Lukas 23

Baan gï kïïsatu go Suxi go Pilato buidïrï ix makïdï ïr ïmo dunukami romano

1Dai bhodïrï bïïxkatai go bhaitï gukakami bhïkai go Suxi abhiadïrï ïmpaiñdaragaiñdïrï dai mïï baan kïi go kaigi Pilato buidïrï. 2Dai ami gïpiïrï bupaimi ïgai daidi ikaitimi,

—Tïï aatïmï idi kïïrhi ix makïdï arhiï xixiokitudai óídakami dai pokaiti sai maiti gï agai xi tïïgidagi kuota go gïï dunukami romano. Bhakoitudai gobai go óídakami go gïï dunukami bui tudu. Dai ïkobïrakoga pokaiti gobai saidi ïr Rey dai ïr dasadï Diuxi— ikaiti go kïkïïrhi gïpiïrï bupaitai ïgai go Suxi.

3Daidi go Pilato potïtïdai go Suxi,

—¿Aapi pïxi ïr reygadï go judidiu aidï?— itïtïdai.

Dai Suxi potïtïdai,

—Podukai aba ix dukai aagai aapi— itïtïdai.

4Dai bhodïrï go Pilato aagidi go bhaitï gukakamigadï go dadaxdadami ïmadï bïïxi go gaa odami ami dai potïtïdai ïgai,

—Aanï mai tïtïgai ix Suxi ïr ïmo gïpiïrï kaatïkami— ikaiti.

5Dïï go odami bamioma gïgïr aagidi daidi potïtïdai,

—Ga mamaakai gobai aatagi bïïxi aipakoga tami Judeïrï dai abïnakidi óídakami sai bui surhigïna go gïï dunukami. Galileïrï gï aaga gamamaakaiña gobai ñoki dai xibi ka ayi gobai asta tami Jerusalenana ukami— itïtïdai.

6Dai kaïkai go Pilato ix tïtïdai go kïkïïrhi daidi gatïkakai,

—¿Galileañdïrï ix oidakami go Suxi?— itïtïdai.

7Dai go gaa potïtïdai sai ïjï, sai Galileañdïrï oidakami ïgai xako gatïanïi go dunukami Herodes Antipas tïgidukïdï. Xi kaxkïdï go Pilato potïtïdai go odami sai baidakana go Suxi amïka xako daja go Herodes. Aagidi sai Herodes ïmadï bhai buadana ïgai bhaiyoma. Ami Jerusalenïrï dakatadai go Herodes aidï.

Baan gï kïïsatu go Suxi go dunukami Herodes buidïrï

8Dai gamo bhïkai ïgai go Suxi. Dai bhai gï ïrhi go Herodes tïïgakai go Suxi. Kajiomatadai ïgai go Suxi dai ka baasïkioñdïrï abhiadïrï nïida ïrhidiña sa bhai ibuadana ïmo maaxidaragai maaxi. Kaxkïdï bhai gï ïrhi ïgai tïïgakai. 9Dai naana maaxi tïkakai ïgai go Suxi dïï gia Suxi mai aa noragi tomarhi ïmo ñoki.

10Dai ami darajatadai bhaitï gukakamigadï go dadaxdadami ïmadï go tïtïgiadami sïïrhikami dai ïgai kabami gïpiïrï bupai go Suxi. 11Dai go Herodes soi dukai tïï Suxi aidï dai go Herodes ïmadï sandadarugadï parunaitadai ïgai. Aadidi ïgai yukuxi kïï namïakami sai ïpïamaaxkana ïmo rey. Dai bhodïrï otosdi ïgai go Pilato ïpamu.

12Aidï gokïdï go Pilato ïmadï go Herodes gïn ïmagi aipakoga. Ïkioma maiti gïn oigïdaiña ïgai tudu.

Go Pilato dagito ïrhiditadai go Suxi sai imïna

13Dai bhodïrï go Pilato báí go bhaitï gukakamigadï go dadaxdadami ïmadï go gaa odami sai gïn ïmpaiñdana. Dai potïtïdai ïgai gïn ïmpaidakai,

14—Tami gin buidïrï baan kïi aapimï go Suxi pokaititai aapimï sai gobai abïnakidi go óídakami sai bui surhigïna ïgai go gïï dunukami. Dïï gia ka kaï aapimï aidïxi naana maaxi tïkakai aanï gobai tami gïn buitapi. Dai modukai mai tïï aanï soimaaxkami ïgai abhana ix makïdï aagai aapimï. 15Dai tomarhi go Herodes ïpï mai tïï soimaaxi abhana gobai. Kaxkïdï mai maa ïgai gïgïbidaragai dai bhaiyoma ïpamu bhaigobai otoi ïgai. Gobai maiti idui tomarhi ïmo soimaaxkami ixtukïdï gatïanïiñana aanï muaragai tudu. 16Kaxkïdï aagidamu aanï go sandadaru sai gïgïna ikixanaikïdï dai bhodïrï dagitomu aanï— itïtïdai.

17Dai aidï bagimiïrï biakatadai ïgai xi dagitoagi ïmo maixapikami tomax makïdï tañiagi óídakami. 18Dïï gia go óídakami bïïxkatai gïgïr iñakimi bhaiyoma daidi ikaitimi,

—Muabïrai. Ipïrhidi aatïmï ix dagito aapimï go Barabas— ikaitimi.

19Go Barabas gia ïr ïmo gamuakamikatadai dai ïgai gia abïnakidiña go odami sai bui surhigïna go gïï dunukami. Kaxkïdï gï maixakatadai ïgai.

20Dai go Pilato dagito ïrhiditadai go Suxi dai ïpamu ñokidi ïgai go odami sa bhai bhai aagana. 21Dïï gia go odami bhaiyoma gïgïr iñakimi daidi ikaiti,

—Kuruxiana abïr xixa, kuruxiana abïr xixa— ikaitiña.

22Dai go Pilato ïpamu ñokidi go odami daidi potïtïdai,

—¿Ix tuixi xixana aatïmï kuruxiana? ¿Tuma soimaaxi idui gobai?— itïtïdai. —Aanï po in ïrhidi sai maiti idui gobai soimaaxi ixtukïdï gatïanïna aanï muaragai di. Kaxkïdï gatïañimu aanï sai gï gïgïbitudana ïgai ikixanaikïdï dai bhodïrï dagitomu aanï bhaiyoma— itïtïdai.

23Dïï gia go odami apia kabamioma iñakimi dai aagidi sai kuruxiana xixana. Dai xibi gia ka bhai aa go Pilato dai ïïgidi go odami mos ïï gïgïr iñakaitai ïgai. 24Poduu bhai aa ïgai sai maaki agai gïgïbidaragai go Suxi ix dukatai táí go óídakami. 25Dai tïïgi ïgai go Suxi go óídakami saidi ibuadana ïgai ix dukatai ipïrhiadagi ïgai. Dai dagito ïgai go Barabas ix duu agaitadai go óídakami ïpï. Dai go Barabas gia ïr ïmo gamuakami. Ïgai aagidiña go odami sai bui surhigïna go gïï dunukami ïpï. Kaxkïdï gï maixakatadai ïgai.

Kuruxiana gï xixatu go Suxi

26Dai aidïxi go sandadaru ka baidakatadai ïgai go Suxi dai ka kuruxiana xixa agai sai nobai kaiyana ayi ïgai ïmo Sireñiïrï oidakami Ximuñi tïgidukami. No xibhï dïjoañdïrï imïitadai go kïïrhi dai go sandadaru bhïiyi dai daama dáí go kuruxi sai kusukana dai aagidi sai oidana ïgai go Suxi.

27Dai jaa mui odami oiditadai ïpï dai gïgïr suañimi dai iñakimi soi gïn ïrhiditai nïiditai ixdukatai gï bujimitadai go Suxi. Muidutai ïgai ïr oki 28dai aa nïnïaba go Suxi dai potïtïdai,

—Aapimï oki Jerusalenïrï óídakïdï, maiti abïr soi gïlda aapimï aanïkïdï dai bhaiyoma abïr soi gïlda ïïgi aapimïkïdï dai gïn maamarakïdï— itïtïdai.

29—Daiñi— itïtïdai. —Ayimu ixtuigako kabami soi taata agai gïn maamara. Dai aidï odami pokaitadamu sai,

Xioma bhai gïn ïrhidi oki ix makïdï mai maamara dai tomarhi ïmo imidagai mai xiitu arhi.

30 Amaxi go óídakami ipïldamu ix daama gïxiagi gigidi sai yaasana dai ka mai nïijada ïgai mos ïï bïïtïkami soi ïrhiaragai.

31Daiñi, aanï mai bia ix tuixi soimaaxi gin taatamituldagi jaa mai soimaaxi ibuadamikatai aanï dai bïïxkïrï ka nïidi aapimï ix maaxi in duñi odami. Dai ix podukai taataimi aanï ix makïdï maiti ïr soimaaxi ibuadami aidï gia xïï bamioma kabami soimaaxi taata agai ïgai ix makïdï gia ïr soimaaxi ibuadami— itïtïdai Suxi go oki aidïxi go sandadaru baidakaitadai.

32 Dai go sandadaru baidakai goka kïkïïrhi soimaaxi ibuadami ïpï dai ïmadï kodi agai go Suxi ïpï. 33Dai aïkai ïgai xako odan modïrï tïgidu sai ami xixa ïgai go Suxi kuruxiana. Dai ami jaa kukuruxiana xixa ïgai ï goka kïkïïrhi soimaaxi ibuadami ïpï dai aipadïrï tutu ïgai go Suxi.

34Dai aidïxi xixapitadai ïgai go Suxi kuruxiana sai Suxi potïtïdai Diuxi,

—Gin Oga— itïtïdai. —Oigïldañi idi odami ix makïdï pomaaxi in buididimi. Mai maatï gobai ix tumaxi buayi— itïtïdai.

Dai go sandadaru idui ïmo tïtïïbigai dai nïida agai xorai ayi agai yukuxidï go Suxi. 35Dai go odami mos guka ami nïiditai ixtuma po gï buimi. Dai asta go dudunukami parunaiña go Suxi daidi ikaitiña,

—Gobai as kïïgakïrï bubaitu jaa dai pokaiti saidi ïr Diuxi dasadï Rey dai saidi ïr ïko busaidadï Diuxi. ¿Ix ïr buaboikamudai gobai aidï gia ix tuixi mai kïïgakïrï gï busaitu gobai ïïgi?— ikaitiña dudunukami gaparunaitai.

36Dai go sandadaru parunai ïpï. Miadïrï gugukigi ïgai dai daxdi binagre sai yïïdana. 37-38Dai ami kuruxiana nagiïkatadai ïmo ojixikami daamioma go Suxi. Dai ikaiti go ojai,

IDI ÏR REGADÏ GO JUDIDIU, ikaiti go ojai.

Dai go sandadaru potïtïdaimi,

—Xi aapi kïïgakïrï ïr reygadï go judidiu, aidï gia kïïgakïrï gï busaida aapi ïïgi— itïtïdaimi.

39Dai ïmadutai go gïpiïrï bïïtïkïdï ix makïdï gïn xixatu ami kukuruxiana ïpï xigarhi dukai ñokidi go Suxi daidi potïtïdai,

—Xi aapi ïr Diuxi dasadï Rey kïïgakïrï gï busaida aapi ïïgi dai kïïgakïrï gïr bubaida aatïmï ïpï— itïtïdai.

40Dïï gia go gïmai gia mai podukai ño. Bhaiyoma bhagakarai ïgai ix makïdï xigarhi dukai ño daidi potïtïdai,

—¿Maiti pïx duadikui xi gï maakiagi Diuxi gïgïbidaragai? Daiñi, bïï baikatai aatïmï gïr maa go dunukami ï galbaaxi gïgïbidaragai di. 41Dai aanï ïmadï aapi gia gïr ajïakatadai idi gïgïbidaragai. Soimaaxi ibuadami aatïmï kaxkïdï. Dïï gia idi kïïrhi gia maiti ïr soimaaxi ibuadami. Gï agaitadai xi ïbhiadagi aapi Diuxi dai mai podukai ñokadagi— itïtïdai.

42Dai potïtïdai ïgai go Suxi,

—Gï tïgitoñi in bïïtarï dai gin oigïda xïxkadï ka bhïiyi aapi gï sïïrhikamiga Reykatai aapi— itïtïdai.

43Dai Suxi potïtïdai,

—Aanï aagai sai xibi gin ïmadï dakamu aapi tïbagiana. Dai gobai kïïga ïr buaboi— itïtïdai.

44-45Daidi tukamutu go tasai tomaxi daandukukatadai aidï dai tukapi bii oidigi asta parï baikïrï urunoko ukami. Daidi ïran sïïrhi sarai go gïï ikuxi ix makïdï go gïï kiupiana nagiïkatadai.

46Dai gïgïr iiña go Suxi dai gokiïrï potïtïdai ïgai Diuxi,

Gin Oga, itïtïdai. Gï nukaturhi aanï gin ibhïdaga, itïtïdai.

Mos potïi ïgai dai muu.

47Dai kapitañigadï go sandadaru ami darakïdï kïïga ño Diuxi bïïtarï daidi itïi,

—Agia ïr buaboi sai idi kïïrhi maiti ïr soimaaxi idukami— itïi ïgai nïiditai ixdukatai pogïduitadai.

48Dai mui odami ami gukatadai ïpï nïida ïrhiditai ixtumaxi po gï buimi. Dai ïgai kabami soi gïn ïjïldatu dai iji abhiadïrï dai ïïgi gïbimi taagidïrï soi gïn ïrhiditai. 49Dai bïïxkatai ix makïdï maatïkatadai go Suxi dai ïpï go chïki oki ix makïdï oiditadai ïgai Galileañdïrï mïkaxdïrï gukatadai dai nïidi ixtumaxi po gï buimi ïpï.

Gï yaasatu go Suxi

50-51Dai oidakatadai ïmo kïïrhi Jose tïgidukami. Kïï tuigatadai ïgai dai kïï sïïrhi ibuadana. Ïmo gabhaitïkïakamigadï ïgai go judidiu. Dai ïgai gia mai bhai aatadai aidïxi go gaa bhaitï gukakamigadï go judidiu bhai dui ñoki ix mua agai go Suxi. Arimateïrï oidakamikatadai go Jose ix makïdï Judea munisipiïrï bipiïyi. Dai kïï buaboidaitadai ïgai sai Diuxi otsa agaitadai ïmo rey sai tïanïna tami oidigi daama. 52Dai jii ïgai dai gatáí tukugadï Suxi go Pilato dai go Pilato maa oigaragai sai bhïkana. 53Dai tïbanïkai ïgai tukugadï Suxi kuruxiañdïrï sai bhixa ïmo toa ikuxikïdï. Dai ïmo tïjobiïrï tïï xako mai kia gï yaasatu ixtumaxi. 54Kaxi ïr bianaxikokatadai aidï dai karhioga ayitadai go ibhïxtaragai tasai.

55Daidi go oki ix makïdï Galileañdïrï abhiadïrï oidatukïiña go Suxi iji ïpï dai nïidi go tïjoi dai gïn tïgito nïidi ix dukatai tïï ïgai tukugadï Suxi. 56Dai bhodïrï aa surhi ïgai kaiyana dai mïï bhai dui ïgai asaiti xigian ubadami ïmadï especias ix makïdï tïkida agai tukugadï Suxi. Dai bhodïrï ka ayi go ibhïxtaragai tasai dai gïn ibhïxi ïgai ïmo tasai ix dukai aagai go sïïrhikami.

Currently Selected:

Lukas 23: NTP

Highlight

Copy