Luka 20
20
UYesu iiwuudzwa ulwa wutawulilwe we ali nawo
(Matayo 21:23-27; Maluko 11:27-33)
1Ikigono kimwinga, uYesu aawulanidzaga avaanu mu lipaala lya tembeli, nu kudalika iMola iNofu. Avateekedzi avakomi, avawulanidzi va milagililwe, na vavaha va Vayahudi vakumuhelelelaga, 2neke vamuwuudzage vatigilage, “Utulongele, wiilima idzi mu wutawulilwe wuki? Ye ani ye ákupeeliye uwutawulilwe uwo?”
3Akuvahigaga iitigilaga, “Na yuune ndikuvawuudza. Muundongele, 4uwutawulilwe wa Yohana uwa kudzabika avaanu waahumile kwa Nguluvi, enewuli waahumile ku vaanu?” 5Neke vavangage ukulongana veene vatigilage, “Ngana tutigile, ‘Waahumile kwa Nguluvi,’ akutuwuudza ukutigila, ‘Kye kiki musamufuuviilwe?’ 6Neke kangi, ngana tutigile, ‘Waahumile ku vaanu,’ avaanu vonda ava vahadza vakututakanyula na maganga, pakuva viifuuwa ukutigila uYohana muvidzi.” 7Pambele viipilusaga viitigilaga, “Sitwidzeela uwutawulilwe uwo kwe waahumile.” 8UYesu akuvalongelaga iitigilaga, “Apo na yuune, sindikuvalongela amalimo aga ndiilimila mu wutawulilwe wuki.”
Ikihwananidzo kya valimi avahosi
(Matayo 21:33-46; Maluko 12:1-12)
9Neke uYesu avangage ukuvalongela avaanu ikihwananidzo iki, atigilage, “Aali kwali umuunu yumwinga, ye oogiike imisabibu mu mugunda gwakwe,#20:9 Mugunda gwakwe Iki kye kihwananidzo kya vaanu va Nguluvi, kwe kutigila aVaisilaheli, Isaya 5:1-7. akuvapagadzaga avalimi, iihegaga, iihelelaga ku nyi ya kutaali, uko akwikalaga musika mutaali. 10Mu musika ugwa kunyokola isabibu, iitumaga umulimila-vangi vaakwe ku valimi avo, ukuta vamupeele ulubali lwakwe lwa fiveleko fya sabibu. Neke umulimila-vangi uyo pe aafikile, avaanu avo vakumutovaga nu kumudagiilidza, iipilukaga mawoko geene.
11“Umunya mugunda iitumaga umulimila-vangi uyungi. Nave vakumutovaga nu kumulimila idzisivagiye, neke vamudagiilidzage kitamupeela kiinu. 12Iitumaga uva wudatu. Uyo nave vakumulemadzaga, vakumutoodzaga kwivala.
13“Pambele umunya mugunda iitigilaga, ‘Lino ndiilima kiki? Ndihadza ndikumutuma umuswamu-vangu umwende! Apangi uyu vahadza vakumuginiya.’ 14Neke kangi avalimi avo pe vamuweene umuswamuve uyo, viilonganaga veene viitigilaga, ‘Umunya lipwela ilya mugunda ugu ye uyu. Lino tumukome, ukuta ilipwela lyakwe livedzage lyesu.’ 15Vakumwibataga, vakumuhumyaga mu mugunda gwa misabibu, vakumukomaga.”
Neke uYesu avawuudzage atigilage, “Lino umunya mugunda uyo ahadza akuvalimila kiki avalimi avo? 16Iikwadza avakome, neke umugunda ugo avapeele avalimi vangi!” Avaanu pe vaapuliike amadzwi ago, viitigilaga, “Haave, idzi dzaali dzitane ukuhumila!” 17Neke uYesu avalolage, avawuudzage atigilage, “Lino uWusimbe uwu, ikiganulo kyakwe kye kiki?
‘Iliganga lye vaakaanile#20:17 Iliganga lye vaakaanile Iliganga ili lye vaakaanile aVaisilaheli, ye Yesu yumwene. avanya kudzenga,
lino lívedzile liganga likomi ilya pa wiidamiko#20:17 Liganga likomi ilya pa wiidamiko AVayahudi pe vaadzengaga inyumba, vaaviikaga iliganga pa wiidamiko uwa luutu, ilyakoleelaga inyumba yonda. Iliganga ilyo lyali likomi, lyadumiingʼasaga ingʼandzi dzivili. wa nyumba yonda.’#Ndzimbililo 118:22
18“Umuunu ngana agwile pa liganga ilyo, iideenyangika. Kangi ye avedzaga ye likumugwila, lihadza likumutakanyula.”
19Neke avawulanidzi va milagililwe na vateekedzi avakomi valukagulage ukutigila, ikihwananidzo ikyo kikuvalonga aveene. Apo viisakaga ukumwibata baaho na baaho, neke kangi voogopage ililugu lya vaanu.
Ukuhomba ikodi kwa Kayisali
(Matayo 22:15-22; Maluko 12:13-17)
20Neke avakomi va Vayahudi vamuvandage uYesu. Vakuvatumaga avatendegedzi aviiyigiidze ngita vaanu vanofu. Vaalimile ewo, pakuva vaasakaga ukumutegedza mu madzwi gaakwe, ukuta vamwibate nu kumusindika kwa mutemi.
21Neke avatendegedzi avo vamuwuudzage uYesu vatigilage, “Muwulanidzi, twidzeela ukutigila wiilonga nu kuwulanidza idza ndakyene. Kangi usiikoogopa uwutambule wa muunu, nda haamu, wiiwulanidza idza ndakyene ku vaanu valimage ngita kye iisaka uNguluvi. 22Ongo, lwikwidikwa uneefwe ukuhomba ikodi kwa Kayisali,#20:22 Kayisali Ili lye litaawa lya mutwa mukomi, umutemi va Valoma. Umusika ugo, inyi ya Isilaheli yaali mu wutemi wa Valoma. enewuli lusiikwidikwa?”
23Neke kangi uYesu awudzeelage uwukedusi waawo, avalongelage atigilage, 24“Muumboneese iligoobeli lya dinaali.#20:24 Dinaali Aga gaali magoobeli ga Valoma. Idinaali yimwinga yaalingʼiine nu luhombo lwa mulima-malimo mu kigono kimwinga. Uluhwano ni litaawa ifili mu ligoobeli lya dinaali iyi, fya ani?” Viihigaga viitigilaga, “Fya Kayisali.” 25UYesu akuvalongelaga iitigilaga, “Lino, ifya Kayisali mumupeelage uKayisali, ifya Nguluvi mumupeelage uNguluvi.”
26Avaanu avo viidzumaga mbandu lwe ávahigile uYesu, viidzikaga dzidzidzi. Viilemwaga ulwa kumwibatila, wiimila wa madzwi ge álongile pa miiho ga vaanu.
UYesu iiwulanidza ukutigila uludzulubuko lwa vaanu kooluli
(Matayo 22:23-33; Maluko 12:18-27)
27Neke aVasadukayo#20:27 AVasadukayo Lole ku Figanulo. avangi avasaafuuwaga ukutigila kooluli uludzulubuko lwa ávafuwe, vamuhelelelage uYesu, vamuwuudzage vatigilage, 28“Muwulanidzi, uMose atusimbiye ululagi ulwitigila, ‘Ngana umugoosi áfuwe, ámulekile umudala vaakwe kitamubaabihidza mwana, apo umunungʼuve amuhaalage umufwile uyo, ukuta amubaabihidze avaana uyo ye áfuwe.’#Lwiwuko 25:5-6 29Lino vaali koovali avanyalukolo mufungʼati (7), avaali vaana va mwadaada yumwinga. Uva kutala aatoolile umudala, iifuwaga kitamubaabihidza vaana. 30Uva kavili [akumuhaalaga umudala umufwile uyo, nave iifuwaga kitamubaabihidza vaana],#20:30 Amadzwi aga simoogali mu wusimbe uwungi uwa kataali. 31pambele uva kadatu akumuhaalaga umudala umufwile uyo, nave iifuwaga. Lwivedzaga ndeeni ku vonda mufungʼati. Avaana va daada yumwinga vonda avamutoolile umudala uyo, viifuwaga kitamubaabihidza vaana. 32Pambele umudala umufwile uyo, nave iifuwaga. 33Lino, ngana kuli ludzulubuko lwa ávafuwe, umudala uyo ye aahaaliilwe ku vonda mufungʼati, alaavedza na vagoosi mufungʼati? Iilemwa ukuvedza na vagoosi mufungʼati, kwe kutigila uludzulubuko sikooluli.”
34UYesu akuvalongelaga iitigilaga, “Avaanu va mwe naanyi umu viitoola nu kutawuka. 35Neke kangi avo ve iiwona uNguluvi ukutigila, viivagila ukufika ku nyi iyo pa ludzulubuko lwa avaafuwe, avo vasilaatoola nambe kutawuka. 36Apo vasilaafuwa kangi, pakuva valaahwanana na vanyamwandza. Viivedza vaana va Nguluvi, pakuva vádzulubwiswe ukuhuma ku wulungu.
37“Nayu Mose aavilatuwe ukutigila, avaafuwe valaadzulubuswa, pe aasimbile mu Wusimbe uWiimike wiimila wa kitundu ikyakaga umooto ukutigila, uMutwa Nguluvi ‘ye Nguluvi va Abulahamu, Nguluvi va Isaka, nu Nguluvi va Yakobo.’#Kuhega 3:6 38Umwene si Nguluvi va ávafuwe, nda haamu, ye mwene uNguluvi va vuumi, pakuva pa miiho gaakwe vonda vuumi.”
39Neke avawulanidzi va milagililwe avangi vatigilage, “Muwulanidzi, úlongile wunofu!” 40Ukuvangila apo, sikwali umuunu ye aagelile ukumuwuudza imbuudzo dzingi.
UMesiya ye Muswamuve va Dawudi kangi Mutwa
(Matayo 22:41-46; Maluko 12:35-37)
41Kangi uYesu akuvawuudzaga iitigilaga, “Kye kiki avaanu viitigila, uMesiya ye Muswamuve va Dawudi? 42Pakuva uDawudi yumwene, aasimbile mu kitabu kya Ndzimbililo, ukutigila,
‘UMutwa Nguluvi amulongiye uMutwa vangu,
“Wiikale ulubali lwangu ulwa kundiyo,#20:42 Wiikale ulubali lwangu ulwa kundiyo Kwe kutigila, uYesu iitemasa nu Nguluvi.
43ukufikila pe ndiivedza ndívadelwidze avatavangwa vaako nu kuvaviika paanyi pa ndzayo dzaako.” ’#Ndzimbililo 110:1
44“Apo, uDawudi akumutambula uKilisiti ukutigila, ‘Mutwa.’ Lino uKilisiti iivedza muswamuve wuli wuli?”#20:44 Kwe kutigila, wiimila wa kuvedza Mesiya, uYesu ye mukomi mbandu ukulutila uDawudi.
Ukwiyangalila na vawulanidzi va milagililwe
(Matayo 23:1-36; Maluko 12:38-40; Luka 11:37-54)
45Umusika avaanu vonda pe vakumupulikidza uYesu, akuvalongelaga avanyigendwa vaakwe iitigilaga, 46“Mwiyangalilage na vawulanidzi va milagililwe! Viikeela ukugenda váfwalile imingila mitaali nu kuhungilwa nu luginiyo pe viigenda mu magulilo. Kangi viikeela ukwikala mu fideego ifya wutambule mu nyolanilo na poono pa wutambule mu ngʼeelanilo. 47Avaanu avo vakuvadzanga avafwile na vagoosi, wugendela wa kunyamula imaale dzaawo, viilapangila indapangilo naali hiilo, ukuta vawoneke vagolofu ku vaanu. Wiimila wa idzo, uNguluvi alavapeela uluhigo lukali hiilo!”
Currently Selected:
Luka 20: BEZ
Highlight
Share
Copy
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved.
