1 Corinth 12
12
Ove meru lahua lahua ve iele haroapo
1Ove ve la oharo, ara va ikivere e haveva va kalaivahaelue. 2E va ore, e va ita lahua haela; oropa e va harihu lahua lahua momorapupe. La harihu eharu oaria ero au amuraeape. 3Laelave, ara ero kirive, Aualari ve Ove ila oharo avila haela, Iesu ve rare heaha rare e va ka. Aeka, haela va Ove Veveke ve la okiharo ve hiki Iesu Amua rare arilai.
4Ikiore meru lahua lahua va oaria, aka Ove va haroapo. 5Horova kara lahua lahua oaria, aka Amua haroapo hiki aeave. 6Horova ve okiharo oaria apearo, aka Aualari haroapo hiki la okiharo va kiva leivahaevila. 7Ove ve iele haela oaria aeakila, ehovea erero lei mekaka leivahaeakive. 8Ehovea Ove va haela ve ikiore la avarakilai; haela aea va ore leiki okiharo aea la Ove avarakilai. 9La Ove haela ikikekela veveke avarakilai, haela ae maea veveke leikive la horova. 10Haela ae va ikiore horova aea, haela ae va peroveta horova; haela ae ove lahua lahua ore leikive; haela ae va uri lahua lahua; haela ae va uri helarikive. 11Aka ma eharu oaria Ove haroapo hiki aiaravila: Ove ve ikivere hovea haela lahua lahua aiaravila.
Maea ve ukuku ve ihova
12Ehovea, hovea hovea, maea haroapo va ukuku oaria ila, aeva la ukuku hareho korukaeai maea haroapo hovea leivila, Keriso kara laria. 13Elaviila hareho maea haroapo hovea leivila, ehovea Ove haroapo elaviilara bapatiso leivahaeape: Jew haela i Ita lahua haela oaria hareho: au hahaeape haela i overa paparaehape haela ila. Elaviila oaria hareho Ove ma haroapo herehere lalavahaeape.
14Ehovea maea va hakaea haroapo hiki ka, areve iele hakakaea oaria. 15Lehae, loa maria la maeakilava, Ara mai va ka, laelave ara maea ve eharu va ka; are iele maea ve eharu ka ha? 16Avako maria la maeakilava, Ara ovohae va ka, laelave ara va maea ve eharu va ka; are iele maea ve eharu va ka ha? 17Maea hareho ovohae hiki la leikilava, are va learia iapakilai ha? Are va hareho avako hiki la leikilava, are muo learia koakilai ha? 18Aka Aualari ikivere leipe hovea, are maea ve eharu lahua lahua oaria karikivahaeape. 19Ere oaria hareho hakaea haroapo hiki la leikilava, maea laria lei aeakilai ha? 20Ere va maria: hakakaea oaria va maea haroapo hovea hovea leive. 21Ovohae mai maria maea va ka, Ara aro ikivere lei va ka. Haro maria loa maea va ka, Ara ealilara kekela va ka. 22Iele havahu, mahuka leilula la maea ve ukuku, erero kara maea ikivere eapapo leive. 23Elaviilave ikikekela veveke havahu ka la maea ve eharu, elaviila momorapulula. Elaviilave maea ve eharu heaha ere va mekaka hovea leivahaeakive. 24Ehovea elaviilave maea ve ukuku mekaka, ere va mekaka overa leivahaeape: aka Aualari maea veveke maria karikipe, ehovea mekaka aue la ukuku are kai momorapupe. 25Laelave, maea ve ukuku lahua lahua leivahaea va ka; aka la ukuku elarelare kiva leivahaeakilai. 26Maea ve uku ae va kakare la leikilava, uki oaria hareho kakare leivahaeakilai. Maea ve eharu ae va veveke la leikilava, maea ve eharu oaria are i hareho ikiveveke leivahaeakilai.
27E oaria Keriso ve maea. E va areve maea ve eharu oaria. 28Aualari ve ekalesia haela uku are va aposetolo leivahaeape, uku peroveta haela, uku kilea haela: aireaki va horova lahua lahua haela, maea veveke leilula haela, koaraki haela, aka horova kiva leivahaelula haela, uri lahua lahua ore haela. 29Haela oaria hareho aposetolo horova leilula ha? Haela oaria va kilea haela ha? Haela oaria horova lahua lahua oaria ore ha? 30Haela oaria maea kakare veveke leikive ore ha? Haela oaria uri lahua lahua hovea leivahaelula ha? Haela oaria uri helariki va ore ha? 31E va ikiore mekaka hiki ikivere leivahaeaki: Aka ara ero okiharo veveke iele kileakilai.
Currently Selected:
1 Corinth 12: ORO
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society 1963-1972