêw a ŋgboro a kpɔ́rɔ́ a mɔ̌. 22Zezú resa: «Í zi tu hɛ̧ ka i vbíy yá. Í ma nzó a ɓil yoŋ tɔ́ʼɔsêe, ka mi e nzónáké lé?» «Kú sa: Rú ma ru̧.» 23Ké ré sa hí̧ kuriri: «Katína i e nzó a ɓil yoŋ a mǐ. Dáy, ɓay a kaw ndɔ̂ʼɔ lâʼa rá̧ ndɔ̂ʼɔ kpɔ́rɔ́ a mǐ, zi gí ka gel ní nyá, gelkáwaké, ná zoko njukuri ka Bâa a mǐ, mɔny ɓay a kuriri.»
24Gelka gunbɔʼɔ a bôo ǎ̧wrí̧ láɓayké, kú ɗí hɛ́rɛ ziŋ Ják rá̧ Zâŋ. 25Dáy, Zezú ɗí gunbɛʼɛri too, a sa hí̧ kuriri: «Í tu ɓá táŋáké, njukuri a kú kó kuriri ɓá mbây a njukuri, kú kaw tûl a njukuri ɓá báŋa bákáwa, rá̧ gáŋnjukuri tɔ́ʼɔ kpɔ́ŋa a kuriri hí̧ njukuri. 26Dáy, ké zi ná niŋ nǎŋnɔ́ a bazeŋ a wǎyri. Njuku mbêw a bazeŋ a wǎyri, mí zi ɓay a kaw ɓá gáŋnjuku lé, belɓá ké kaw ɓá njukupéna a wǎyri, 27ka njuku mbêw a bazeŋ a wǎyri, mí zi ɓay a kaw ɓá njuku a tûlké lé, ké kaw ɓá koy a gázínákéri too. 28Ɓayhí̧lé Gun a njuku mɛ̌ ka mûn nɛ́, zi gí ɓay a kú niŋ péna hí̧ nɛ́ nyá, ké gí ɓay a niŋ péna, a hí̧ ndísɛ̌ʼɛ a mɛ̌, ɓay a zé njukuri ɓá ŋgɛ̧́náké.»
Zezú ŋgɛ́rɛ râ̧wri̧ sére
(Mrk 10:46-52; Luk 18:35-43)
29Gelka Zezú rá̧ gunbɛʼɛri kaw tɛ̧́ a ɓil pû a Jeriko, njukuri ɓá ŋgɛ̧́náké tɔ́ŋ Zezú. 30Râ̧wri̧ sére kaw a gbaŋ ŋgboro, a lá ɓá Zezú kaw tána; Dáy a vbá̧nzáʼa: «Gáŋmbây, Gun a Davít, mɔ́ kósêe hí̧ rú!» 31Njukuri pom kuriri ɓá kú pɔŋ nzáʼa kuriri, dáy kú vbá̧nzáʼa gé ɓá mbɛl: «Gáŋmbây, Gun a Davít, mɔ́ kósêe hí̧ rú!» 32Zezú ew, a ɗí kuriri, a vbí ɓá: «A̧hí̧ i zi ɓá mí niŋ hí̧ wǎyri lé?» 33Kú zi a sa: «Gáŋmbây, mɔ́ niŋ a rú kó gel.» 34Zezú kó kuriri sehaŋ, dáy a ɗa nûn a kuriri; núnmbɛ̧́nɛ́ nɔ́, kuriri sére too, nûn a kuriri kó gel, dáy kú retɔ́ŋ Zezú.
Currently Selected:
Matiye 20: pnz
Highlight
Share
Copy
Want to have your highlights saved across all your devices? Sign up or sign in
© 2023 CABTAL
