Matìyò 28

Yesù ə zɛ̀mə̀ dzwoŋi bə̀ anə ipfə

(Mâk 16.1-8; Lukâs 24.1-12; Dzwan 20.1-10)

1Abù tsuk fə aghě Dzû fə̀ zwaa fiy tsîy ŋwò tsə nəniy, nə̀ zwù kə utsuk kiy anə tsuk fə səsə fiy anə ivən, Mə̀li wə ù kə ŋwô bə̂ nəniy a Makdalà nə̀ Mə̀li wə ù kə də nəniy zə̂ Dzɛ̂m nə̀ Yùsə̂f, ghu ŋwò yə̀ ani zù kòʼ ìsày. 2Anə sòŋə fə ghà fə̀, mbvə̀dintsə kiy ŋwò sə̀k tsə nə̀ daʼa kiy, tsə̀ndii ì Mwe ə̀ mbyi fyi tswi bə̀ an-a-vələ bù byiŋi ŋwò tsə itay yə, dòʼò tswi tsə ate. 3Ù kə mwà tsə yəə à də̀ iwe, ndzwu tə we tiy fə̀mə̀ yəə à də̀ kədzək. 4Aghû yə̀ ghu kə kyiŋə̀ nəniy, ghu ŋwò tà tsəŋ awò ìtsəŋ yiy bvə̀ dyaŋi yə̀ ambvə̀d, yəə ghu mə pfə.

5Tsə̀ndii ə̀ Kə̀zə̀ yə̀ ə dzày yə̀ awò iyəŋi yə a ghu nə, “Ghà kə tsəŋ dzə̀! Mə kwu ŋwô nə̀ ghà khu Yesù wə̀ ghu kə ba nəniy anə kàʼ fə təzəd. 6Ù wày dzə fəə! Zə̀kìy mə zɛ̀mə̀ ŋwòə we ani ipfə anə yiə yə ù kə dzây na nəniy. Ghà bû kôʼ loʼo kə ghu kə nəŋì na nəniy ivən i we yiy ate. 7Ghà ŋwô yə̂, ghà zaŋì zû dzây yə̂ awò tsə̀təndii tə we tiy a ghu nə, ù mə zɛ̀mə̀ dzwoŋi bə̀ ani ipfə. Ù mə ŋwò isə, ù zè nəniy a Galìlî. Ghà zû nənìy awote, ghà ki kôʼ we. À yù də̀ iyiə yə Mə mə̀ bù nəniy ani bù dzày â ghà.”

8Iyəŋi yə zə̀àŋì ŋwò tsə anə isày nə̀ ghu tsəŋə ŋwò, də̀ sòʼo nə̀ dwiʼi kiy. Ghu nyəŋ zù ani zù dzày sòʼò â tsə̀təndii tə we tiy.

9Ghab kiy kə̀ kâm fyi nəway, Yesù ə màŋ bù fyi kə kə a kə̀lə̀ ghu, dzày tsə a ghu nə, “Mə tyoŋə zuw bə̀ ghà.” Ghu bù akə̀lə̀ Yesù, bvə̀ kwi yə̀ ifwe i we, fwùlì sòʼò we. 10Yesù ə dzày yə̀ a ghu nə, “Ghà kə tsəŋ dzə̀. Ghà zû dzây yə̂ awò tsə̀təndii tam tiy nə̀ ghu zû a Galìlî, ghu kî zè kòʼò mìə̀ awote.”

Aghê àkyiŋə dzày yə̀ àyiə yə a kə fyi awò ŋgəd tə aghè àlwaʼa tiy

11Abù iyəŋi yə̀ ŋwò yə̂ nəniy, sǔgôʼ tə̀ liy tiy ghu kə kyiŋə̀ nəniy isây yə̀, ghu ŋwò nyi yə̀ anə inaʼ. Ghu zù dzày yə̀ àyiə yə àdzə̀m a kə fyi nəniy awò ŋgəd tə aghè àlwaʼa tiy. 12Ŋgəd tə aghè àlwaʼa tə zù səay tsə nə̀ ŋgəd tə inaʼ tiy nə̀ ghu zwuni yə̂ sǔgôʼ tə anə ndə̀mə̀ ùkhiy, 13a dzây yə̂ a ghu nə, “Ghà ki dzây tsə nə̀, ‘Tsə̀təndii tə we tiy mâ bù tsoŋ ŋwò ivən i we yiy nə̀ ntsukə tiy nə̀ ghà bvənə ŋwò.’ 14Bəə wù wə̀ ù də nəniy tuw kiy anə mbwòʼ ù zuw tsə nəniy, ghè ki kwe yə̂ fòŋə̀ we a we nə̀ ghà kwu dzə̀ way wokiy ate, ghà ki də ndòʼò kwu way ani fyimi fôŋ təli anə iyiə ìliy yiy.”

15Sǔgôʼ tə̀ ə nìy yə̀ ukhiy u ghè wə̀, bvami fàʼ sòʼò àyiə yə aghû yə̀ kə dzây nəniy â ghu. Aghee Dzû namə dzìy tsə kə ŋwò ayiə ghè yə̀ bù fyi bə̀ zì nə̀ tsə̀təndii tə Yesù tìy kə tsoŋ ŋwò kə ivəən i Yesù.

Fàʼ kə ghù yə̀ ghu bɛmə nəniy â Yesù

(Mâk 16.14-18; Lukâs 24.36-49; Dzwan 20.19-23; Kə̀fàʼ 1.6-8)

16A tsuk fə̀ liy fiy, tsə̀təndii tə Yesù ivəm nə̀ tsə̀ndii imòʼ ə ŋwò zù anə ukàʼ u Galìlî, nə̀ Yesù maa dzày na nə̀ ghu ni zû awote. 17Abù ghu zû kòʼ tsə nəniy Yesù, ghu fwùlì we. Aghê liy anə uzə u tsə̀təndii tə̀, ghu kə kamə byɛmə dzə̂ wày nə̀ à də̀ Yesù. 18Yesù ə soŋ koŋə yə̀ akə̀lə̀ ghu, dzày tsə a ghu nə, “Zə̀kìy mə nyə̀ miə nə̀ daʼa kiy an-a-vələ, nə̀ an-a-mbvə̀dintsə. 19Ghà zû anə nàʼà tə̀dzə̀m, ghà zəŋi tsə nə̀ aghê doʼò tsə tsə̀təndii tam. Ghà nyiə̀ tsə ghu nə̀ mwi m-à-zə̀ mìy anə izəd i Təli, anə izəd i Wa, nə̀ anə izəd i Zwàykə̀zwekiy. 20Ghà tyi dê yə̂ â ghu nə̀ ghu kwu ani zəŋə ayiə yə àdzə̀m mə dzây na nəniy â ghà. Mə kî də̀ ŋwô nə̀ ghà anə sòŋə indzə̀m zù kwùm ntsuk fə mbyi nî bè mìì nəniy ate.”

Currently Selected:

Matìyò 28: isu

Highlight

Copy