Horova 15
15
Ita lahua Ekalesia haela i Moses ve pupu ila
1Uku haela Judea ve ekevahaeai apavara maria kileavahaeape, E peritome leiki aue la leikilava Moses ve pupu hovea, e ovokake leivahaea va ka. 2Paul ere i hareho oharo hahari oaria avahaeape, laelave apavara Paul i Barnabas i uku haela ila Jerusalem aposetolo haela i haela hoaha ila ma oharo hukavaki pekakive maeaeape. 3Laelave ekalesia uku erero perehekai koarai auvahaeape ere Phoenicia i Samaria ve la oki auvahaeape hoa, ere ita lahua haela ikihelarivahaeape la oharo maeaeai, apavara oaria iki veveke eapapo leivahaeape. 4Ere Jerusalem pekahavi ekalesia haela i aposetolo haela i haela hoaha ila erero eavi Aualari ere v'ila leivahaeape eharu oaria ve oharo iapape. 5Aka Pharisee ikikekela haela uku urahuka maria maeaeape, Veveke e va erero peritome mai, Moses ve pupu kiva leikive maeaeakive.
Jerusalem Ekalesia ve Council
6Aposetolo haela i haela hoaha ila ma oharo ikikekelakive korukaiavahaeape. 7Ere va oharo oaria hukavi Peter urai erero maeaeape, Apavara, e v'ore, oropaki la hoa Aualari e v'ila araro hareavape, ehovea arave ape v'ila ita lahua haela oharo veveke iapai ikikekelakilai. 8Iki ure ore Aualari, ere v'ila vavavape: are erero Ove Veveke avarape, ela avape hoveahovea. 9Are elaro oaria hoveahovea kelavape, kai erero ikikekela v'ila iki veveroro leivahaeape. 10Laelave e Aualari kamuraealue — elave vilali i elaviila kara hoveahovea au leila la pupu erero kahahaealue. 11Elave ikikekela ela Amua Iesu ve ikiheroe meru ovokake leivahaeakilai — ere kara laria.
12Haela oaria muruha hiki apeape. Ere Paul i Barnabas ila ve oharo iapape — Aualari ere v'ila ita lahua haela ve ihova i horova ehoaha leivahaeape la oharo. 13Ereve oharo kari leipe la hoa James kavale maeape. 14Apavara, arave oharo iapai — Symeon overa kileape maria, Aualari ita lahua haela oropa eavavahaeai ere v'ila areve rare ve vilaipipi aeva hareavakive. 15Ma oharo peroveta haela ve oharo kara hoveahovea ape maria:
16Ma eharu karia lei ara aeka helari aukilai
David ve au hilaupe la Hehe Uvi kai kukive.
Areve la hakakaea ara aeka veveke lei urapakilai.
17Ehovea kepea haela oaria
I arave rare ve itavavahaelula ita lahua haela kara
Amua laria maeaive: eharu oaria leivila Amua.
18Eharu oaria avare koai meahaiapo ipopeavape hoa
Ikiki mahau kileavahaevila la Aualari ve oharo laria ape.
19Laelave arave ikikekela maria — elaviila Aualari ikikelavalula la ita lahua haela elaviila leve hararuakive. 20Elaviila erero maria oharo hiki paraeakilai. Ere va harihu eharu ve hirihiri i mai heahaha oaria i au haiharoape la eharu i apu ila hahaure leivahaeakilai. 21Ehovea overa vilakao ikiki mahau Moses ve iroro arula i synagogue ureve oharo murealula haela apealula.
Ita lahua Ekalesia paraeape hohoa
22La hoa aposetolo haela i haela hoaha i ekalesia haela oaria ila hareho ve kekela ere v'ila haela uku hareavakive ehovea Paul i Barnabas ila hareho Antioch paparaehakive. Ere apavara ve oropa haela rare Judas, rare aea Barabbas i Silas ila, paparaehape. 23Ere erealila v'ila hohoa hai paraeape maria: Aposetolo haela ikiheroe oharo paparaeharo: 24Ehovea ela iapape ela paparaehape uku haela ereve oharo v'ila ero amuraeai hararuape: ela erero la oharo au maeaila. 25Ela iki haroapo hovea leivahaeape, laelave elave ikikekela veveke uku haela hareakive Barnabas i Saul ila, elave ikivere havahu apavara hareho auvahaeakive. 26Erealila Iesu ve rare v'ila heraho eapapo oaoka au leila. 27Laelave ela Judas i Silas ila paparaeharo: erealila ma oharo hoveahovea ape v'ila ero maeaeakilai. 28Ehovea ela i Ove Veveke ila hareho ero pupu mehau oaria aiarakive ikivere au leila, ma pupu haroapo haroapo hiki. 29E va harihu aiarape eharu i apu i haihaharoape eharu i korea mai ila oaria hareho hahaure leivahaeakive. E va ma mai hahaure la leivahaeakilava, e veveke koaravahaeakilai. E havila i apeaki.
30Erero paparaehape la hoa ere Antioch auvahaeai haela oaria leia korukaiavahaeai hohoa le avarape. 31Ere la oharo murea areve hakakaeaki oharo v'ila ikiveveke leivahaeape. 32Judas i Silas ila, ehovea erealila peroveta haela, oharo oaria v'ila apavara oaria kileavahaeai lei aheke leivahaeape. 33Erealila perehekai haiapo apeapea leia ekalesia haela erero havila ila kipaparaehape, aiai erero paparaehape la haela. 34Silas ikivere leia aeakive. 35Paul i Barnabas i haela perehekai oaria ila kara, Antioch apeapea Amua ve iroro oharo ape.
Paul i Barnabas ila lahua lahua leivahaeape
36Hare uku karia lei Paul Barnabas maeape, Elavaila Amua ve oharo kileavahaeape la ita oaria aeka auvahaeai karikara oaria ve apavara ve mai ore leivahaeakive. 37Barnabas ve ikikekela John, rare aeva Mark, lai aukive. 38Aka Paul ikivere au leila ehovea are erealilara Pamphylia haitapai erealila ve horova oaria au koaraila. 39Erealila oharo hahari ape, laelave erealila lahua lahua auvahaeape. Barnabas Mark lai ai Cyprus aukive ve vevaea horeape. 40Paul Silas ikivere leipe. Apavara erealilara Amua ve ikiheroe ve ivaiva leivahaeai le paparaehape. 41Are Syria i Cilicia ila hahi lei ekalesia oaria lei aheke leivahaeape.
Currently Selected:
Horova 15: ORO
Highlight
Share
Compare
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
