Matìyò 10

Yesù ə sày kə tə Tsə̀təndii ivəm nə ghe tiy ibè twum fyi yə̀

(Mâk 3.13-19; Lukâs 6.12-16)

1Yesù ə̀ twoŋə dzəŋə na bə̀ tsə̀təndii tə we ìvəm nə̀ ghe tiy ibè, nyə̀ tsə ghu nə̀ daʼa kiy ani dzwùm fyi nsìy mə̀bɛbə̀ mìy nə̀ ghu zəŋi taw dzaŋə̀ tə̀dzə̀m aghê kə dzaŋə̀. 2À yù də azəd ə aghě ntwùm ə̀ Yesù a ghè yə̀, twoŋə Simùn (ghu twoŋə nə̀ à də Pità) nə̀ àzə̀ ə̀ we ghu kə twoŋə nə̀ à də̀ Andùlù, nə̀ Dzɛ̂m nə̀ àzə̀ we Dzwan awa Zebedì, 3nə̀ Filîp nə̀ Bàtùlùmiyà, nə̀ Tomâs, nə̀ Matìyò wə̀ ù kə boʼò də tsə nəniy wù wə̀ ù khii ŋwàʼà kə̀ tsuw kiy, nə̀ Dzɛ̂m wà Afayòs, nə̀ Tàdiyà wə̀ ù kə də soʼo wè ntwùm ə̀ Yesù. 4À liy yə̀ kə də Simùn wù ìghàa, nə̀ Dzudàs Ìsə̀kalòt wə̀ ù kə kâm bù fê fyi yə̂ Yesù.

Fàʼ kə aghě ntwùm ə̀ Yesù àvəm nə̀ àghè yiy àbè

(Mâk 6.7-13; Lukâs 9.1-6)

5Yesù ə twum fyi yə̀ àghě ntwùm ə̀ we àvəm nə̀ ghè bè dzày tsə a ghu nə, “Kəə ghǎ nə̀ zê dzə̂ anə nàʼà tə aghù yə̀ ghu də wày aghee Dzû, nə̀ ìnaʼ i Sàmaliyà. 6Ghà fə̂d zû anə inaʼ i Islàel, aŋwòə ghu də kə yəə ndzù tə̀ tə nây doʼò nəniy. 7Yəə ghà zê nəniy ghà ki niʼa yəə ntwùm ìdzòŋə̀ yìy nə̀ soŋə fə Zə̀kìy dziy saʼ aghee we ate an-a-vələ fə mə swəd. 8Ghà zəŋi taw kə aghû yə̀ ghu dzaŋə̀ nəniy, ghà zɛmə̀ bə̂ aghè àpfə yiy, nə̀ à yuu ghu kwu nəniy uŋkə̀m wìy, ghà dzwûm fyi soʼò nsìy mə̀bɛbə̀ mìy, à nyə̀ mìə̀ daʼa kə ghà kə̀ awò ghà, ghǎ kə̀ zwe dzə̂. Kəə ghǎ nə̀ bəbə ukhiy wiy ate. 9Ghà kə nîy dzə̀ ukhiy ù liy wiy, 10kəə ghà nə̀ nìy dzə̂ wab kiy, moo ndzwu tə̀ liy tiy, moo təgûw, nə̀ mbàŋ ì nyilə̀ yìy, aŋwòə aghû yə̀ ghu faʼà nəniy ghu ndzə̂m kpe ŋwô ani kyilə ufânyiə wiy anə fàʼ kə̀ ghu faʼà nəniy.

11Abu à də kə inaʼ ìghaa yiy moo naʼà fə̀ ghaa fiy ghà tsîy nyi yə̂ nəniy ate, kaw fyi kə wù wə̀ ù kì liə nəniy ani ŋgwam na gha, ghǎ suki yə̀ awote ndaw, ghà doʼò kə awote zù kùm soŋə fə ghà nî ŋwòə. 12Abu ghà tsîy nyi kwoʼ yə̂ a ndaw, ghǎ dzây tsə nə̀, ‘Ibvay yiy doʼò nə̀ ghà.’ 13Abu aghee ndàw ì ghà yə̀ ŋgwam na nəniy gha, Zə̀kǐy nyə̀ ghu nə̀ ibvay yiy, abu ghu kwuni də kə̀ ŋgwam na nəway gha, Zə̀kiy ki zəŋi tsə ìbvay i ghà yə̀ dzùmì bə̀ ghà. 14Abu aghê àliy yiy moo inaʼ ìliy yiy twe ani ŋgwam na gha moo ani zuw ayiə ghi à dziy yiy, ŋwòə fyi nənìy awote a ndaw moo awote anə inaʼ, ghà bwoʼ maʼà tsə bvû kə̀ kə də nəniy anə ifwe ghi ani dè tsə nə̀ Zə̀kìy kî nyìə̀ ŋwòə ghu nə̀ mfəm anə ayiə yə ghu twe maʼà nəniy ntwùm ə̀ Kə̀zə̀. 15Mə ndzəmə̀ dzìy bə̀ ŋwò ani bu a tsuk fə isaʼ Zə̀kìy nî ŋge dè mwuli kə̀ kwoʼo kiy azoŋə̀ àghě inaʼ i Sodòm nə̀ Gòmolà tsìy fyi azoŋə̀ àghě inaʼ ighè yə̀.”

Itswû kwùmə̀ yə̀ nə̀ ùtswə̀d wə̀ u kî bê nəniy

(Mâk 13.9-13; Lukâs 21.12-17)

16Kòʼò nənìy, mə twumə yə̀ ghà yəə à də̀ təndzù anə uzə ukəŋ, yəə i də nəniy aghii, ghà kəli tsə utwab yəə à də təzwə. Ghà ki bvamə tsə iwee yiy yəə à də̌ ububumə. 17Ghà nîy tsə iyemì. Ghu nî kwi zè nə̀ ghà akə̀lə̀ àghè àsaʼa tə nsaʼ yiy, ghu ni bwad soʼò ghà anə ndaw tə udzəŋə tə aghě Dzû. 18Ghu ni nîy zû soʼò nə̀ ghà a kə̀lə̀ àghù yə̀ ghu də nəniy utuw wiy anə təmbwòʼ nə̀ akə̀lə̀ ùdòŋ wìy bòʼ mìə̀. Ghà ki dziy yə ntwùm ìdzòŋə̀ yìy awò ghu, dzìy yə̀ soʼò awò àghù yə̀ ghu də wày aghee Dzû. 19Abu ghu kwi kə gha, zù nə̀ ghà ani saʼ ghà, kəə ghǎ nə̀ moʼò dzə̂ nə̀ ghà kî sì dzìy yə̀ nə̀indiə, mə dzîy aŋwòə Zwàykə̀zwekiy kî nyìə̀ bə̀ ŋwò ayiə yə ghà kî kwu ani dzày awote. 20Ayiə yə ghà kî dzìy nəniy à kì ba way dzə gha ghà dzîy nəniy, à ki də̌ Zwàykə̀zwekiy kə kî nyiə̀ gha nə̀ ayiə yə ghà kwu ani dzày. Toŋə Zwàykə̀zwe kə kə ŋwô bə̂ nəniy awò təli.

21Aghê ni fyie fyiə awizə̂ yìy nə̀ ghu zû wiy maʼà ghu, nə̀ təli ni fyie fyiə awa ghu nə̀ ghu zû wiy maʼà ghu, awa ni ŋwaa kwùnə nə̀ nə̀ təli ghu yiy, nə̀ nə̀ zəə ghu yiy ani wiy màʼà ghu. 22Aghê dzə̀mə̀ ni dzwə nə̀ ghà bòʼ mìə̀. À mày kə wù wə̀ ù nì tyimə taw tsə anə ibɛmə iwe zù kwùm, Zə̀kìy nî də ani bii fyi we. 23Abu ghu twe maʼà nəniy gha anə inaʼ ìliy yiy, tu zù nənìy anə inaʼ ì ŋwô yiy, mə ndzəmə̀ dzìy bə̀ ŋwò nə̀, awò Wà Wù ani bù, à ni də nə̀ ghà kamə bwîy tsîy mâ naʼà tə Islàel tə̀ tə̀dzə̀m.

24Ànìsə̀ kə̀ŋwàʼà kə̀ tsîy fyi dzə̂ àtyi dè, Wù kə̀fàʼ kə̀ tsîy fyi soʼò mwe ə̀ kə̀fàʼ. 25I kpe ŋwô awò ànìsə̀ kə̀ŋwàʼà ani dòʼò bə̀ yəə à də àtyi dè, kpe sòʼò nə̀ wù kə̀fàʼ ù dòʼò bə̀ sòʼò yəə à də mwe ə̀ kə̀fàʼ. Abu ghu də ani twoŋə mwe wə ù kwu nəniy ndaw nə̀ à də̀ Bezebù, ghu kî də̌ ani dzày nə̀ìndiə nə̀ àghù yə̀ ghu muə nəniy awote a ndaw ə?

Wù wə̀ ghà kwu ani tsəŋə wè

(Lukâs 12.2-7)

26Mə dzîy bə̀ â ghà nə̀ kəə ghà nə̀ tsəŋə wù lìy, Soŋə fiy ki bè ŋwò, ayiə yə a kəd doʼò nəniy, ghu kî fwiy maʼà kə, iyiə yə i nûw doʼò nəniy, i ki fyi bə̂ nə̀ ndaa aghê ki kəli mâ tsə. 27Ayiə yə mə dzîy bə̂ awò ghà a təŋə kələm, ghà ki dziy yə anə asə à zwe yiy. Ghà kwu ani niaʼa yə̀ sòʼò anə dzə̀ ì tâw yìy tə̀ ì ki foŋə zəaʼa yə anə utuw tə ndaw. Ayiə yə ghu tsoŋ dzây bə̂ â ghà, ghà kwu ni nàʼà fyi yə̀ i foŋ zaʼi yə̂ anə utuw u tə ndaw. 28Ghà kə tsəŋ dzə̀ aghû yə̀ ghu də ani wiy màʼà tsə kə gùw ùwè nə̀ ghu way ani zəŋə iyiə ì liy nə̀ fòŋ ghii. Ghà fə̂d tsəŋ yə̂ Kə̀zə̀ aŋwòə à də we ù də nəniy ani byɛbi màʼà gùw ùwè nə̀ fòŋ ghii anə uvə̀lə̀. 29Ghu ŋwùni im bè fyiè mə̀yə? Ghu waa fyè anə ŋyoŋə fə ukhiy ə? Ŋwuni fə mòʼ fìy way ani tswaʼi i dzə̀ ambvə̀d nə̀ Zə̀kiy kə̀ tsə̂m nəway. 30Ù bòʼ kwu mà ŋwoə ntàŋə̀ ŋwù t-a-tuw tə tə də nəniy anə utuw ghəli. 31Yəə i də nəniy ghii, Ghà kə tsəŋ dzə̀ fyiə kə̀ liy kiy, aŋwòə, ghà tsîy fyi ŋwô saʼ kə ŋwùni kiy.

Ghà ki dziy yə nə̀ ghà bɛmə ŋwô awò Kə̀litò

(Lukâs 12.8,9)

32Aghû yə̀ ghu kî dzìy fyiə bə̂ nə̀ ndaa awò àghè liy nə̀ ghu də aghû yam fə an-a-mvə̀dintsə, mə ki dzây yə̂ soʼò anə ndaa awò təlì wam wə ù də nəniy an-a-vələ nə̀ ghu də aghû yə̀ ghu dzwumə̀ nəniy miə. 33Wù wə̀ ù kwuni twe maʼà nəniy miə anə səkə ghù nə̀ ghe dzwumə̀ dzə̀ wày miə, mə ni twe màʼà soʼò we anə səkə təli wam wə ù də nəniy an-a-vələ.

Yesù dzày tsə nə̀ ghe kə̀ bû dzə̂ nə̀ ibvay, à kwuni də̀ utswə̂d

(Lukâs 12.51-53; 14.26,27)

34Ghà kə môʼ dzə̀ nə̀ mə fə̀ bù nə̀ ìbvay yiy si də an-a-mbvə̀dintsə, hǎy, mə bû nə̀ ùtswə̀d wìy. 35Mə bû ani zəŋi tsə tə̀ awa iŋə̀mə̀ si ŋwaa nə̀ nə̀ təli ghu yiy, awa iyiŋi si ŋwaa nə̀ nə̀ zəə ghu yiy, mə zəŋi sòʼò nə̀ aghiy wa yiy ki ŋwaa nə̀ nə̀ iŋəmə ghu yiy. 36Wù wə̀ ù dzwə nəniy nə̀ wò ù kì fyiə bə̀ kə anə isəd i ndaw yiə̀.

37Wù wə̀ ù liə tsîy fyi nəniy təli nə̀ zə̂, moo wa tsìy fyi miə, ù kə̀ kwoʼ kpe ani dòʼò tsə̀ndii awò mìə̀. 38Wù wə̀ ù də kə̀ boʼò kə kâʼ fə təzəd fə we fiy dzwùmì bə̀ mìə̀, ù kə̀ kwoʼ kpe ani dòʼò tsə̀ndii wam. 39Wù wə̀ ù tòʼò khu təŋə dzəd ani bii fyi imuə iwe ù kì nìì myàʼà ŋwò imuə̀ i we yiy. Wù wə̀ ù kwuni dziy nə̀ ghe pfə bòʼ mìə̀, ù kì kyilə dzwəŋə ŋwò imuə̀ i we yiy.

Unamə wə aghê nî kyilə nəniy

(Mâk 9.41)

40Mə ndzəmə̀ dzìy bə̀ â ghà nə̀ wù wə̀ ù ŋgwam na nəniy gha bòʼ mìə̀, aŋwòə ghà də aghû yam, ù ghî ŋgwam na sòʼò mìə̀. Wù wə̀ ù ŋgwam na nəniy miə ù ghî ŋgwam na sòʼò təli wam wə ù twum bə̂ nəniy miə. 41Wù wə̀ ù ŋgwam na nəniy wè ntwùm ə̀ Kə̀zə̀, bòʼ yəə ù də nəniy wè ntwùm ə̀ Kə̀zə̀, ù nì kyilə ŋwò ndzòʼò namə kə wè ntwùm ə̀ Kə̀zə̀ kì kilə. Wù wə̀ ù ŋgwam na nəniy wù tsitsi wiy anə sə k-a-zə̀, ù nì kyilə sòʼò ndzòʼò namə kə wù tsitsi kî kilə. 42Wù wə̀ ù nyə̀ nəniy bwàm ə̀ mwi awò gwò fə tsə̀ndii wam anə yiə yə ù də nəniy tsə̀ndii wam, ù nì ndzə̀mə̀ kyilə ŋwò namə kiy.

Currently Selected:

Matìyò 10: isu

Highlight

Copy