Horova 13
13
Antioch Ekalesia
1Antioch apearoape ekalesia ve peroveta i kilea haela uku — Barnabas, Simeon rare aea Niger, i Lucius Cyrene haela, i Manaen, Herod Tetrarch ve apoheari i Saul ila. 2Ere Aualari ve horova lei erereape hoa — Ove Veveke maeaeape, Barnabas i Saul ila ara v'ila hareavaki — ehovea ara erealilara maeaeape horova leikive. 3Ere ere erereai ivaiva lei erero mai kohari le paparaehape.
Barnabas i Saul ila Cyprus leia
4Laelave, Ove Veveke erealilara paparaehai Seleucia auvahaeape. Erealila leia harepai Cyprus vevaea ve horeavape. 5Erealila Salamis pekai Aualari ve oharo Jew haela ve synagogue iroro ape. John erealilara koarai aupe. 6Ere la hiru ve ita oaria aiai Paphos pekai, harea haela, opore peroveta haela, Jew haela, rare Bar‐Jesus eavape. 7Are Sergius Paulus, gavana haela, ikiore haela, i hareho aeaveape. La haela Paul i Barnabas ila itavape ehovea Aualari ve oharo iapakive. 8Aka, la harea haela, Elymas (areve rare ve iele la) erero au hereavape, ehovea are ikivere gavana haela amuraea hereavakive. 9Saul, rare aea Paul, Ove Veveke avi arero ovohae auhohi eavi mari maeape. 10A hehepo oaria i mai heaha leivila haela, haelaharihu ve akore e, mai ehohoe oaria ve iri haela, a va Amua ve okiharo ehoe hereavaki karia lei va ka ha? 11Iapai — Aualari ve mai aro le paeaive, a va ovohae kariri lei hare uku a hare eava va ka. La hoa havahu areve ovohae oro‐oro i murumuru leivahaeape, are aula kelari arero lai auki haela haropape. 12Gavana haela laria eavi ikikekelape, ehovea are Amua ve kilea mai ve ikihorahora le leipe.
Pisidia Antioch hahi: Paul Jew haela oropa ve la iroro
13Paul i hareho loaloape haela Paphos vevaea horeavi Perga, Pamphylia ve karikara aupe. John erero haitapai Jerusalem aupe. 14Erealila Perga hakurepai Antioch, Pisidia karikara pekape. Ere sabati hare synagogue pekahavi avape. 15Pupu oharo oropa mureape, aire hehe uvi ve amua erero oharo mari paraeape, Apavara, e va ikivere haela ve iroro arive, e la. 16Paul urai mai ve laruape kai maria ape. Israel haela i Aualari kelavalula haela, iapaila: 17Ma Israel haela ve Aualari elave houva hoa haela ikivere leivahaeai, ere Egypt apearoape la hoa, erero lei momorapupe kai mai aheke ila erero kari aupe. 18Hitolo 40 hovea are ereve huakara leivahaeape mai hahaeae oaria v'ila iki kakare leipe. 19Ereve Canaan apearoape vilaipipi 7 hai kari lei erero la ita ere v'ila avarape, hitolo 450 ve hovea. 20Aireaki are erero heheavaki haela aiarape, aiai peroveta haela Samuel. 21Aireaki ere amua ve velavela leivahaeape, laelave Aualari erero Saul, Kish ve akore, Benjamin eravo haela la avarape, aiai hitolo 40 ve. 22Aireaki are arero hareavi David ereve amua ve urapape. Are are v'ila mari vavavape, Ara va David, Jesse ve akore, ara iki havahu haela va arave ikivere horova leikive koarape. 23Ma haela ve meavohula v'ila Aualari, areve okoare hovea Israel ve Ovokake leiki haela Iesu avarape. 24Areva aire ekepe, John oropa mai hahaeae ve ikihuru lei hapururukakive la iroro ape. 25John ve hoa maeamaea karia leipe la hoa are mari ape, Eve iki lehae — ara leita ha? Ara are va ka. Iapai, arave aireaki ekeki la haela ara va hovea ka areve loa iilu hehelaukakive.
26Apavara, Abraham ve meavohula i Aualari kelavalula haela — ma ovokake ve oharo elaviilara aikiarape. 27Ehovea Jerusalem apealula la haela i ereve amua haela ila, ehovea ere arero haveva, kai sabati hare murealula la peroveta haela ve oharo kara ere ore au leila, ere arero ha, la oharo iele le leipe. 28Ere arero harive haeae iele au koaraila, aka ere ikivere Pilate apevelavela leikive arero harive. 29Ere are v'ila hape la eharu oaria leivahaeai karia lei arero ikava karu le ihape. 30Aka Aualari arero apape hoa ve lai urapape. 31Hare perehekai oaria are i hareho pekahavape la haela oaria arero eavape — ere va ma hoa haela ve oropa ve are v'ila vavavahaelula. 32Ela vilali haela maeaeape la okoare ve oharo veveke e v'ila aikero. 33Aualari elaviilave akoremari v'ila la oharo iele lei horerape, ehovea are Iesu kai urapape — Psalm 2 hape la oharo ka laria:
A va arave Akore
Ara aro ma hare la epaila.
34Eva arero apape hoa ve lai urapape la oharo v'ila are mari ape:
David ve hehe meru veveke iele ara aro avarakilai.
35Ehovea are Psalm aeva maeape:
Ave Hehe Haela a va poae leikive avara va ka.
36Ehovea David are havahu ve vilakao ve Aualari ve horova lei le apape; 37Aka Aualari lai urapape la haela iele au apaila. 38Apavara, e oaria ore leivahaeaki, ma haela ila ero mai heahaha ve hapururukaki oharo le maeaeape. 39Are v'ila kara ikikelavalula haela oaria lei ehohoe leivahaeakilai, e va Moses v'ila laria ehohoe leivahaea va ka. 40E kiva leila, peroveta haela maeaeape la eharu e v'ila kihoreraki ave:
41Hahaure leilula haela eavi, ikihorahora leivahaeai apihaeakilai,
Ehovea ara eve hoa horova leivila:
Haela ero la horova hihika la amoeakilava, e va iele kekela va ka.
42Jew haela synagogue mahokaea ve hoahukape la hoa — ita lahua haela arero here leipe, ma oharo aireaki sabati hare kara iroro arive. 43Synagogue ivaiva karia leipe la hoa Jew haela oaria i Jew haela ve mai auhohi kiva leivahaealula ita lahua haela kara, Paul i Barnabas i hareho auvahaeape. Erealila ape karava erero maeaeape — Aualari ve mai ehoe v'ila apeakive.
Aposetolo haela ita lahua haela ikivere leivahaeape
44Aireaki la sabati hare karikara haela oaria hoa haroapo korukaiavahaeape, ehovea Aualari ve oharo iapakive. 45Aka Jew haela haela oaria eavi ikiheaha leivahaeai Paul ve oharo huelapai, o heaha oaria maeaeape. 46Paul i Barnabas ila ape karava maeaeape, Veveke ela Aualari ve oharo ero oropa maeaeakilai. Ehovea e va la oharo hahaure leivahaeai elare ovokake haiapo hoveahovea leivahaeakive kekela va ka. Iapaila — ela helari ita lahua haela kileavahaeakilai. 47Ehovea Aualari elaro ape karava lari kimaeape
Ara aro ita lahua haela ve ovava leipe,
Ehovea e va meahaiapo ukai ukai ve ovokake leikilai.
48Ita lahua haela ma oharo iapai ikiveveke leivahaeape. Ovokake haiapo ikivere leivahaeape la haela ikikelavape. 49Amua ve oharo la ita hareho kopurapape. 50Aka Jew Haela, ivaiva kiva leilula Amua ve uavila i karikara ve oropa haela au amuraeape ehovea Paul i Barnabas ila hararuakive; ere erero ereve hoa ve haruapape. 51Aka ere ere v'ila elare loa kekele ve mahumu loa hara ve lalaeapai Iconium auvahaeape. 52Kilea haela Ove Veveke v'ila ikiveveke leivahaeape.
Currently Selected:
Horova 13: ORO
Highlight
Share
Compare
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
