Mathew 8
8
1Naŋ ni we taqel sur siwo ma nan o tauwe, wa o sul tar we tatataga ineia; 2wa ilo, o tuarasei o resresmavin ti mule ma suria ti vatieqau goroa, ti vet wa, Lord, si ko ta maros, ko te ge lai nau si na wenewene. 3Naŋ ti kaka napanena, ti taŋo vano ape neia, ti vet wa, Nau we maros, ka wenewene kel; wa gaplot me ge wenewene nania o resresmavin. 4Naŋ i Jesus ti vet munia wa, Ka ilogoro, nan ko wa vava munsei; nava van at, gaganag natarapema mun i oloolo, wa ka map kalo o sogov i Moses me vatraŋ ti apena, mun vaglala muneira.
5Naŋ ni we mule pata i Kapernaum, o tanun we liwoa goro soldier melnol me mule ma suria, ti tiasia, ti vava wa, 6Lord, o reremera anak we risa gap alele ima, o mawea, pa ti rararakut aneanea. 7Naŋ ti vet munia wa, Nau we mule we ge esua. 8Naŋ i liwoa goro soldier melnol ti valuia ti vet wa, Lord, na gate sar si ka kalo pata ilele imak; nava ka vet mamasa naliŋama, wa o reremera anak te maremare kel apena. 9Ape inau mulaŋ o tanun sur siwo nanra vatvatraŋ, wa o soldier ŋaŋ amenau we sur siwo nan nau; wa nau we vet mun iloke wa si, Mule at, wa ti mulemule; wa mun i tuara wa si, Mule ma, wa ti mule ma; wa mun o tanun anak wa si, Ka ge tamaike, wa ti ge. 10Naŋ i Jesus me roŋotag we mamakei, qara vet mun ragai we tataga wa, We nun na we vava mun kamiu wasi, Na gate ilo qalo alo Israel o nomtup we poa tama iloke. 11Pa na we vet mun kamiu wa, si rasei we tar te mule ma aŋaisa ape tano rowone loa wa ape tano tulne loa, wa te pute tuwale siwo amen Abraham tana Isaak, ratol Jakob, alo marana tavunana, 12nava te savrag reag ira nat marana ilo siliga ivarea; o areare aia wa o garagara ŋiŋiŋ. 13Naŋ i Jesus me vet mun i liwoa goro soldier melnol wa, Kel at, wa tama ko me nomtup ti ni lai muniko tamaine. Wa o reremera anana me maremare kel alo masao qoŋ ran ilone.
14Naŋ i Jesus me kalo pata ilele iman Peter, me ilo i qalgana o tavine we risa, o gopae tutunsag we ge ineia. 15Naŋ ni me taŋo napanena, wa o gopae tutunsag me tagea nania; wa ni me tavaraka we lapasag munia. 16Naŋ me ravrav veta, wa neira we tak ma suria we qoqo o vui we tatas me gege neira; wa ni me vasaug o vui ŋaŋ ilone mun o vavae; wa me ge esura nol me gopagopa ti. 17O manigiu si ilone te tira ran me vava ti mun Isaia o prophet we vet si, Ni me lav mona nonina o mageregere, wa me rig nonina o gopae ŋaŋ.
18Naŋ i Jesus me ilo o sul tar we vugvug ma suria, pa me vatraŋ si a levegao tavala qilo. 19Naŋ i tuara vatogo me niŋa ineia, ti vet wa, Vatogo, na te tataga gese iniko ivea ko we van lue aia. 20Naŋ i Jesus we vet munia wa, O fox ŋaŋ naqaraŋira apena, wa o manu ŋaŋ talo maea nanigira, nava i Nat tanun i tagai natanona sin iliŋa naqatuna aia. 21Wa o tuara mulaŋ amaira tiŋqoro anana me vet munia wa, Lord, ukeg moai galtag nau si na mule, na tavig i tamak. 22Pa i Jesus we vet munia wa, Ka tataga inau, wa ka ukeg ira mate neira tavig mora o tamate ŋaŋ amaira.
23Naŋ ni me vega kalo vawo aka, wa ira tiŋqoro anana we tataga ineia. 24Wa ilo, o siwo liwoa me siwo alo qilo, wa o rep ti malumalu goro o aka apena; nava ni we maturu. 25Naŋ ira tiŋqoro me mule ma suria we vavaŋovia, we vet wa, Lord, si ka vaesu, nina we mate ran. 26Naŋ ti vet muneira wa, Ape sava kamiu o matev gogogolo tamaike, ira nomqerqeret? Paso nan ti tavaraka, ti ŋorov goro o laŋ wa o qilo, wa qara taro popo apena. 27Wa o tanun ŋaŋ me mamakei, we vet wa, Gate i gene liwoa gai iloke, ape o laŋ wa o qilo we roŋotagia gese.
28Naŋ ni me niŋa veta tavala qilo ilo vanuara ta Gadara, o tanun pulrua we vatatua, o vui we tatas we gege rara, wa irara we rowolue ma nan o qaraŋ tamate ŋaŋ, we kita aneane, nan isei wa mule lue lai alo matesala ilone. 29Wa ilo, rara we awoawo kalo, we vet wa, O sava amen kara wa amaiko gai, Natun God? Ko me mule ma si a ge rakut solsol kara? 30Pa o vavtig qoe we qoqo me susula aras nan neira. 31Naŋ o vui ŋaŋ ilone me paere munia we vava wa, Si ko qe vure lue kamam, ka maukeg kamam a rowo ilo vavtig qoe. 32Naŋ neia wa, Tur mule. Wa neira me rowo lue, qara siwo ilo qoe ŋaŋ; wa ilo, o vavtig qoe nol me tagora sasariaeae ape tutŋe tauwe ilo qilo, me mate alo pei. 33Pa rasei me vaŋanira ti me totoa, wa me vanreag ilo laqlaqe vanua, qara gaganag o savasava, wa o sava me ge rara, o vui we tatas me gege rara ti. 34Wa ilo, o laqlaqe vanua nol me rowolue si a varniŋa i Jesus; wa neira me iloa, qara pesia sin so leas naraŋona nan o tiŋgoro vanuara.
Currently Selected:
Mathew 8: MOTA
Highlight
Share
Copy
Want to have your highlights saved across all your devices? Sign up or sign in
New Testament was published by the British and Foreign Bible Society in 1931.
