Mark 5
5
1Naŋ neira me niŋa a tavala qilo, ilo vanuara ta Gerasa. 2Wa ni me vara kalo veta nan o aka, wa gate maul o tanun o vui gagavu amaia me vatatua we talo qaraŋ tamate ŋaŋ. 3Pa non o tano togatoga alo qaraŋ tamate ŋaŋ; wa isei gate rot laia, si mun o ga talai. 4Ape me rot vagaqoqo veta neia mun o ga talai ape raŋona wa ape panena, pa ni we kekerag mot o ga talai, wa me vara latelate o gae ape raŋona, wa isei gate vavaka si a ge mamaru neia. 5Wa vagae alo qoŋ wa alo maran ni me togatoga alo tauwe ŋaŋ wa alo qaraŋ tamate ŋaŋ, we uloulo, we taratara kelua mun o vat. 6Pa ni me ilo i Jesus aras, ti valago sur, ti vatieqau goroa, 7ti awo mun o liŋai we poa, ti vet wa, O sava amen nau wa amaiko, Jesus, Natun God i Eleele? Na we log nasasan God ivunama si nipea ge rarakut inau. 8O manigiu Jesus me vava veta munia si, Rowolue ma gai, vui gagavu, nan o tanun ilone. 9Naŋ ti varusia wa, Isei nasasama? Wa ni me valuia, ti vet wa, Nasasak i Legion, ape kamam we qoqo. 10Naŋ ti tias vagaqoqoa si nipea vatraŋ savragira nan o vanua. 11Pa o vavtig qoe liwoa aia ape taqaŋ tauwe, we susula. 12Wa o vui tatas nol me tiasia, we vet wa, Ka suware kamam at ilo qoe ŋaŋ, si kamam a mule pata ilololora. 13Wa i Jesus me maukeg gaplot muneira. Wa o vui gagavu ŋaŋ me rowolue, we mule pata ilo qoe ŋaŋ; wa o vavtig qoe me tagora sasariaeae ape tutŋe tauwe ilo qilo; we tama tar vagarua; wa me maumauwora alo qilo. 14Naŋ iragai me vaŋvaŋan o qoe ŋaŋ ti me totoa, wa me sororo alo laqlaqe vanua wa a tag taia. Naŋ neira we rowolue ma si a ilo o gene me ge ti si we savai.
15Naŋ neira we mule ma sur i Jesus, we sagarag i gene o vui we tatas me gege ineia ti, pa we pute wa we saru o siopa, wa we lolomaran kel, i gene nan qa o Legion me toga ti amaia, wa neira we gogolo. 16Wa iragai me ilo mora ti me gaganag mun neira apena, si me ge gasei amen i gene o vui we tatas me gege ineia ti, wa ape qoe ŋaŋ mulaŋ. 17Wa neira me tias raka ineia sin toavtag nor o tiŋgoro vanua. 18Naŋ ti vega vawo aka, wa i gene o vui we tatas me gege ineia ti we tiasia sin goara lai amaia. 19Nava i Jesus gate mawui goroa, panava ti vet munia wa, Ka kel ilo imama sur ra sogoma, wa ka gaganag lue muneira o gene liwoa ŋaŋ i Lord me gapalag veta muniko, wa me magarosa goroko. 20Naŋ ti van at, ti toretore raka alo Dekapolis ape gene liwoa ŋaŋ i Jesus me gapalag ti munia. Wa o tanun ŋaŋ me mamakei nol apena.
21Naŋ i Jesus me levegao veta mulaŋ vawo aka i tavala qilo siwo, wa o sul liwoa me gogorag tuwale ma suria, wa ni we toga a pan qilo. 22Wa ilo, i tuara nanra liwoa goro ima siwo tuwale we mule ma, nasasana i Jairus, wa we iloa, ti rowo taqa ape raŋona; 23wa we tias vagaqoqo ineia, ti vet wa si, Natuk o malamala te qale nosa ti; pa si ka mule wa we taŋovia mun napanema sin maremare kel, wa ni te esu. 24Naŋ ti mule tuwale amaia, wa o sul liwoa we tatataga ineia, wa we vapipiŋia.
25Pa o tuara tavine o nara laqelaqe me ge neia o tau saŋavul tuwale o numei nirua veta. 26Wa ni me roŋo vivtig vagaqoqo amaira gismana we qoqo, wa me vile qet nania pulan o savasava, wa gate piriŋ ilo tea, nava me tatas ran nan amoa apena. 27Pa ni me roŋotag apen i Jesus, wa we mule ma alo sul ape kulana, ti taŋo vano ape non o siopa; 28ape ni me vet si, Na ta taŋo vano lai tea ape non o siopa, wa te ge esu kel nau apena. 29Wa gaplot o matevuravura tape narana me sisim, wa ni me roŋotag alo tarapena si me ge esua nan o gopae ilone we tatas. 30Naŋ gaplot i Jesus me gilala veta alo ineia kel si o mana me rowolue nania, wa ni me kilau ris alo sul ti vet wa, Isei nane me taŋo vano ape nok siopa? 31Naŋ ira tiŋqoro anana me vet munia wa, Ko we ilo o sul we vapipiŋiko, wa ko we vava lai si, Isei me taŋo vano ape nau? 32Naŋ ni me ate kelkel sin ilo iro gene me ge tamaine. 33Pa o tavine ilone we gogogolo wa we sigeragia, we gilala o sava me ge ti alo ineia, wa we mule ma we rowo taqa goroa, wa we gaganag lue munia o nun nol. 34Naŋ ni me vet munia wa, Natuk, nom o nomtup me vaesuko; mule tamata at, wa ka toga wasawasa nan nom o gopae we tatas ilone.
35Pa alo ni te qale vava ti, irasei we van ma alo iman i gene we liwoa goro ima siwo tuwale, we gaganag si, Natuma me mate veta; ape sava ko te qale anumag i Vatogo? 36Nava i Jesus me roŋotag mona o vavae me gaganag ti, wa ti vava gaplot mun i liwoa goro ima siwo tuwale wa, Nipea gogolo, ka nomtup mamasa. 37Wa ni gate ukeg isei si a tataga amaia, nava i Peter tana i James, ratol John tasin i James. 38Wa ni we va niŋa naiman i liwoa goro ima siwo tuwale, wa we sagarag o sul we wulano, we taŋtaŋ wa we uloulo we qoqo. 39Naŋ ti kalo pata, ti vava muneira wa, Ape sava kamiu we wulano wa we taŋtaŋ? O malamala gate mate, nava we maturu. 40Pa neira we marmaraesagia; nava ni me vure savrag qet neira, ti lav i taman o malamala ilone tana ravevena, wa ragetol ilone amaia, wa ti kalo pata ilo masaoi o malamala ilone we risa aia. 41Naŋ ti taur goro napanen o malamala ilone, ti vava munia wa, Talitha kumi; pa we vava leas si, Malamala, na we vava muniko, Tavaraka. 42Wa gaplot o malamala me tira raka, wa me alial kelkel, ape natauna me saŋavul tuwale o numei nirua veta. Naŋ neira me mamakei aneane apena. 43Pa ni me gatogoro vagaqoqo neira nan sei wa gilala ape gene iloke: wa ni me vet si a la vano munia sin gana.
Currently Selected:
Mark 5: MOTA
Highlight
Share
Copy
Want to have your highlights saved across all your devices? Sign up or sign in
New Testament was published by the British and Foreign Bible Society in 1931.
