Luk 8

1Naŋ galewora me ge tamaike, ni we tatatale val laqlaqe vanua, wa val vutre vanua, ti toretore wa ti gaganag o lea we wia ape marana non God, wa ira numei nirua amaia. 2Wa o tuan vavine, me ge esura ti we tuai nan o vui gagavu, wa nan o gopae, i Meri nake we log si i Magdalene, o vui we tatas lavearua me rowolue ti nania, 3tana i Joana rasoan i Kousa i gene we ilogoro naiman i Herod, ratol i Susana, wa we qoqo we sea we tataga suria mun pulara o savasava.

4Wa o sul we qoqo me vug tuwale, wa we gogorag ma val laqlaqe vanua suria, ni me vet mun o vavae tenegag wa: 5I gene we savsavur me sage sin savur non o sivui: wa alo ni we savsavur, o tuan sivui me mamas a pan matesala, wa me vano vara, wa o manu tavunana me gana qet. 6Wa o tuaniu me mamas avune vat, ti totou sage, qara korkor, ape mulemule tagai. 7Wa o tuaniu me mamas ilo vatitne molmol ŋaŋ, wa o mol ŋaŋ me sug raka tuwale, me gis goro. 8Wa o tuaniu me mamas ilo matai tano, ti totou sage, ti uwa vaga melnol. Naŋ ni we vava tamaike ti vava eleele wa, Isei naqorona apena sin roŋotag, ni roŋotag nia.

9Wa ira tiŋqoro anana me varusia wa, O vavae tenegag iloke te tama avea? 10Naŋ neia wa, Me sogov mun kamiu si a gilala o gene vagis ŋaŋ tape marana non God, panava mun ragai we sea mun o vavae tenegag; manigiu neira te ilo wa tete ilo apena, wa te roŋotag wa tete lolomaran. 11Pa o vava tenegag tamaike: o sivui o vavae mon God. 12Ilone ŋaŋ a pan matesala irasei we roŋotag; paso nan, i Satan ti mule ma, ti wosag o vavae nan natoqara, nan neira wa nomtup wa esu apena. 13Wa ilone ŋaŋ avune vat, irasei we roŋotag, qara lav malakalaka mora o vavae, panava amaira iloke o gariu tagai apena, wa we nomtup galean, panava alo qoŋ galea we asau kel. 14Wa ilone me masu ilo vatitne molmol ŋaŋ, irasei me roŋotag veta, qara gisraka mora, wa o gene valeŋai, wa o tar valeŋaleŋa, wa o gene ŋaŋ talo marama iloke te malakalaka apena, we gis gorora pa te takolalate gese. 15Wa ilone alo matai tano, tama rasei we roŋotag mun o matai toqai we wia, paso nan qara taur mora o vavae wa we uwa qet o woai mun o roŋo malumuaga.

16Wa tagai o tanun we tiu o pul qara vataqav goro mun o wumeto, si we map alalaŋe tano epa; panava we vatira alo tano pul si irasei qe mule pata te ilo mora o valawar. 17Ape gate vatŋorag ilo o sava, pa was te sese lue aŋaisa; wa gate liŋarag o sava, pa was te gilala lai aŋaisa, wa te rowolue ilo maea. 18O manigiu o ine, tur ilo goro kamiu we roŋroŋotag gasgasei: ape valsei qe taur mona, te vasoal ma munia; wa valsei gate taur mona, te lareag kel nania o gene tama si ni me la ti.

19Naŋ i ravevena tara tasina me mule ma suria, wa gate peteŋ laia ape sul. 20Pa me gaganag munia wa, Ravevema tara tasima we tira avarea, we maros we ilo ko. 21Nava ni me valui gorora, we vet muneira wa, I ravevek wa ratasik ŋaŋ iloke, irasei we roŋotag o vavae mon God wa we ge tataga.

22Naŋ me ge alo tuara qoŋ iloke ni me vega kalo vawo aka tara ra tiŋqoro anana; pa ti vet mun neira wa, Nina levegao i tavala qilo. Wa neira me tikarag. 23Wa alo gamova ni me maturu, wa o siwo me siwo ma ilo qilo, wa o aka ti urauravag o pei, wa neira we vagona apena. 24Naŋ neira me peteŋia, we vavaŋovia, we vava wa, Vatogo, vatogo, inina we mate nake. Naŋ ni me tavaraka me ŋorov goro o laŋ wa o rep pei we taoraora, wa rara we mot apena, wa qara taro popo. 25Naŋ ni me vava mun neira wa, Avea nomiu o nomtup? Wa neira me mamakei gogolo we varvava wa, O sava tanun gai iloke? ape ni we gatogoro o laŋ wa o pei, wa rara we roŋotagia gegese.

26Naŋ me gamo niŋa navanuara ta Gadara, we sar taniniga Galilea. 27Wa ni me siwo sur salilina, o tuara tanun talo laqlaqe vanua me varniŋa neia, o vui we tatas ŋaŋ we toga amaia, wa we tuai ran ma ni gate saru o siopa, wa ni gate togatoga alo ima tea, nava alo qaraŋ tamate ŋaŋ. 28Wa ni me ilo i Jesus, ti awo eleele, ti suragia ape nagona, ti vava mun o liŋai we poa wa, O sava amaiko wa amen nau, Jesus, Natun God i Eleele? nau we paere muniko, nipea gege rarakut inau. 29Ape ni me vatraŋ o vui gagavu ni rowo lue nan o tanun. Manigiu o vui ilone me ravea vaga qoqo ti, pa neira me rotrotia mun o taltalai wa mun o gae ape raŋona wa we matagisgis goroa, pa ni me kekerag mot o taltalai, wa o vui ti vasaleagia ilo vanua vanameag. 30Naŋ i Jesus me varusia wa, Nasasama isei? Naŋ neia wa, I Legion; ape o vui we qoqo me mule pata ilo ineia. 31Wa neira me paere munia, wa vatraŋ savragira ilo qaraŋa o kere tagai. 32Pa o vavtig qoe we qoqo we susula aia vawo tauwe, wa ineira iloke me paere munia ni maukegira si neira mule pata ilo gene ŋaŋ iloke. Naŋ ni me maukegira. 33Wa o vui we tatas ŋaŋ me rowo lue nan o tanun, me mule pata ilo qoe ŋaŋ: wa o vavtig qoe me tagora sasariaeae alo tutŋe tauwe ilone ilo qilo, me maumauwora. 34Wa ira vaŋvaŋanira me ilo o sava me ge ti, neira me totoa we sororo alo laqlaqe vanua wa a tag taia. 35Naŋ ragai me rowolue ma si a ilo o sava me ge ti, wa we mule niŋa i Jesus, we ilo o tanun o vui we tatas ŋaŋ me rowolue ti nania, we pute, me saru kel o siopa, we lolomaran kel, peteŋ naraŋon Jesus, wa neira we gogolo. 36Wa iragai me ilo we gaganag mun neira ape me ge esu gasei i gene o vui we tatas me toga ti amaia. 37Wa o sul nol ira tagvanuara ta Gadara wawaliog me paere munia sin vareag nan neira, ape gogolo liwoa me lavira: naŋ ni me vega kalo vawo aka, me kel. 38Nava o tanun o vui we tatas ŋaŋ me rowolue ti nania, me paere munia sin toga tuwale amaia, nava ni me ukeg savragia, we vava wa, 39Ka kel ilo imama, ka gaganag lue o gene we mava tama avea God me ge ti muniko. Naŋ ni me mule, ti maŋmaŋasag alo vanua nol o gene we mava ilone i Jesus me ge ti munia.

40Wa i Jesus me kel, wa o sul me lav malakalaka ineia, ape neira nol me toga nerei neia ti. 41Wa ilo, o tanun nasasana i Jairus me mule ma, neia o moai goro o ima siwo tuwale; wa ti suragia ape raŋon Jesus, ti paere munia sin mule ilo imana. 42Ape natuna amaia o malamala o wotuwale, natauna tama saŋavul tuwale o numei nirua; wa ineia iloke si te mate. Wa alo vanoga o sul we vapipiŋia.

43Naŋ o tavine o nara laqelaqe me ge ineia o tau saŋavul tuwale o numei nirua veta, me vile qet pulan o savasava ni te esuesu nia munra gismana ŋaŋ, panava isei gate ge esua lai tea. 44Naŋ ni me mule peteŋ nakulan i Jesus, me taŋo retret ape non o golgolo siopa: wa o nara laqelaqe me mot gaplot. 45Wa i Jesus we vava wa, Isei ilone me taŋo nau? Wa o sul me leasag vitag, naŋ i Peter tara ragai amaia wa, Vatogo, o sul we vapipipiŋiko, wa we variririko, wa ko we vava wa, Isei me taŋo nau? 46Naŋ i Jesus wa, Isei me taŋo inau ti: ape nau me roŋotag o mana we rowolue nan nau. 47Wa o vavine we gilala sin tete liŋarag lai, we mule rerere ma, ti suragia ape nagona, ti gaganag munia alo nago sul nol o manigiu o sava ni me taŋoa, wa me ge esua gaplot gasavai. 48Naŋ ni me vava munia wa, Natuk, ka sov naapema; nom o nomtup me ge esu ko, mule tamata at.

49Naŋ alo ni qale vavava, isei me mule ma nan naiman i moai goro o ima siwo tuwale, ti vet munia wa, Natuma me mate veta, nipea anumag i Vatogo. 50Nava i Jesus me roŋotag, ti valuia wa, Nipea gogolo, ka nomtup mamasa gai, wa te vaesua. 51Wa ni me niŋa o ima, gate vano ukeg isei ni mule pata amaia, nava i Peter, wa i John, wa i James, wa i taman o malamala tana ravevena. 52Wa neira nol we taŋtaŋ wa we ruruŋtap ape neia; nava ni we vet si, Turpea taŋtaŋ, ni gate mate, pa we maturu. 53Wa neira me maraesagia, ape neira we gilala si ni me mate veta. 54Nava ni me vure lue neira nol i varea, we taur napanena ti log, ti vet wa, Malamala, tavaraka. 55Wa naatana me kel ma, wa ni me tavaraka gaplot: wa ni me vatraŋ neira si a la o sinaga munia. 56Wa i tamana tana ravevena we mamakei lava; pa ni me gatogoro rara nan wa gaganag munsei o sava me ge ti.

Currently Selected:

Luk 8: MOTA

Highlight

Copy