John 17
17
1Naŋ i Jesus me vava paso tamaike, ti ate kalo namatana ivunana ti vet wa, Mama, o masao qoŋ me noga; ka ge ronoga i Natuma si i Natuma a ge ronoga iniko. 2Tama ko me vasoal ma o mana munia goro o visogoi nol, sin te la o esu galava mun o savasava ŋaŋ ko me la munia. 3Wa iloke o esu galava, si neira a lolomaran iniko God tuwale wora, wa i gene ko me vatraŋia, i Jesus Christ. 4Na me ge ronoga iniko alalaŋana; na me ge qet o gagapalag ko me la ma ti munau si na ge. 5Wa ilokenake, Mama, ka ge ronoga inau amaiko mun o ronoga na me la amaiko alo gate qeteg tiqa o marama. 6Na me ge ŋaŋalue nasasama mun o tanun ŋaŋ ko me la ma ti munau nan o marama; ineira ira gene anama, wa ko me le ineira ma munau; wa neira me kokor mom o vavae. 7Ineira we lolomaran ilokenake si o savasava ŋaŋ ko me la ma munau we rowolue ma amaiko. 8Ape nau me la at muneira o vavae ŋaŋ ko me la ma ti munau; wa neira me la, wa me lolomaran nun ape nau me van lue ma amaiko, wa ineira me nomtup ape ko me vatraŋ nau ma. 9Nau we paere apeneira; nau gate paere ape marama, nava ape neira ko me la ma munau, ape neira ira gene anama. 10Wa nok o gene ŋaŋ anoma nol, wa nom o gene ŋaŋ nol anok; wa na we ronoga alo ilone ŋaŋ. 11Wa inau gate toga mulaŋ aŋaisa alo marama, wa iragai ŋaŋ iloke alo marama, wa inau we mule suriko. Mama we roŋo, ka matagisgis goro alo sasama iragai ko me la ma munau, si neira a tuwale, tama inarua tuwale. 12Alo inau me toga amaira, na me matagisgis goro alo sasama iragai ko me la ma ti munau; nau me tur goro neira, wa isei nan neira gate tagea, nava o nat tagea gina magesena; si o raverave te tira apena. 13Pa ilokenake na we mule suriko; wa na we vava tamaike alo marama, si neira a la mora nok o malakalaka we ura ran alo lolora. 14Nau me la at muneira nom o vavae, wa o marama me ŋustupura, ape neira gate talo marama, tama inau gate talo marama. 15Na gate paere si ka lareag neira nan o marama, pa si ka matagisgis gorora nan o ganganor. 16Ineira gate talo marama, tama inau gate talo marama. 17Ka ge roŋo ineira alo nun; mom o vavae o nun. 18Tama ko me vatraŋ nau ma ilo marama, tamaine gina nau me vatraŋ neira at ilo marama. 19Wa nau we ge roŋo kel nau o manigiu ineira, si neira a qeteg roŋo mora alo nun. 20Pa na gate paere ape neira magesera, nava ape rasei mulaŋ we nomtup nau mun nor o vavae; 21si neira nol a tuwale; tama iniko, Mama, alo inau wa inau alo iniko, si ineira a tuwale alo narua; si o marama te nomtup ape ko me vatraŋ nau ma. 22Wa na me le muneira o leŋas ilone ko me le ma ti munau; si neira a tuwale, tama inarua tuwale; 23inau alo ineira, wa iniko alo inau, si neira a qeteg taurmate tuwale ran, wa si o marama a lolomaran ape ko me vatraŋ nau ma, wa me tape ineira, tama ko me tape inau. 24Mama, na we maros irasei ko me le ma munau neira toga mulaŋ mora avea nau we toga aia; si neira a sagarag naleŋasik ko me le ma munau; ape ko me tape inau alo gate map o sagere marama ma. 25Mama taniniga, o marama gate lolomaraniko, nava na me lolomaraniko, wa iloke ŋaŋ me lolomaran ape ko me vatraŋ nau ma. 26Wa na me ge ŋaŋalue nasasama muneira, wa na te qale ge ŋaŋalue; si o tapeva ko me tape inau nia ni toga alo ineira, wa inau alo ineira.
Currently Selected:
John 17: MOTA
Highlight
Share
Copy
Want to have your highlights saved across all your devices? Sign up or sign in
New Testament was published by the British and Foreign Bible Society in 1931.
