Luk 13
13
1Naŋ o tuaniu aia alo qoŋ nane ilone we gaganag munia ape ra ta Galilea, i Pilat me lor tuwale nanarara mun nor o gene oloolo. 2Naŋ i Jesus me valuira, we vet wa, Kamiu we nonom si ra ta Galilea ilone me ganganor sal ra ta Galilea nol, ape neira me roŋovivtig tamaine? 3Na we vava mun kamiu wa, Tagai nan: pa si kam ta tete nom leas, kamiu nol te tagea ran gese tamaine. 4Si o tanun ilone saŋavul tuwale o numei laveatol, o saloima a Siloam me masu avunara, me qisaŋ matemate neira, kamiu we nonom si o pug avunara sal o tanun nol we toga a Jerusalem? 5Na we vava mun kamiu wa, Tagai nan: pa si kam ta tete nomleas, kamiu nol te tagea ran gese tamaine.
6Wa ni me vava tenegag tamaike; Pulan o tuara tanun o fig me riv ti alo non o tuqe vine; wa ni me mule ma sin sike o woai apena, panava gate sike suar. 7Naŋ ni me vava mun i gene we ilogoro vine wa, Ilo, o tau nitol nake nau me mule ma we sikesike o woai ape fig iloke, panava na gate ilo qalo; tara savrag reag: ape sa mulaŋ we ge o tano sin maraŋ? 8Naŋ neia we valuia wa, Lord, ni toga galtag alo tau iloke mulaŋ, nau gai gil waliog wa we tavig peteŋ mun o masoko. 9Wa ta uwa apena aŋaisa, we wia: pa si ta tagai, ko qara tara savrag reag.
10Wa ni me vatogo alo tuara ima siwo tuwale alo qoŋ mapsag. 11Wa ilo, o vavine aia o vui ge mageregere amaia, o tau saŋavul tuwale o numei laveatol veta, we ser taqataqa, wa gate tototoepe tea. 12Naŋ i Jesus me iloa, me logia ma, we vava munia wa, Vavine, me mamasug veta iniko nan nom o mageregere. 13Wa ni me taŋovia: wa ni me totoepe gaplot kel, wa ni me log ronoga God. 14Wa o moe tanun goro o ima siwo tuwale me valui goro, me lologagara ti apen i Jesus teve ge esu alo qoŋ mapsag, ti vet mun o sul wa, O qoŋ laveatea apena te gagapalag lai alolona, alo qoŋ ŋaŋ ilone tur mule ma si a ge esu kamiu, panava turpea alo qoŋ mapsag. 15Nava i Lord me valui goroa, ti vet wa, Ra sokoi goro, valsei amen kamiu gate ul pulan o kau si pulan o ass nan o tano ganagana alo qoŋ mapsag, gate lavia at ilo pei? 16Pa o tavine iloke, natun Abraham, i Satan me rotia, ilo, o tau saŋavul tuwale o numei laveatol veta, gate wia si a ul o garotrot iloke nania alo qoŋ mapsag? 17Wa alo we vava tamaike ira tavtavalina ŋaŋ naapera me maragai: wa o sul nol we malakalaka ape gene ŋaŋ we ronoga ni me ge.
18Pa naŋ ni me vava wa, O marana non God we sasarita ape sava? wa na te tenegag apena si o sava? 19We tam o siv mustard o tanun me la, me riv alo tuqena; naŋ me totou, me qeteg tangae liwoa, wa o manu talo maea we anig pata alo waŋwaŋarana. 20Wa ni me vava mulaŋ wa, Na te tenegag ape marana non God si o sava? 21We tam o leven, o tavine me le, me vatŋorag alo wumeto flour nitol, gai lolog leven nia.
22Naŋ alo non o vanoga ni me sir vanua val vutre vanua, we vatvatogo we kalokalo taso i Jerusalem. 23Wa o tuarasei me vava munia wa, Lord, iragai te esu aŋaisa, neira o tapai? Naŋ ni we vet muneira wa, 24Tur gagapalag lalaktera si a kalo pata ilo mategeara mantagai: ape na we vava mun kamiu wa, We qoqo te sike si a kalo pata, pa tete lai. 25Alo masaoi o tagiima qe tavaraka, wa qe tipag goro o mateima, wa kamiu we tira raka avarea, we niŋniŋ ape mateima, we vava wa, Lord, Lord, ka waka mun kamam; naŋ ni te valui te vet wa, Nau gate gilala kamiu mavea. 26Naŋ alo ilone ikamiu te vava raka wa si, Kamam me ganagana me imaima ape nagoma, wa ko me vatvatogo alo matesalamam. 27Pa ni te vava wa, Nau we gaganag mun kamiu wa, Na gate gilala kamiu mavea; tur toa reag nan nau ragai nol we gagapalag ganganor. 28O areare aia wa o garagara ŋiŋiŋ, alo kam we ilo i Abraham tana Isaak, ratol Jakob, tara o vavtig prophet nol, alo marana non God, pa we tuqerag lue kamiu ivarea. 29Wa neira te mule ma ape tano rowone loa, ape tano tulne loa, wa i vano, wa i sage, wa neira te pute siwo alo marana non God. 30Wa, ilo ma, o tuan rasei a tagir pa te moai aŋaisa, wa o tuan rasei me moai ti pa te tagir aŋaisa.
31Naŋ alo masao qoŋ nane ilone o tuan Pharise me mule ma, we vava munia wa, Rowo lue reag, van at nan o vatuke: apen i Herod we maros we ge mateiko. 32Naŋ ni me vava mun neira wa, Tur va at momiu, tur gaganag mun o fox ilone wa, Ilo ma, na te vasaug ti o vui we tatas ŋaŋ, na te ge esu ti ira gopae a qarig a maran, wa alo qoŋ vatoliu te ge taurmate vunvun inau. 33Panava, a qarig, a maran, a risa, namok ran si na qale mulemule: o manigiu o prophet tete mate asau lai nan o Jerusalem. 34Gai Jerusalem, Jerusalem, we ge matemate ira prophet ŋaŋ, wa we patpatuŋ irasei me vatraŋ ma ti suria! vagavisa, gai, na me maros mok si na vile tuwale ira mermereima, tama o toa ra tur nanatuna alalaŋe panena, pa kamiu gate maros! 35Ilo ma, me tivtag mun kamiu naimamiu we wou; wa na we vava mun kamiu wa, Kamiu tete ilo mulaŋ nau, kamiu gai vava si, Tur wievavae i gene we mule ma alo sasan Lord.
Currently Selected:
Luk 13: MOTA
Highlight
Share
Copy
Want to have your highlights saved across all your devices? Sign up or sign in
New Testament was published by the British and Foreign Bible Society in 1931.
