1 Corinth 10
10
Israel haela ve haeae kelavaki
1Apavara, oharo aeka ma: e haveva kalaivahaelue: elaviilave papa haela meuru aeravahaeape, aka ere oaria ahea ma ve elahukape. 2Ere oaria Moses v'ila la meuru i ahea ma ve bapatiso leivahaeape. 3Ere oaria la ove eapai haroapo hareho lalavahaeape. 4Ere oaria la ove ma haroapo hareho lalavahaeape: ehovea ere ereve airekai aupe la ove have ve ma lalavahaeape. La have va Keriso. 5Aka ereve uku haela Aualari ikiheaha leipe: la haela huakara ve leia apihaeape.
6Ma eharu elaviila ve ihova hovea leivahaeape, ere eharu heaha ikivere leivahaeape la mai elaviila leivahaeaki ave. 7E kara Aualari lahua lahua ka momorapulue, ere momorapupe la mai hovea: Overa buka oharo maria hape, Haela oaria va eapai i ma ila larive ikivere leivahaeape: ere erau arive ikivere leivahaeape. 8Ere leivahaeape la airi pavora mai, elaviila leivahaea v'arekaea. Ere leivahaeape la hare, ereve haela 23,000 hihilauvahaeape. 9Ere uku haela Aualari amuraeape la mai hovea, elaviila Keriso kamuraealue. Ekaroa erero haeape, ehovea la haeae. 10E va ikihairihairi kalaivahaelue. Ere ikihairihairi leivahaeape, laelave haela haeaki la aneru, erero haeape. 11Ma eharu oaria ere v'ila leivahaeape, elaviilave ihova hovea, ehovea elaviilara kileavahaeakive ehovea elaviilave hoa meahaiapo ve hita hoa. 12Laelave, haela ae elare aheke epavila la kekelakilava, kiva leiki, are hilauki ave. 13Ero kurupaeaki la eharu, haela oaria kara kurupaealula: Aka Aualari ve mai ehoe, laelave are eve aheke hovea hiki kurupaeakilai. La kurupaeaki hoa kara, ara ero ovokake okiharo avarakilai, laelave e va hoveahovea leikilai.
Harihu lahua lahua kakelavarue
14Laelave, apavara e, Aualari lahua lahua morapaeaki mai oaoka lei hukauki. 15Ara ma oharo ero ikiore haela hovea maeaevila. Arave oharo iki auhohi kelavaki. 16Elaviila momorapulula la hekako, la va Keriso ve apu hovea ka ha? Elaviila haivavailula la pai, la va Keriso ve maea hovea ka ha? 17Ehovea elaviila oaria hareho pai haroapo herehere leilula, elaviila maea haroapo hovea. Elaviila oaria hareho la pai haroapo herehere laralula. 18Israel haela ve aivau mai eavaila. Ere arura haha la hehe eapai herehere lalavahaea va ka ha? 19Ara ve learia maeakilai ha? Hohao harihu va iele ha? aka hohao harihu aiarape la eapai va iele ha? 20Arave oharo maria: Ita lahua haela hehe leilula la eharu ere va ovehahu aiaralula, Aualari iele va ka. Ara ikivere ka e ovehahu momorapukive. 21E va Aualari ve hekako i ovehahu ve la hekako ila hoa haroapo larive hovea ka — E Aualari ve eapai i ovehahu ve eapai ila hoa haroapo larive hovea ka. 22Elaviila ikivere Aualari elaro ikiheaha leikive ha? Elaviila aheke, Aualari va mahuka ha?
23Eharu oaria ara va leivahaeakive, hovea, pupu ka, aka la eharu oaria la leivahaeakilava, veveke koara va ka. Eharu oaria leivahaeakive heroe, aka la eharu oaria hareho araro o iele lei veveke leivahaea va ka. 24Haela oaria elarelare ikivere eharu hiki kelava v'arekaea, aka haela ae ve ikivere okiharo kelavakive, heroe. 25Karikara ilaea leipe la eapai oaria le hiki, horahora va arekaea, arev'ila apevelavela kalaivahaelue. 26Ehovea meahaiapo i areve eharu oaria ila Amua ve eharu la. 27Ekalesia au laila haela ero eapai la itavakilava, e va pekakive ikivere la leikilava, ere ero aiaraki la eapai le hiki, iki horahora v'arekaea. 28Aka ero eapai aiaraki la haela ero maria la maeakilava, Ma va hohao harihu aiarape hehe eapai, Leia ka lalava?-?haealue, ehovea e i are ila hareho iki hahaeae leivahaeaki ave. Ehovea e i are ila hareho iki hahaeae leivahaeaki ave. Ehovea meahaiapo i areve eharu oaria ila Amua ve eharu la. 29A havahu ve ka, aka haela ae ve iki haeae leiki ave, ehovea arave oki haela ae ve ikikekela leve heheavakive? 30O iele, ara va ikiheroe meru v'ila la eapai herehere la larilava, ara va la eapai lei morapaeaki la hoa, haela araro la horova vil'a o heaha leve maeakive?
31E va eapai aka ma la larilava, aka horova ae la leikilava, eharu oaria ve, Aualari ve rare morapaeaki. 32Jew haela kai ita lahua haela, kai Aualari ve ekalesia haela ka hereavalue. 33Ara kara laria: ara va eharu oaria v'ila haela lei iki veveke leikilai, ehovea ara elare ikivere eharu haropa va ka, aka haela oaria ve, ehovea erero lei makukurikive.
Currently Selected:
1 Corinth 10: ORO
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society 1963-1972