John 11

1Naŋ o tuarasei me gopa, i Lasarus ta Bethania, talo vanuan i Meri tana tasina i Martha. 2Wa i Meri ilone me urai i Lord ti mun o urai ilone, me maŋ naraŋona mun nauluna, wa i tutuana iloke we gopa. 3Wa ira tutuana me vatraŋ isei ni vet munia wa, Lord, ilo, i gene ko we tapea we gopa. 4Pa i Jesus me roŋotag, ti vet wa, O gopae iloke tete tira ape matea, nava o manigiu naleŋasin God, si Natun God ni leŋas nia. 5Wa i Jesus we tape i Martha tana i tasina ratol i Lasarus. 6Wa ni me roŋotag ape ni we gopa, pa ni qale toga o qoŋ nirua alo vatine ineia aia. 7Paso nan ti vet mura tiŋqoro wa, Nina mule kel i Judea. 8Naŋ ira tiŋqoro we vava munia wa, Vatogo, ira ta Judea me sike rigrig ti iniko si a patuŋiko, pa ko we mule mulaŋ aia. 9Naŋ i Jesus ti valuira wa, Saŋavul tuwale o numei nirua wun o masaoi alo maran tuwale? Si isei qe mulemule alo maran, ni tete tutuag, ape ni we ilo o marmararan talo marama iloke. 10Nava si isei qe mulemule alo qoŋ, ni te tutuag, ape o marmararan tagai alo lolona. 11Ni me vava tamaike; paso nan ni qara vava muneira wa, I Lasarus i pulsalanina we matur; pa na we va at si a vavaŋovia. 12Naŋ ira tiŋqoro we vet munia wa, Lord, ni ta matur te esu kel. 13Pa i Jesus me vava ape mateana; nava neira we nonom si ti vavava ape ni we matur mapsagia. 14O manigiu o ine i Jesus qara vava lue muneira wa, I Lasarus me mate. 15Wa nau we qara apen kamiu si na gate toga aia, o manigiu kam te nomtup apena; pa nava nina va at suria. 16Naŋ i Thomas, we logia si Didimus, ti vet munra tiŋqoro ra valuna wa, Nina mulaŋ a va at si a mate tuwale amaia.

17Wa i Jesus me niŋa at, pa ni qara gilala si ni me risa alo qaraŋa o qoŋ nivat veta. 18Wa Bethania arivtag a Jerusalem, o masaoi tama saŋavul tuwale o numei tavelima. 19Wa ira ta Judea we qoqo me mule veta ma sur i Martha tana i Meri si a ge masur rara ape tutuanrara. 20Wa i Martha we roŋotag apen Jesus me rasu ma, ti mule varniŋa ineia; nava i Meri qale pute alo ima. 21Naŋ i Martha ti vet mun Jesus wa, Lord, ko ta iake, tutuak tete mate. 22Wa ilokenake na we gilala apen God te le muniko o savasava ko te paere mun God apena. 23Naŋ i Jesus ti vet munia wa, Tutuama te tavaraka kel. 24Naŋ i Martha ti vet munia wa, Nau we gilala ape ni te tavaraka kel alo tavaraka kel alo paspasoane qoŋ. 25Naŋ i Jesus ti vet munia wa, Inau o tavaraka kel, wa o esu; isei qe nomtup inau, sin qe mate, pa ni te esu; 26Wa isei qe esu wa we nomtup inau, ni tete mate lai ti tuai. Ko we nomtup o ike? 27Naŋ ni we vava wa, We, Lord; nau me nomtup veta si iniko i Christ Natun God, i gene iloke we mule ma ilo marama. 28Ni me vava paso tamaike, ti vanreag, ti log roroŋo tasina i Meri, ti vet wa, I vatogo iake, wa ni we logiko at. 29Ni me roŋotag, pa ti tavaraka gaplot, ti mule suria. 30Wa i Jesus gate niŋa tiqa alo vanua; ni qale toga alo masaoi i Martha me varniŋa ineia ti aia. 31Wa ira ta Judea we pute amaia alo ima si a ge masuria, we ilo i Meri ti tavaraka gaplot ti rowolue, we tataga ineia, we nonom si ni we mule ilo qaraŋa si a taŋi aia. 32Wa i Meri me mule niŋa o vatine i Jesus aia, ti iloa, ti suragia ape raŋona, ti vet munia wa, Lord, ko ta iake, tutuak tete mate. 33Wa alo i Jesus we iloa we taŋi, wa ira ta Judea me mule tuwale ma amaia we taŋi, naatana me tatige, wa ni we lolomatikotiko; 34ti vet wa, Kamiu me saloa avea? Naŋ ineira we vet munia wa, Lord, van ma si ka ilo. 35I Jesus me taŋi. 36Naŋ ira ta Judea we vava wa, Ilo, ni me tape tama avea ineia. 37Naŋ o tuanira me vet wa, I gene iloke me ge lik namatansei me pei ti; ni gate mana wun si a kearag o matea nan o tanun mulaŋ iloke? 38Wa naatan Jesus me tatige aneane, wa ni we mule niŋa o qaraŋa. O lia ilone, wa o vat me pute apena. 39Naŋ i Jesus wa, Lareag o vat. Naŋ i Martha, tutuan i gene me mate, ti vet munia wa, Lord, ni me puna veta; ape naqoŋina me vat veta. 40Naŋ i Jesus ti vet munia wa, Nau gate vava muniko wa, Si ko qe nomtup, ko te ilo moma naleŋasin God? 41Manigiu ilone neira we lareag o vatu. Wa i Jesus me ate kalo namatana, ti vet wa, Mama, nau we vareaniko apeniko me tiŋqoro inau. 42Wa nau me gilala si ko we tiŋqoro vagae inau; pa na me vava o manigiu o sul we tira waliog iake, si neira a nomtup si ko me vatraŋ nau ma. 43Ni me vava tamaike, paso nan ti awoawo mun o liŋai we poa wa, Lasarus, rowolue ma. 44Wa o tamate me rowolue ma, me vivis goro napanena wa naraŋona mun o siopa talo qaraŋ tamate, wa me vivis goro nanagona mun o siopa maŋmaŋ. Naŋ i Jesus ti vet muneira wa, Ulia, ukegia ni mule.

45Wa ira ta Judea we qoqo me mule veta ti sur i Meri, we sagsagarag mora o gagapalag mon Jesus, pa we nomtupua. 46Nava o tuanira we mule at sur ira Pharise, we gaganag muneira ape gagapalag ŋaŋ i Jesus me ge ti.

47O manigiu o ine ira oloolo liwoa tara Pharise we gora tuwale o vavtig veveg, we vava wa, Nina we ge o sava, ape i gene iloke we ge o vaglala ŋaŋ we qoqo? 48Si nina qe ukeg mamasa ineia tamaike, o tanun nol ŋaŋ te nomtupua, wa ira ta Rom te van ma te lareag natanonina wa o sul ananina. 49Naŋ i tuara tamaira, i Kaiaphas i moe oloolo alo tau ilone, me vava wa, Kamiu gate gilala ran; 50wa kamiu gate nonom vaglala si iloke we piriŋ mantag kamiu si o tanun tuwale te mate leas o sul, wa o sul nol ananina tete tagea apena. 51Pa ni gate vava matapuna tamaike: pa ineia i moe oloolo alo tau ilone, wa ni we ligog apen Jesus sin te mate ape sul; 52wa gate ape sul ilone i tuwale, pa sin vile tuwale mulaŋ gina ira merein God me salsaleŋa ti. 53O manigiu ilone nan o qoŋ ilone neira me varsikesike si a ge mateia.

54O manigiu o ine i Jesus gate mule kelkel mulaŋ alo maea alo vatitnara ta Judea, pa ni me toa ilo vatine arivtag o vanua vanameag, ilo laqlaqe vanua we log si Ephraim, wa tara tiŋqoro me toga galtag aia. 55Wa o rowolagau nora ta Judea me rasu ma; wa ineira we tar me mule kalo i Jerusalem nan o vanua ŋaŋ, alo o rowolagau gate noga tiqa, si a ge wenewene kelura. 56Wa ineira me sike i Jesus, we varvava alo ineira we tira alo tinesara we roŋo wa, O sava kam we nonom? Ni tete mule ma wun ape lakalaka? 57Pa ira oloolo liwoa tara Pharise me vatraŋ veta si isei qe gilala si ineia avea, ni gaganag lue, si neira a tauria.

Currently Selected:

John 11: MOTA

Highlight

Copy