Genesis 19
19
1Ka didiaymitadai oidigi xi ami dada go bïï goka tïtïañikarudï Diuxi Sodomïrï. Dai akitadï Abraam Lot tïgidukïdï sonoana daja kuuparadï go gïï kurarai ix makïdï bhaabhaki xikorhi kaatï. Ami kuuparagai abhana ibuadana ïmpaiñdaragai oidakami. Dai Lot tïï go tïtïañikarudï Diuxi dai mïï kuiki buidïrï dai biaturhi.
2—Aibïrai gin kii dai ami kokoxi— itïtïdai. —Ami abïr bakuanada gïn ïïkaso dai gïn iibhïxta. Daidi xoroko ïki bhïiya aapimï boi ïpamu— itïtïdai.
—Cho— itïtïdai go tïtïañikarudï Diuxi —No baaxi xibhï kayana kokoximu aatïmï— itïtïdai.
3Dïï gia go Lot apia aagidimi xi tïbïpikïdï bhai aa ix oidagi kiiyamu. Dai Lot gïïpi bhai dui kuadagai ïmadï pan mai biakami kopodakarui dai bhibhi.
4Mai kia koi ïgai saidi ami dada kïkïirhi Sodomïrï oidakami bïïxkatai modukai kïkïrhiodami ïmadï utu iimïdami. Dai bïï xikorhi guka ïgai kiidï Lot. 5Dai gïïgïr ijiñakimi ïgai daidi ikaitimi,
—¿Taa dudui go kïkïïrhi ix makïdï gï ïmadï dada ïkiapo? Bhaigobai busaida tïtai bïïnagi— ikaitimi ïgai.
6Dai Lot kupioko kuuparagai dai busai kidigana dai bhodïrï ïpamu kuu. 7Daidi itïtïdai ïgai go kidigana gukakïdï,
—Maiti abïr mos ïgikïdï galnaxi ibuada— itïtïdai. 8—Daiñi, mïï tukabi daraja bïï goka gin maamara oki ix makïdï mai kia ïmadï dïgabusai kïkïïrhi— itïtïdai. —Gïn tïïgidamu aanï mïxi bïïnagi— itïtïdai ïgai. —Dïï gobai gin dadidakami kïkïïrhi abïr mai oiñada. Gin dadidakami gobai dai bia aanï sïïrhikami ix nukadakagi di— itïtïdai.
9—Maigobai kïkiba— itïtïdai go kïkïïrhi kidigana gukakïdï. —No xibhïadïrï oidakami aapi dai aadïrï gïr tïanïda ïrhidi— itïtïdai. —Xibi gïïpi bamioma soi taadakamu aapi xi gobai gï dadidakami— itïtïdai.
Dai bui surhi ïgai go Lot dai karhioga daitu agaitadai go kitaagiña. 10Dïï go Diuxi tïtïañikaru ix makïdï ïr dadidakami kupioko kuuparagai dai bhïiyi go Lot dai tukabiako báí ïgai dai oton kuu go kuuparagai ïpamu. 11Bhodïrï Diuxi tïtïañikarudï mai nïnïabatu go kidigana gukakïdï. Modukai kïkïrhiodami ïmadï utu iimïdami bïïxi. Lïïchikïdï ka ibhikoñi ïgai aipako gaagaitai go kitaagiña mai nïadatai.
12Dai bhodïrï Diuxi tïtïañikarudï tïkakai go Lot xi bhai mai bia jaa aaduñdï ami Sodomïrï. Daidi itïtïdai,
—Gï agai xi bïïxi bubaidagi aapi gï aaduñi tabhiadïrï modukai gï maamara dai go kïkïïrhi ix makïdï ka aagai sai ïmadï bii agai gï maamara oki. Gï agai xi bïïxi baidakagi aapi gï aaduñi xibhïakoga mïkaxi— itïtïdai. 13—Ka xia duada ragai idi bhaabhaki ïmadï modukai go dïbïrai xako guka ïgai. Ka arhiï mui ñoki kaï gïr Nukadakami tami oidakami buidïrï mos ïï galnaxi ibuadatai ïgai. Kaxkïdï gïr otoi ïgai xi kodada aatïmï— itïtïdai.
14Dai go Lot kaïkatai gobai sai mïï aagidi ïgai go kïkïïrhi ix makïdï ka aagai sai ïmadï bii agai go maamaradï Lot.
Daidi potïtïdai ïgai,
—Otoma abïr boopoi. Ka xia duada agai Gïr Nukadakami idi bhaabhaki— itïtïdai.
—Arhiï buiruga aapi dai kaiti— itïtïdai go kïkïïrhi dai mai buaboitu.
15Bhodïrï ka xarhimi oidigi saidi Diuxi tïtïañikarudï potïtïdai go Lot,
—Obaidañi dai bubaida gï oñiga dai gï maamara. Ïma dukai koimu aapimï xïxkadï gïgïbitulda aatïmï go oidakami— itïtïdai.
16Dïï go Lot modukai mai obaimi saidi Diuxi tïtïañikaru bhïiyi ïkadï ïmadï oñigadï ïkadï dai maamaradï. Dai bhodïrï gïn bubaitu abhiadïrï daagïkai ïkadï. Soi gï ïrhi Gïr Nukadakami dai kïïgakïrï gïn bubaitu.
17Bhodïrï ka maigo gukatai ïgai saidi ïmoko go Diuxi tïtïañikaru itïtïdai,
—Otoma abïr boopoi dai kïïgakïrï bubuaki— itïtïdai. —Dai toma lachi abïr mai ajaako nïnïnda dai bïï mai gugukada tanai dïjoana. Mïï daan tutubidakiana abïr boopoi kaxkïdï tudu mai koiyagi aapimï— itïtïdai.
24Dai bhodïrï Gïr Nukadakami ami bhaabhaki dama surhi táí ïmadï asufre ami xakoga ïr Sodomïrï dai Gomorïrï. 25Bïï naato xia dodai ïgai go bhaabhaki ïgai ïmadï modukai oidakami. Dai tomarhi uxi mai bia ïgai ami dïdïjoana. 26Dai oñigadï Lot oiditadai dai aa nïnïaba. Dai ïmo ubixi onai gï naato mos aa nïnïabakai dai ka amaxi ukami bii.
Currently Selected:
Genesis 19: NTP
Highlight
Share
Copy
Want to have your highlights saved across all your devices? Sign up or sign in
Copyright: Ethnos360 Sanford, Florida
