Luk 4

1Wa i Jesus ti uravag o Vui we Roŋo, ti kel ma nan Jordan, wa o Vui ti vanogagia alo vanua vanameag o qoŋ saŋavul vat, 2i Satan we gale iloa aia. Wa alo qoŋ ŋaŋ ilone ni gate gana ilo o sava, wa me paso ŋaŋ qara maliŋsala. 3Naŋ i Satan ti vava munia wa, Si ko ta Natun God, ka vatraŋ o vat iloke ni ris bread nia. 4Naŋ i Jesus we valui goroa wa, Me rave veta si, O tanun tete esu mun o bread vires, nava mun o val vavae ŋaŋ amon God. 5Paso nan, ti lav kaloa avune salo tauwe, ti gaganag pit mot munia o marana ŋaŋ a marama. 6Naŋ i Satan we vava munia wa, Na te le at muniko o mana nol iloke, wa o ronoga apena; ape me ukeg veta ma munau, wa na te le munsei nau qe marosia. 7O manigiu ilone si ko ta vatieqau goro nanagok, te noma nol apena. 8Naŋ i Jesus we valui we vet munia wa, Ka toa ape kulak, Satan, ape me rave veta wa, Ko te vatieqau goro i Lord God iniko, wa ko te mawui goroa magesena. 9Paso nan ti lav sagea i Jerusalem, ti vatur ineia avune ŋorŋori ima we roŋo, ti vava munia wa, Si ko ta Natun God, ka rowo sur iake. 10Ape me rave veta was,

Ni te vatraŋ ira angel anana apeniko neira kokor goro mantagiko:

11Wa mulaŋ,

Alo panera neira te sapan kalo ko,

Nan ko wa tika taso wun naraŋoma ape vat.

12Naŋ i Jesus me valui goro we vet munia wa, Me vava veta ti, Ko tete meregale i Lord God iniko. 13Naŋ i Satan me gale iloa nol paso, me toa galean nania.

14Naŋ i Jesus me kel at i Galilea mun o mana non o Vui we Roŋo; wa narorona ti gao lue alo vanua nol ilone wawaliog. 15Naŋ ni me vatvatogora alo ima siwo tuwale ŋaŋ tamaira, wa ineira nol me sotalia.

16Wa ni me mule niŋa o Nasaret, me tokos poa ineia ti aia: wa ni me mule pata tama naliŋana nane ilo ima siwo tuwale alo qoŋ mapsag, wa ti tavaraka sin vasogo. 17Wa me le munia o raverave amon Isaia o prophet. Wa ni me lil o raverave me ilo suar o masaoi me rave aia was,

18O Vui non Lord avunak,

Ape ni me urai nau si na gaganag o lea we wia mun ra masara ŋaŋ:

Ni me vatraŋ nau ma si na toto vivtig nan ira toqe manoanoa,

Si na maŋasag o ulsag mun ra gene wosag, wa o iloilo kel mun ra matapei,

Wa si na ul kel mamasugira we pepepemera,

19Si na maŋasag lue nataun Lord o tangemarmaros.

20Wa ni me luqe goro kel o raverave me la kel mun i gagapalag, ti pute siwo. Wa namatara nol alo ima siwo tuwale we sagsagaragia. 21Naŋ ni me vava raka mun neira wa, Anaqarig o raverave iloke me rowo tira ran alo qoromiu. 22Wa neira nol me gaganag ulul ape neia, wa we mamakei ape vave sogov ŋaŋ we rowo lue nan navalana, we vet wa, Gate natun i Joseph iloke? 23Naŋ ni me vava mun neira wa, Pa kam te vava ran mun nau o vavae tenegag iloke wa, Gismana, ka ge esu kelu ko: o savasava ŋaŋ kamam me roŋotag si me ge veta ti a Kapernaum, ka ge mulaŋ gai iake alo tur vanuama. 24Naŋ ni me vet wa, We nun inau we vava mun kamiu wa, Tete lavlav vasgot tea o prophet alo tur vanuana. 25Nava we nun nau we vava mun kamiu wa, O naro we qoqo amaira Israel alo qoŋin i Elia, alo me pala goro o tuka o tau nitol wa o vula laveatea, wa o maro liwoa we ge lolovag o vanua. 26Wa gate suware i Elia sur sei tuwale amaira, nava i Sarepta alo vanua Sidon sur o tavine aia o naro. 27Wa o resresmavin we qoqo amaira Israel alo taun i Elisa o prophet: pa gate mawo ran i tuwale amaira, panava i Naaman ta Suria magesena. 28Naŋ neira nol alo ima siwo tuwale me roŋotag ape ine, we toqosag o lologagara; 29wa me tavaraka, me vure savragia nan o laqlaqe vanua, me vanogagia i mate nua, me taur navanuara ti aia, si neira a sargag valiliugia. 30Pa ni me rowo lue alo vatitnara, me vano.

31Wa ni me taqel siwo i Kapernaum o laqlaqe vanua takele Galilea. Wa ni we vatogora alo qoŋ mapsag. 32Wa neira me mamakei ape lea vatogoa anona, ape non o vavae we mana. 33Naŋ alo ima siwo tuwale ilone o tanun aia o vui gagavu amaia, wa ni we awo raka mun o liŋai we poa, 34ti vet wa; Awo, o sava amen kamam wa amaiko, Jesus ta Nasaret? ko me mule ma si a ge tagea kamam? Inau we gilala iniko isei, i Roŋo anan God. 35Wa i Jesus me ŋorov goroa, ti vet wa, Toga roroŋo, rowolue nania. Wa o vui ilone me virgagia alo vatitnara, me rowolue nania, gate ge tatasia. 36Wa o mamakei me ge aneanera, wa neira we varvava vires neira wa, O sava vavae gai iloke, ape mun o liŋe liwoa goro wa o mana ni we vatraŋ o vui gagavu ŋaŋ, wa neira we rowolue. 37Wa narorona me gao lue alo val vanua wawaliog.

38Wa ni me tavaraka, ti rowolue nan o ima siwo tuwale, ti kalo pata lele iman Simon. Wa iro qalgan Simon o gopae tutunsag we poa me qaloa; naŋ neira me paere munia ape neia. 39Wa ni me tira peteŋ avunana, ti gatogoro o gopae tutunsag, wa me saru nania; wa ni me tavaraka gaplot, ti lapasag muneira.

40Wa alo loa ti rororo, ineira nol ira val gopae we seasea amaira we takira ma suria, wa ni me taŋov valval neira, ti ge esura. 41Wa o vui we tatas ŋaŋ me rowo lue nan neira we qoqo, ti awo eleele, ti vava wa, Iniko gai i Christ, Natun God. Wa ni me ŋorov gorora, gate maukegira si a vava, ape neira we gilala veta si neia i Christ.

42Wa me maran ni me va lue, ti mule ilo masao vanua vanameag, wa o sul me sike tataga ineia, wa me mule niŋa ineia, we taqtaqar goroa sin wa toavtag neira. 43Nava ni we vet mun neira wa, Namok ran si na gaganag o lea we wia ape marana non God alo laqlaqe vanua ŋaŋ we sea mulaŋ, ape me vatraŋ nau ma o manigiu ilone. 44Wa ni me toretore goro segao alo ima siwo tuwale ŋaŋ a Galilea.

Currently Selected:

Luk 4: MOTA

Highlight

Copy