Horova 23
23
1Paul council haela auhohi eavi mari maeaeape, Apavara — ara Aualari oropa ve iki ehoe ila aeaveape ikiki ma hare. 2Aka oharo haela Ananias arero ape koakive maeaeape. 3Paul arero maeape, Ava oropape hiki veveke āra hovea. Aualari aro aire koakilai. A va araro pupu v'ila heheavakive leikila, ehovealeve a araro koakive lamaeaeaila, pupu iele laria ka. 4Are i hareho epavape haela maeape, A Aualari ve akea oharo haela o heaha leve maeakive. 5Paul maeape, Apavara — ara haveva are va akea oharo haela — Ehovea overa hape pupu maria, A va haela ve amua haela o heaha kamaealue!
6Aka Paul ovohae eavape uku haela va Sadducees uku va Pharisee haela, are āra hai council ureve itavape Apavara — ara Pharisee haela, Pharisee haela ve akore. Ere araro hahape iele ehovea api kai uroukive la oharo. 7Are la oharo avi Pharisee i Sadducee haela ila oharo hahari avahaeai council le kovaelape. 8Ehovea Sadducee haela mari arura, Apihaeape haela urahuka va ka, aeva aneru i ove ila kara karia. Aka Pharisee haela la eharu ikikelavalula. 9Ikihahika eapapo leipe. Uku Pharisee ve hohoa haealula haela urahuka mari maeape, Ela ma haela ve haeae eava va ka — ove aka aneru arero oharo maeape — heaha lahoa ha? 10Ere hahari eapapo leivahaeape — laelave akea kapena ere Paul mihuamahua leiki ave — are soldier oharo paraeape, arero mai pai hareavi gavana uvi ureve kai pekakive.
11La opoa oroa — Amua areve maea iele epavi mari maeape, Ikiveveke leila — a ara v'ila Jerusalem vavavape — a ara v'ila Rome kara laria vavavakilai.
Jew haela Paul harive oki haropape
12Hare hoa Jew haela oaria hareho korukaiavahaeai okoare aheke mari avahaeape — ere va eapai i ma ila lalavahaea va ka aiai ere Paul harilai. 13Ma okoare avahaeape haela va 40 hovea. 14Ere oharo haela i haela hoaha ila ve leia auvahaeai mari maeaeape, Ela va okoare aheke iele avahaeape — ela eapai i ma ila lalavahaea va ka aiai ela Paul harilai. 15Mahau e council haela ila hareho akea kapena harapaila oharo mari paraeaki — are arero eve leia lai hoaukive, ehovea Paul ve la oharo auhohi heheavakive. Ela muruhari apeapea areve maeamaea ekeki la hoa ela arero harilai.
16Aka Paul ve arivu ere arero muruhari karikilai la oharo iapape. Are ai gavana uvi pekai Paul la oharo kileape. 17Paul kapena haela aeva itavi maeape, Ma akore hela akea kapena ve leia lai auki — ehovea are va arero maeaki oharo le aeave. 18Are arero akea kapena ve leia lai ai mariape, Paul, uvi muru aeavila la haela, araro velavela laleila ma harokou ave leia lai aukive: are ikivere aro oharo perehekai maeakive. 19Akea kapena arero mai pai lai ai muruhari velavela leipe, A va ikivere araro leari oharo kimaeakive ha? 20Are maeape, Jew haela elare oharo mari hukavape. Ere aro harapaila velavela leikilai — a va opoa Paul ereve council ve leia lai aukive, ehovea areve la oharo auhohi heheavakive. 21Ereve oharo kaiaparue. Ehovea haela 40 hovea arero muruhari la kariro — la haela okoare laila, ere va eapai i ma ila lalavahaea va ka aiai ere Paul harilai. Ere mahau hovea laila, ave okoare hiki la kariro. 22Akea kapena harokou parae arero mari maeape, A araro lakimaeaila ma oharo haela ae kamaealue.
Paul Caesarea paraeape
23Are hevehe centurion orahokaila itavavahaeai mari maeaeape, Hevehe 200 i horse ila haela 70 i lape ila haela 200, elare hahi maea overa kariki, ehovea oroa 9 o'clock Caeasarea aukive. 24Are erero horse aea avikekive ehovea Paul areve akea ve horeavi, ovokake ila gavana eapapo Felix ve leia lai aukive. 25Are hohoa mari hape,
26Ara Claudius Lysias aiai Felix gavana eapapo mekakure Ikiheroe. 27Ma haela Jew haela kaivi arero harive haropape. Aka ara i hevehe haela iki ereve leia ve arero hareavi ore leipe are Rome basileia haela. 28Ara va ikivere ere arero hahape oharo iapakive, laelave ara arero council ve leia lai hoaupe. 29Ara iapape ere ereve pupu v'ila arero hahape. Aka arero hahape la oharo arero harive i uvi muru paraeakive hovea ka. 30Ara kai ore leipe ere oharo muruhari hukavape ehovea arero harive. Laelave ara arero elavelave ave leia paraeaive — ara arero hahape la haela kara ereve oharo ave leia hukavakive lamaeaila.
31Hevehe haela areve oharo iapai Paul hareavi oroa hoa arero Antipatris lai aupe. 32La opoa hare ere horse ila la haela hiki arero lai aukive haitapape, ere havahu helari gavana uvi le pekahavape. 33Ere iki Caesaria leia gavana eapapo hohoa pepa avara Paul kara areve oropa ve lai aupe. 34Are la oharo murea velavela leipe, Areve gavana hiru lahoa. Are iapape are va Cilicia haela. 35Laelave are maeape, Aro hahape la haela la ekevahaeakilava, ara ave la oharo iapakilai. Are erero maeaeape arero Herod ve Praetorium ureve kiva leikive.
Currently Selected:
Horova 23: ORO
Highlight
Share
Compare
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
