1 Corinth 5
5
Mai haeae ve hari aea
1Haela e v'ila arula, eve leia haela uku airi pavora mai leilula, aeva la airi pavora mai va heaha havahu iele, ita lahua haela kara ikihairihairi havahu la mai heaha: ehovea haela ae areve oa ve uva laeape la! 2E kara pelaea leilula — ikihuru au leila, aeva ikivere au leila ma haeae leipe haela avakakive.
3Ehovea, o iele, ara va maea va apehai, aka ove e i hareho aeavila, lahovea ara haeae leipe haela heheavakive oharo overa maeape. 4Iesu Keriso, elaviilave Amua ve rare v'ila, e va haela oaria ve korukaiavahaeaki hoa, ara va ove v'ila e i hareho la hoa, lahovea haela, Iesu Keriso ve aheke v'ila, 5Satan avarakive, ehovea maea hai ka leiki la hoa, ove ovokake leikilai, Amua Iesu ve hare.
6Eve pelaea mai veveke va ka. E va haveva ha? Yeast perehekai iele — flour maeakoko lei veveke leikilai. 7Overa la yeast aukapakive, heroe: e va flour maeakoko veveke havahu leikilai. E va yeast au lalamukikila la flour hovea. Ehovea o iele Keriso elave arura mamoe; Ere arero hape ehovea elaviila havahu. 8Laelave, elaviila hurae iele leivahaeakilai, overa la muramura v'arekaea, aeva ikiheaha i mai haiae ila v'arekaea, aka muramura helariki aue la flour va iele, iki ehoe, i o iele ila.
9Ara ero overa paraeape oharo maria, Airi pavora leilula la haela i hareho ka loalue, 10aka meahaiapo ve la airi pavora mai leilula haela, aeva korea haela i korea ikivere leilula la haela, kai Aualari lahua momorapulula haela ila, e erero hahaure havahu lei va hovea ka, ehovea laria e meahaiapo apeaki oki karia. 11Aka ara ma hoa ero oharo maria paraeaive, Ekalesia ae va airi pavora mai, aka korea mai ikivere laleikilava, aka Aualari lahua la kekelakilava, aka ma heaha la larikilava, aka korea iele la leikilava, lahovea haela koarai auvahaea v'arekaea; o iele, are i hareho eapai ka lalavahaelue. 12Ehovea, mahokaea ve la haeae haela heheavakive, la va arave horova ka. Aka, e havahu ekalesia haela iele heheavakive va heroe. 13Mahokaea ve la haela, Aualari havahu heheavavila — laelave, eve la haeae leivila haela avakakive heroe.
Currently Selected:
1 Corinth 5: ORO
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society 1963-1972