Horova 20
20
Paul — Macedonia, Greece i Troas ila ve hahi
1Ikihahika kari lei Paul ikikelavaki haela itavavahaeai ape karava maeaeai haitapape, kai Macedonia ve ukaki aupe. 2Are la ita oaria ovohae eavi erero aheke leivahaeai Greece hoaupe. 3Are leia papare 3 aiai Syria ve elaukive kekelape la hoa, Jew haela arero mai paeakive oharo kelavape, laelave are Macedonia ve oki aupe. 4Sopater Beraea haela, Pyrrhus ve akore, i Aristarchus i Secundus ila, Thessalonica haela, Gaius Derbe haela, i Timothy arero Asia hoa ve koarai auvahaeape. Asia haela kara, Tychicus i Trophimus ila. 5Aka ma haela oropa auvahaeai Troas elaro karipe. 6Muramura aue pai ve hurae oropa lei, ela va aire Philippi vevaea horeavi hare 5 hovea Troas pekahavape. Ela leia hare 7 apeape.
Eutychus
7Sabati hare ela oaria pai haivavaelakive korukaiape la hoa Paul erero oharo kileavahaeape, ehovea are va ikivere la opoa hare horerakive: are oharo heaikiapo hukavape — aiai oroa a hihi hoa. 8Ela korukaiavahaeape la akea lalava ovava oaria ila. 9Harokou haela rare Eutychus, okiape hekai ureve haiavape. Are ovohae au hoeape — Paul oharo haiapo hukavape, laelave are avuku havahu la uavi, akea ve lalava ve ipi oai ere arero huru le kaivape. 10Paul hoai areve akea ekaopi arero mai hahavi mari maeape, Ikihorahora kalailue, ehovea areve ovokake le aeave. 11Are pekai pai haivavaelai lape, kai ere i hareho oharo heaikiapo hukavi aiai mea opaki hoa kai le aupe. 12Ere akore ovokake lai pekai ikiveveke leivahaeape.
Miletus hahi
13Ela vevaea ve oropa horeavi Assos auvahaeape, ehovea elave ikikekela Paul vevaea leia horerakive. Areve oharo lari ape, ehovea are havahu va ikivere huru oki aukilai. 14Are elaro Assos koarai kihorerape. Ela oaria hareho Mitylene auvahaeape. 15Ela leia harepai horeavi la opoa hare Chios pekape, kai avea hare Samos au hiki pekai eavi, itovea hare Miletus pekape. 16Paul Ephesus pekakive ikivere au leila, ehovea are Asia haiapo aeakive ikivere au leila. Are elavelave aupe, ehovea are va ikivere Jerusalem Pentecost hare pekakilai.
Paul Ephesus Ekalesia Miletus leia hita iroro ape
17Are Miletus ve leia Ephesus oharo paraeape, ehovea ekalesia ve haela hoaha areve leia korukaiavahaeakive. 18Ere iki areve leia are erero mari maeaeape:
E havahu ore, ara Asia avare koare pekape la hoa ikiki mahau ara e v'ila leari mai leivahaeape. 19Ara maioka i o ma oaria ila Aualari ve horova leipe, heraho eapapo ehovea Jew haela ve hararuaki mai oaria. 20Ara oharo i mai veveke ila ero karikara hihi ve i uvi oaria ureve ero kileakive oaoka au leila. 21Ara Judea haela i Greek haela ila hareho Aualari v'ila haeae ve ikihuru leiki mai i Amua Iesu Keriso ikikekelaki mai ila auhohi kileavahaeape. 22Iapai — Ove araro lahahaila, ehovea ara va Jerusalem pekakive. Ara ore va ka leia ara learia heaha koarakilai. 23Ara va ore hiki karikara oaria ureve Ove Veveke araro iki ureve kileavila, ara va aireaki au hahaeaki eharu i kakare oaria koarakilai. 24Ara maea ve ovokake ara v'ila kekela ka. Ara va ikivere arave horova karia auhohi leikilai — ara va ikivere Amua Iesu araro avikiarape la horova, Aualari ve ikiheroe meru oaria hihiki auhohi leivahaeakive. 25Iapai, ara v'ore e oaria, ara basileia ve oharo kileavahaeape haela oaria, arave oropape aireaki eava va ka. 26Laelave ara mahau eve oropa ve maeaeaive, ara haela oaria ve apu v'ila veveroro. 27Ehovea ero Aualari ve oharo oaria kileakive ara oaoka au leila. 28E elare mai i ekalesia haela oaria ve mai v'ila kiva leivahaeaki; ehovea Ove Veveke ero hareavape ehovea are elare apu v'ila ilaea leipe Aualari ve ekalesia kiva leivahaeakive. 29Ara v'ore, ara ero oropa haitapakive, aireaki mamoe ikiheroe leivahaeaki aue avita merava aeha iele e i hareho pekahavakilai. 30E havahu ve haela uku kara urahuka opopoe oharo hukavakilai, ehoe ekalesia haela amuraeakive. 31Laelave, kiva auhohi leivahaeaki. Iki mari kelavaila, ara va hitolo 3 hovea hare i oroa ila, o ma ila, ero mea oaria auhohi kileavahaeape. 32Mahau ara ero Aualari ve oharo iapakive maeaeaive, areve ikiheroe oharo iele: la oharo kara areve basileia eharu veveke aiarakilai: la oharo iele. 33Ara haela ae ve silver i gold i pura ila ikivere au leila. 34E havahu ore, arave mai ve horova ara i hareho loaloape haela ve ikivere eharu hovea koarape. 35Ara ero eharu oaria v'ila ihova aiarave. E va laria leivahaeaki — mahuka haela koaravahaeaki: Amua Iesu ve oharo kara ikikelavaila maria — eharu avaki mai va veveke perehekai, avaraki mai va veveke iele.
36Are la oharo avi loa ari haiavi ere i hareho ivaiva leipe. 37Ere oaria hivavara i areve karave mai hahavi overa hihipe. 38Ere va ikihuru eapapo leivahaeape ehovea are erero maeaeape — ere va areve oropape aireaki eava va ka — ere arero koarai auvahaeai arero vevaea le paraeape.
Currently Selected:
Horova 20: ORO
Highlight
Share
Compare
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
