Mathew 17
17
1Naŋ o qoŋ laveatea me paso i Jesus qara lav raka i Peter tana i James, ratol John i tasina, ti lav kalo ratol ivune tauwe eleele we asau. 2Wa natarapena me sea nan amoa alo nagoratol, wa nanagona me siŋasiŋa lue tam o loa, wa non o siopa me qeteg aqaga les tam o valawar. 3Wa ilo, i Moses tana i Elia me ŋaŋalue munratol we varvava tuwale amaia. 4Naŋ i Peter me valui goro me vet mun Jesus wa, Lord, we wia munina si a toga iake; ko ta maros, na taur alo vatike o paito nitol; muniko tuwale, wa mun i Moses tuwale, wa tuwale mun i Elia. 5Naŋ alo ni qale vavava, ilo, o maligo we siŋasiŋa me malumalu goro neira; wa ilo, o liŋai nan o maligo ma, ti vet wa, Iloke gina i Natuk o meratape, nau me ilo mana ineia; tur roŋotagia. 6Naŋ ra tiŋqoro me roŋotag, me masu alo nagoratol, we gogogolo aneane. 7Pa i Jesus me mule ma sur ratol, we taŋo vano apen ratol, we vet wa, Tol tavaraka, wa tolpea gogogolo. 8Naŋ ratol me ate kalo namataratol pa gate ilo tea isei, nava i Jesus magesena.
9Naŋ neira we taqel siwo nan o tauwe, wa i Jesus me gatogoro raka maremare ratol, we vet wa, Tolpea gaganag munsei o ike me suar ti mun kamtol si a ilo, gai niŋa o qoŋ i Nat tanun me tavaraka kel veta nanra mate. 10Naŋ ra tiŋqoro anana me varusia, we vava wa, Pa apesava gai ira vatvatogo we vetvet si amon Elia sin mule moai ma? 11Naŋ i Jesus me valui ratol, me vet munratol wa, Pa i Elia we mule ran moai ma, pa ni te wurvag kel o savasava ŋaŋ. 12Nava na we vet mun kamtol wa, si i Elia me mule veta ma, pa neira gate gilala ineia, nava me gege munia o sava ŋaŋ neira me maros; wa tamaine gina i Nat tanun te roŋo vivtig mona rigrig ti amaira. 13Naŋ alo ine ira tiŋqoro qara lolomaran mora si ni me vava muneira apen i John i Vasugroŋo.
14Naŋ neira me siwo niŋa o sul, wa o tuara tanun me mule ma suria, we vatieqau goroa, 15we vet wa, Lord, ka magarosa i natuk, ape o tamate leralera we gege ineia, wa ni we toga lopsag; ape ti masmas vagaqoqo ilo av, wa vagaqoqo mulaŋ ilo pei; 16pa na me vantakia ma sur ira tiŋqoro anama, pa neira gate ge esua lai. 17Naŋ i Jesus me valuia we vava wa, Gate taraŋiu we nomqerqeret we valvalil! na te togatoga amen kamiu gai niŋa aŋaisa? na te roŋo maul apen kamiu gai niŋa aŋaisa? lavia ma iake sur inau. 18Naŋ i Jesus me ŋorov goroa, wa o vui we tatas ilone me rowolue nania, wa me ge esu o reremera alo masao qoŋ ran ilone. 19Paso nan, ira tiŋqoro me niŋa ma sur i Jesus we asau, we vava wa, Apesava ikamam gate vasaug reag lai ilone? 20Naŋ i Jesus me vet muneira wa, Ape nomiu o nomqerqeret; ape we nun na we vava mun kamiu wa, Si o nomtup amen kamiu ta tama o siv mustard, kam te vava mun o tauwe iloke was, Gis raka at iane nan o vatike, pa te gis raka; wa tagtagai o gene tea si tete lai mun kamiu. 21Nava o gene ŋaŋ we tamaike tete rowolue nava mun o tataro wa o garagara mamasa.
22Naŋ alo ineira we toga atalia a Galilea, i Jesus ti vet muneira wa, Galewora te ukeg i Nat tanun ilo panera tanun ŋaŋ; 23wa neira te ge mateia, wa alo qoŋ vatoliu te ge raka kelua. Naŋ nalolora me wonowono aneane apena.
24Naŋ neira me siwo veta i Kapernaum, wa iragai we lala o som niruarua me mule ma sur i Peter, we vava wa si, I vatogo ikamiu gate la vano o som nirua ilone? 25Naŋ neia wa, Ni we la. Wa ni me kalo pata ilele ima, wa i Jesus me varus solsol wa, Ko we nonom o sava, Simon? Ira maranaga talo marama we tautaur nan rasei o som me rowoag tal si me sargag ti muneira? nanra nanatura, si nan rasei we sea? 26Naŋ neia wa si, Nan ragai we sea. I Jesus qara vet munia wa si, Manigiu o ine ira nanatui we toga wasawasa. 27Panava, si nina nipea ge tutuagira, ka siwo pan qilo, ka savrag o gau, wa ka rave kalo o iga me wota moai; wa me waka navalana ko te qara ilo suar o som alolona; ka taur ilone, ka vile muneira, si mun nok wa mun noma.
Currently Selected:
Mathew 17: MOTA
Highlight
Share
Copy
Want to have your highlights saved across all your devices? Sign up or sign in
New Testament was published by the British and Foreign Bible Society in 1931.
