Mathew 11
11
1Naŋ me ge tamaike, i Jesus me vareg paso munra tiŋqoro anana o numei nirua, ni me rowolue nan o vatine si a vatogo wa si a toretore goro alo vanuara ŋaŋ.
2Naŋ i John we roŋotag alo ima rotrot o gagapalag ŋaŋ namon i Christ, ti suware at ira tiŋqoro anana, 3ti varusia wa, Iniko i gene wasi te mule ma, si kamam te qale nerei isei we sea? 4Naŋ i Jesus we valui gorora wa, Tur mule, tur gaganag kel mun John o sava ŋaŋ kamurua me roŋotag wa me ilo ti. 5Wasi ira matapei we ilo kel, wa ira qages we tatatale, ira resresmavin we wenewene kel, ira qorowono we roŋroŋotag, wa ira mate we tavaraka kel, wa we gaganag o lea we wia mun ra masara ŋaŋ. 6Wa tur wia isei qe tete tutuag ilo ape nau. 7Wa irara me mule at, i Jesus me qeteg we vava mun o sul apen John wa, O sava kam me mule lue at ilo vanua vanameag si a sagarag? O togo we magmagoa ape laŋ? 8Pa o sava kamiu me mule at si a ilo? O tanun me saru goroa mun o siopa malumlum? Ilo, iragai we saru gorora mun o siopa malumlum we togatoga alo imara maranaga. 9Pa o sava kam me mule at si a ilo? O prophet? Uwe, na we vava mun kamiu wa, we raka sage nan o prophet. 10Pa iloke neia me rave ape neia wa,
Ilo, na we suware moai goro nanagoma nasalak,
Wa ni te wurvag namatesalama muniko.
11We nun na we vava mun kamiu wa, Gate tavaraka tiqa amaira wota amen o vavine isei we liwoa nan i John i Vasugroŋo; nava isei we mantagai aneane alo marana tavunana we liwoa nania.
12Pa nan naqoŋin i John i Vasugroŋo gai niŋa ilokenake ti ge vavakae ape marana tavunana, wa ra vavakae we woswosagia gese. 13Ape ira prophet wa o lea me ligoligog ran ma niŋa i John. 14Wa si kam we maros we lav momiu iloke, Ineia iloke i Elia wasi te mule ma. 15Isei naqorona apena, ni roŋotag nia. 16Pa na te ge tenegag o taraŋiu iloke mun o sava? We tama o reremera ŋaŋ we pute alo sare wolwol wa we loglog vano mun ra valura, 17we vet wa, Kamam me gege o vigo mun kamiu, wa kamiu gate sawa goro; kamam me ruruŋtap mun kamiu wa kamiu gate tuttut goro navaramiu. 18Apen i John me mule ma, ni gate ganagana ni gate imaima, wa neira we vet si o vui we tatas amaia. 19Pa i Nat tanun we mule ma we ganagana we imaima; naŋ neira wa, Ilo, o man sinaga, o man woawoana, pulsalan ira rowoagtalsom tara ganganor. Pa ira nat lolomaran we veveg taniniga o lolomaran.
20Naŋ ti qeteg raka we gol amen o vanua ŋaŋ ilone ni me ge purat raka sage non o vasasa ŋaŋ alolora, ape neira gate nomleas, wa si, 21Tur magarosa iniko Korasin! tur magarosa iniko Bethsaida! ape si me ge veta o vasasa a Tur wa a Sidon tama me ge ti alo ikamurua, rara me nomleas tuai veta, alo siopa nolava wa o tarowo. 22Panava na we vava mun kamurua wa, te mataketake mun Tur wa Sidon alo qoŋ veveg, nava mun kamurua tagai. 23Wa iniko, Kapernaum, te ge rakatiko niŋa o tuka? te savragiko siwo i Panoi; ape si me ge o vasasa ŋaŋ a Sodom tama me ge veta alo iniko, me toga niŋa o qoŋ nake iloke. 24Pa na we vava mun kamiu wa, te mataketake mun Sodom alo qoŋ veveg, nava muniko tagai.
25Wa alo masaoi ilone i Jesus me valui goro me vet wa, Na we vareaniko, Mama, Lord goro o vunana wa o lalaŋana, ape ko me vatŋorag o ike ŋaŋ nan ira lolomaran tara menmenaro, wa ko me gaganag lue munra tete ŋaŋ. 26We nun, Mama, ape we tamaine we wia alo nagoma. 27I Tamak me la ma munau o savasava ŋaŋ, wa isei gate gilala o Natui nava o Mama; wa isei gate gilala o Mama, nava o Natui, tanasei o Natui we maros we gaganag luea mun neia. 28Ragai, kamiu nol we ŋala wa me gaqisaŋ, tur mule ma surinau, wa na te ge mapsag sur kamiu. 29Tur la nok o qatiiwa avunamiu, wa tur tataga inau, ape inau o matev aperig wa we nompepewu alo toqak, wa kam te ilo suar o tano mapsag mun naatamiu. 30Ape nok o qatiiwa we wia, wa nok o reŋe we mataketake.
Currently Selected:
Mathew 11: MOTA
Highlight
Share
Copy
Want to have your highlights saved across all your devices? Sign up or sign in
New Testament was published by the British and Foreign Bible Society in 1931.
