Mathew 15
15
1Naŋ alo ilone o tuan vatvatogo tara Pharise nan o Jerusalem we mule ma sur i Jesus, we varusia wa, 2Apesava ira tiŋqoro ŋaŋ anama we tamtames goro o vavae nina we taur usurag ma nanra tupunina? ape neira gate savsavula alo si qe gana o sinaga. 3Naŋ ni me valui gorora, we vet wa, Wa ikamiu wa, apesava kamiu mulaŋ we tamtames goro o lea vatraŋ mon God mun o vavae usurag tamomiu? 4Apen God me vareg mona wa si, Ka nom mava i tamama tana ravevema; wa, Isei qe vava tatas i tamana si ravevena ni tagea mun o matea apena; 5panava ikamiu we vava si, Isei qe vava mun i tamana si mun ravevena wasi, O sogov veta ilone, ko me lav moma lai amenau o sava te piriŋiko apena; wa sin tete nom mava i tamana si ravevena. 6Wa ikamiu me ge ava o vavae vatraŋ mon God mun o vavae usurag tamomiu. 7Ira sokoi goro kamiu; Isaia me ligoligog mantag ti apen kamiu, me vet wa si,
8O sul iloke we niŋa ma mun navalara,
Wa we varean inau mun naŋusura,
Nava natoqara aras rowo nan nau.
9Pa neira we momogo matila inau,
We vatvatogo ape vavae vatraŋ mora tanun was nor o lea vatogoa.
10Naŋ ni me suware ma suria o sul, me vava muneira wa, Tur roŋotag, wa tur lolomaran. 11Gate gene we siwo pata ilo valai we ge lepa o tanun, nava o gene we rowo lue nan navalana, iloke gina we ge lepa o tanun. 12Naŋ alo ine ira tiŋqoro anana me mule ma suria, we vava wa, Pa ko we gilala si ra Pharise me roŋotag nom o vavae ilone, wa me tutuag apena? 13Naŋ i Jesus me valuira, we vet wa, Val gene me riv ti, nava i Tamak tavunana gate riv ilone ti, te vutvut savrag. 14Tur ukeg mamasa ineira; ineira o matapei we tursalemoa ira matapei; pa si o matapei qe tursalemoa o matapei, rara te mamasu tatarua ilo qaraŋa. 15Naŋ i Peter me valuia we vet munia wa, Si ka gaganag lue mun kamam o vavae tenegag iloke. 16Naŋ i Jesus wa, Pa we nun, pa kamiu mulaŋ qale loloqoŋ? 17Pa kamiu gate nonom vaglala tiqa si o savasava qe siwo pata ilo valai, te roro ilo toqai, wa te savrag reag ilo wora? 18Nava o savasava ŋaŋ we rowolue nan o valai we kalo lue ma nan o toqai, wa iloke ŋaŋ gina te ge lepa o tanun. 19Ape nan o toqai we kalokalo lue ma o nonomia kiskislag ŋaŋ, o vusvus nawono, o pakapaka, o palpal, o tila galegale, o vavae vasvasir. 20Iloke ŋaŋ o gene te ge lepa gese o tanun; nava we ganagana wa gate savsavula tete ge lepa lai o tanun.
21Naŋ i Jesus me sere lue nan o vatine qara vareag i tag ta Tur wa ta Sidon. 22Wa ilo ma, o vavine ta Kanaan me mule ma nan o tiŋgoro vanua ilone, ti awo eleele suria ti vet wa, Ka magarosa inau, Lord, natun David, ape natuk o vavine we toga lopsag ape vui we tatas we gege ineia. 23Pa ni gate valui goroa o vavae tuwale. Wa ra tiŋqoro anana me mule ma suria we vet wa, Si ka ukegia, ape ni we rarao ape kulanina. 24Naŋ neia wa, Gate vatraŋ nau ma nava sur o sheep tape iman Israel magasera me tagea ti. 25Naŋ iro gene me mule ma, we vatieqau goroa ti vet wa, Lord, si ka piriŋ inau. 26Pa ni me valui goroa we vet wa, Gate wia we la o sinaga agara reremera, wa we savrag mun o kurut. 27Naŋ neia wa, Tagai wa, Lord, ape o kurut we gana o vain sinaga we mamas nan o tano ganagana nora tagira. 28Naŋ i Jesus me valui goroa we vet si, Vavine, nom o nomtup we poa; ni lai muniko tama ko we maros. Wa me vaesu natuna alo masao qoŋ nane ilone.
29Paso nan i Jesus me vanreag nan o vatine, me niŋa a pan qilo ta Galilea; wa ni me vara kalo ivawo tauwe, we pute aia. 30Wa o sul tar me mule ma suria, wa amaira o qages, wa ira matapei, ira luto, ira qelu, wa we sea mulaŋ we qoqo, wa we mapura siwo ape raŋon Jesus; wa ni me vaesura. 31O manigiu si o sul me mamakei apena, ape neira we ilo mora ira luto we vavava, ira qelu we esu, ira qages we mule kelkel, wa ira matapei we iloilo; naŋ neira we log ronoga God ra Israel apena.
32Naŋ i Jesus me log ira tiŋqoro ma suria, ti vet wa, Nau we magarosa o sul, ape neira we toga amenau o qoŋ nitol nake, wa nagara tagai: wa na gate maros we ukeg maliŋsala ineira, nan wa malewa wun a matesala. 33Naŋ ira tiŋqoro we vava munia wa, O bread ma avea we qoqo iake alo vanua vanameag si a vaŋan toqo lai o sul we poa tamaike? 34Naŋ i Jesus we varusira wa, O bread nivisa amen kamiu? Naŋ neira wa, Lavearua, wa o nanat iga mulaŋ gate purat. 35Wa ni me vatraŋ o sul si neira pute siwo alo tano. 36Wa ni me taur o bread lavearua ilone wa o nanat iga, ti wievavae, ti tuqe wora, ti tirag mura tiŋqoro, wa ira tiŋqoro mun o sul. 37Wa ineira me gana nol wa me toqo, wa me vilerag o gargarate sinaga me tuqe ti, o gete lavearua me ura. 38Pa rasei me gana ti o rereata tar vagavat, gate vasogo o retavine wa ra nanatmera ŋaŋ. 39Naŋ me vatoav paso o sul ni qara vega kalo ivawo aka, me niŋa o tiŋgoro vanua ta Magdala.
Currently Selected:
Mathew 15: MOTA
Highlight
Share
Copy
Want to have your highlights saved across all your devices? Sign up or sign in
New Testament was published by the British and Foreign Bible Society in 1931.
