Luka 3
3
UYohana uMudzabisi iiwuyapa ingʼaasi ya Yesu
(Matayo 3:1-12; Maluko 1:1-8; Yohana 1:19-28)
1Gwali mwaka gwa likyumi ni gihaanu (15) ukuvangila uKayisali Tibelyo pe iivanga ukutema uwutwa wa Valoma. Umusika ugo, uPondyo Pilato aatemile umugoola gwa Yudeya, uHelode aatemile umugoola gwa Galilaya, kangi uFilipo umunyalukolo vaakwe aatemile umugoola gwa Ituleya nu gwa Tilakoniti, nayu Lisaniya aatemile umugoola gwa Abilene. 2UAnasi nu Kayafwa vaali vateekedzi avavina.#3:2 Vateekedzi avavina Lole Avateekedzi ku Figanulo.
Mu musika ugo, uYohana umuswamuve va Sakalya, iikalaga ku lungʼalangʼala. Pe ali uko, iilongelwaga imola ukuhuma kwa Nguluvi. 3Neke ahelelage imbali dzonda idzaali biihi nu mukoga Yolodani, adalikage ukutigila avaanu vapelage indzanangifu dzaawo nu kudzabikwa, ukuta uNguluvi avapyanile. 4Idzi dze dzeene idzaasimbiilwe kataali mu kitabu kya madzwi ga muvidzi Isaya wiimila wa Yohana ukutigila,
“Ingʼemeelo ukuhuma ku lungʼalangʼala yiitigila,
‘Mumuwuyapilage ingʼaasi uMutwa,
nu kugolosa umwa kugendela umwene.
5Ifivindi ni fidunda fyonda fiteluswage,
ingʼaasi ídzibidiime dzigoloswage,
ni ngʼaasi idzinya tugima dzihambuswage makaasi matelevafu.
6Avaanu vonda valawuwona uwupoki wa Nguluvi.’ ”#Isaya 40:3-5
7Neke avaanu voloofu vahelelage kwa Yohana mu kudzabikwa, umwene avalongelaga aatigilaga, “Nye va kivegalo kya ndzokaanye! Ye ani ye ávapaviye ukutigila munyile iligooga lya Nguluvi iliikwadza? 8Nda haamu, muvelekage ifiveleko mu migendele gyenyo ukuwoneesa ukutigila, múpelile indzanangifu dzeenyo. Mutanage ukuhoodza mu numbula dzeenyo ukutigila, ‘Túpokiilwe, pakuva tuli va kipelela kya Abulahamu.’#3:8 Kipelela kya Abulahamu AVayahudi vaafuuwaga ukutigila, uNguluvi asilavahiga. Viiwonaga ukutigila vahaagulwa va Nguluvi, wiimila wa lufingo lwakwe na vakuhwawo, Wutalilo 17:7. Ndikuvalongela ndiitigila, uNguluvi asiilemwa ukuhambusa amaganga aga gavedze vaana va Abulahamu! 9Lino uluhigo lwa Nguluvi lúfikile, ngita umuunu ye ányamuwe iveega, íigelaniidze ukudumula amadela ga mubiki. Kangi umubiki ugusiiveleka ifiveleko ifinofu, gwidumulwa nu kutoodzwa mu mooto.”
10Neke avaanu avo vamuwuudzage vatigilage, “Lino tulimage kiki?” 11UYohana akuvahigaga iitigilaga, “Ye ali ni myenda givili amugavilage ye angaya mwenda, nayu munya kyakuliya amupeelage ye asili nakyo.” 12Avahaki-pembe#3:12 Avahaki-pembe Lole ku Figanulo. avaaheliye, ukuta vadzabikwe, navo vakumuwuudzaga uYohana viitigilaga, “Muwulanidzi, na yuufwe tulimage kiki?” 13Akuvahigaga iitigilaga, “Mutanage ukuhoofya ikodi iyilutila pa kigelelo íkiviikiilwe.” 14Avasilikaale navo vakumuwuudzaga viitigilaga, “Na yuufwe tulimage kiki?” Akuvalongelaga iitigilaga, “Mutanage ukuhoofya avaanu amagoobeli mu ludali, kangi mutanage ukumutaaha umuunu ulwa kumudetela. Mwisiikilage lu luhombo lwa malimo geenyo.”
15Imisika igyo avaanu vaahuuvilaga ukwadza kwa Kilisiti, kangi vaahoodzaga ukutigila apangi uYohana ye mwene uMesiya. 16Neke uYohana avalongelage vonda atigilage, “Uneene ndikuvadzabikila ululenga, neke kangi iikwadza umunya ngufu ukulutila uneene, ye sindivagiye nambe kuwopola ingʼova dza ndaatu dzaakwe.#3:16 Kuwopola ingʼova dza ndaatu dzaakwe Mu mivedzehedze gya Vayahudi, umugendzi pe iikwingila mu nyumba, umusutu amuwopolaga indaatu nu kumukalafya amagulu. Amalimo ago gaali ga musutu va paanyi hiilo. Uyo ye mwene ye ahadza akuvadzabikila mwa Mubepo uMwimike#3:16 Ahadza akuvadzabikila mwa Mubepo uMwimike Lole Ukudzabikwa mwa Mubepo uMwimike ku Figanulo. nu mooto.#3:16 Ahadza akuvadzabikila mwa Mubepo uMwimike nu mooto Kuli figanulo fivili. Ikya kutala kiitigila, uYesu ahadza iidzabika nu Mubepo uMwimike, uwuvidzi uwaakwiliye ikigono ikya Pendekositi, Malimo ga Vatume 2. Ikya kavili kiitigila, uYesu ahadza akuvavaladza avaanu va mwe naanyi wugendela wa kuvatipula avahosi mu mooto, Luka 3:9, 17. 17Kangi iivedza ngita muunu ye ákoleeliye ikyelelulilo mu mawoko gaakwe íigelaniidze ukwelelula ingana. Iilundasa ingana nu kuviika mu kisandzi, neke umwengelu iisopa mu mooto ugusiidzima.”
18Mu madzwi ago na gangi goloofu uYohana avawungaga avaanu nu kudalika iMola iNofu.
UYohana uMudzabisi akumukenyela uHelode
19Neke uYohana amukenyelage umutwa Helode, pakuva amutoolile uHelodya umudala va maamiye uFilipo, ni mbiifu ndzoloofu dze aalimile. 20Kangi uHelode iiginilidzaga uwuhosi wa kumudindila uYohana mu ndinde.
Ukudzabikwa kwa Yesu Kilisiti
(Matayo 3:13-17; Maluko 1:9-11)
21Umusika uYohana pe asinaa adindilwa, pe aadzabikaga avaanu voloofu avaapelaga, uYesu nave iidzabikwaga. Neke uYesu alapangilage, kukyanya kudindukage, 22uMubepo uMwimike ngita ngundya iikage pakyanya apaakwe. Isawuti ya Nguluvi ukuhuma kukyanya yiipulisaga yiitigilaga, “Uveeve yuuve Muswamu-vangu, ve Mwende vangu, ye ndíkeeliidzwe naave mbandu.”
Ikipelela kya Yesu
(Matayo 1:1-17)
23UYesu pe iivanga amalimo gaakwe, aali ni myaka ngita makyumi gadatu (30). Avaanu vaaganisaga ukutigila ye muswamuve va Yosefu.
UYosefu aali muswamuve va Eli,
24uEli muswamuve va Matati,
uMatati muswamuve va Levi,
uLevi muswamuve va Meliki,
uMeliki muswamuve va Yanayi,
uYanayi muswamuve va Yosefu.
25UYosefu muswamuve va Matatya,
uMatatya muswamuve va Amosi,
uAmosi muswamuve va Nahumu,
uNahumu muswamuve va Esili,
uEsili muswamuve va Nagayi.
26UNagayi muswamuve va Maati,
uMaati muswamuve va Matatya,
uMatatya muswamuve va Semeyini,
uSemeyini muswamuve va Yoseki,
uYoseki muswamuve va Yuda.
27UYuda muswamuve va Yohanani,
uYohanani muswamuve va Lesa,
uLesa muswamuve va Selubabeli,
uSelubabeli muswamuve va Salatyeli,
uSalatyeli muswamuve va Neli.
28UNeli muswamuve va Meliki,
uMeliki muswamuve va Adi,
uAdi muswamuve va Kosamu,
uKosamu muswamuve va Elimadamu,
uElimadamu muswamuve va Eli.
29UEli muswamuve va Yehoswa,
uYehoswa muswamuve va Elyeseli,
uElyeseli muswamuve va Yolimu,
uYolimu muswamuve va Matati,
uMatati muswamuve va Levi.
30ULevi muswamuve va Simyoni,
uSimyoni muswamuve va Yuda,
uYuda muswamuve va Yosefu,
uYosefu muswamuve va Yonamu,
uYonamu muswamuve va Elyakimu.
31UElyakimu muswamuve va Meleya,
uMeleya muswamuve va Mena,
uMena muswamuve va Matata,
uMatata muswamuve va Natani,
uNatani muswamuve va Dawudi.
32UDawudi muswamuve va Yese,
uYese muswamuve va Obedi,
uObedi muswamuve va Bohasi,
uBohasi muswamuve va Salumoni,
uSalumoni muswamuve va Nasoni.
33UNasoni muswamuve va Aminadabu,
uAminadabu muswamuve va Adimini,
uAdimini muswamuve va Hesiloni,#3:33 UAdimini muswamuve va Hesiloni Uwusimbe uwungi uwa kataali wiitigila uAdimini muswamuve va Alani, uAlani muswamuve va Hesiloni.
uHesiloni muswamuve va Pelesi,
uPelesi muswamuve va Yuda.
34UYuda muswamuve va Yakobo,
uYakobo muswamuve va Isaka,
uIsaka muswamuve va Abulahamu,
uAbulahamu muswamuve va Tela,
uTela muswamuve va Naholi.
35UNaholi muswamuve va Selugi,
uSelugi muswamuve va Lagawu,
uLagawu muswamuve va Pelegi,
uPelegi muswamuve va Hebeli,
uHebeli muswamuve va Sala.
36USala muswamuve va Kenani,
uKenani muswamuve va Alifwakisadi,
uAlifwakisadi muswamuve va Semu,
uSemu muswamuve va Nwaka,
uNwaka muswamuve va Lameki.
37ULameki muswamuve va Metusala,
uMetusala muswamuve va Henoki,
uHenoki muswamuve va Yaledi,
uYaledi muswamuve va Mahalaleli,
uMahalaleli muswamuve va Kenani.
38UKenani muswamuve va Enosi,
uEnosi muswamuve va Seti,
uSeti muswamuve va Adamu.
UAdamu aagaviilwe nu Nguluvi.
Currently Selected:
Luka 3: BEZ
Highlight
Share
Copy
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved.
