Horova 7
7
Stephen ve iroro oharo
1Akea oharo haela maeape, La oharo iele ha? 2Stephen maeape, Apavara i oa lou haela ila iapai — Aualari mekakure, elaviilave vilali Abraham Mesopotamia aeaveape la hoa areve oropa ve kihoaupe. Ma va oropa hoa, Abraham Haran aireaki aeaveape. 3Are arero maeape, Ave la ita i apavara ila haitapai, ara aro amoeakilai la ita aukive. 4Are Chaldean haela ve la ita harepai Haran aeaveape. Areve oa oropa api aireaki Aualari arero e mahau apealula ita kai kiparaeape. 5Are arero mea havahu au avaraila, kaire, areve loa epavape la ita au avaraila. Are va arero okoare mariape — are va aireaki avarakilai — are i areve meavohula ila, aka la hoa are va akore karia. 6Aualari mari maeape — areve meavohula ita lahua apeakilai. Ere va horova ahea iele ita heaha iele apeapea hitolo 400 hovea. 7Aualari mari kara maeape, Erero hahaeavahaeape la vilaipi ara heheavakilai — aireaki ere kihoahukai ma ita ve arave horova leikilai. 8Are arero peritome la okoare avarape. Laelave Abraham Isaac epape kai areve hare 8 hoa arero peritome mai leipe. Isaac Jacob epape: Jacob elaviilave vilali haela 12 erape.
9Vilali haela Joseph hihiri lei Egypt ilaea lei paraeape. 10Aualari arero koarai ai areve heraho ve hareavi Pharaoh, Egypt ve amua, oropa ve le morapaeape. Are arero areve uvi i Egypt hareho ve kiva haela leipe. 11Egypt i Canaan ila mea avora leipe, heraho eapapo iele. Elave vilali haela eapai au koaraila. 12Aka Jacob eapai Egypt aeavila iapai, elaviilave vilali haela oropa hoa paparaehape. 13Aire hoa Joseph areve maea huhohoaha oropa ve hihika leipe. Pharaoh kara Joseph ve huhohoaha ore leivahaeape. 14Joseph areve oa Jacob i apavara oaria ila, haela 75, itavavahaeape. 15Jacob Egypt hoai aireaki le apape. Are i elaviilave vilali haela kara. 16Ere erero Shechem oraiavi auvahaeai, Abraham Hamor Shechem haela kavale leipe la kapu ita, karu le ihahape.
17Aualari Abraham okoare maeape la hare kihorera maea iele, la hoa Egypt apearoape la haela aheai haela oaria le leipe. 18Amua lahua Egypt kiva leipe, are Joseph haveva. 19Are elaviilave haela au amuraeape, kai elaviilave vilali heaha leivahaeape, ereve akoremari aikilapaki haeakive maeaeape, akoremari ovokake leiki ave. 20Moses la hoa epape, akore veveke iele. Ere arero oa ve uvi papare three kiva leipe. 21Arero mea paraeape la hoa Pharaoh ve mari arero laeai elare akore havahu le leipe. 22Moses Egypt haela ve ikiore oaria le avape — are va ape i horova v'ila aheke leipe.
23Are va hitolo 40 hoa, areve iki kekela elare apavara Israel akoremari ovohae eavakive. 24Are ereve kakare leipe haela ae eavi koarape — arero koape la haela are kavale koa le hape. 25Areve ikikekela areve apavara ore leipe — Aualari areve mai v'ila erero ovokake leivahaeakilai: aka ere va iki auhohi au kekelaila. 26La opoa hare are kihoai ereve haela hahari arula eavape. Are ikivere erero hereavakive kai mari ape, Haelakaru, e va apavara elarelare hahari ehovealeve ha? 27Aka areve apavara haeae leipe la haela arero huikapai mariape, Aro elave amua i heheavaki haela leita leipe ha? 28A va ikivere araro harive, a haila hare Egypt haela lahila hovea hovea ha? 29Moses ma oharo iapai oaoka lei hukaupe. Are va Midian ita aeai akoremari orahoka erape.
30Hitolo aeva 40 karia lei, Sinai ve huakara ve, aneru haroapo kora ve huhuraki aue a ureve areve oropa ve ekepe. 31Moses laria eāvi ikihorahora leipe, are iki maeamaea ovohae eavi Aualari ve āra mari iapape, 32Ara va ave papa ve Aualari, Abraham i Isaac i Jacob ila ve Aualari. Moses iki ihiaha eavakive oaoka leipe. 33Amua arero maeape, Ave loa iilu hehelauka aipe, ehovea a peavila la ita hehe ita havahu. 34Arave Egypt apealula haela ve kakare ara overa eavi, ereve hivavara ara overa iapai. Ara va erero paparaehakive leikila. Ekela, ara aro Egypt paraeakilai.
35Ma Moses ere haure leipe: ere are v'ila maeape, Aro akea haela i heheavaki haela leita leipe? Huakara ve areve oropa ve ekepe la aneru ve mai v'ila Aualari arero akea haela i ovokake leiki haela leikive le paraeape. 36Ma haela oropa ihova i horahora leiki eharu Egypt i Ahea Ma Ovoka hoa ve leivahaeai aireaki are erero kari aupe. 37Ma va la Moses — are kai Israel akoremari maeaeape, Peroveta ara hovea Aualari eve apavara v'ila lai urapakilai. 38Ma haela, i arero Sinai kela ve oharo maeape la aneru ila hareho i elaviilave vilali haela ila, huakara ve ekalesia apearoape: are ovokake oharo iapape ehovea elaro aikiarakive. 39La oharo elaviilave houva haela au iapaila, aka arero haure lei avakai ikihelari Egypt ve mai ikivere leivahaeape. 40Ere Aaron mari maeaeape, Ela v'ila kari auvahaelula harihu eharu karikikive. Ehovea elaro Egypt ve kari ekepe ma Moses ela v'ore ka are lehae laleila. 41Ere la hoa boromakau mere karikipe, areve oropa elare maea morava leivahaeape, elare mai ve karikipe la eharu ve ere ikiveveke leivahaeape. 42Aualari helari erero kaia ve eharu morapaeakive haitapape — peroveta buka oharo hape laria:
Israel haela e, au haeape eharu i maea morava mai ila
Huakara hoa hitolo 40 ve, e araro aikiarape ha?
43Ka — eva Moloch ve hehe haha aualari Remphan ve kou ila kailape.
E karikipe la ihova ehovea momorapukive:
Ara ero Babylon ve ukai ve kari aukilai.
44Elaviilave houva haela okoare ve hehe haha huakara ve avape. Are Moses maeape laria — are eavape la ihova hovea karikikive la hehe haha. 45Elaviilave Joshua ve hoa houva haela kara, elare ita havahu pekahavape hoa la haha avipekape. Aualari elaviilave houva haela ve oropa ve huikapai paraeape aiai David ve hoa. 46Are va Aualari ve oropa ve veveke leipe. Are Jacob ve Aualari ve uvi kukive ikivere leipe. 47Aka Solomon are v'ila Uvi kupe. 48Lae vi va — Akea Iele Aualari mai kupe la uvi ve aea va ka, peroveta haela maeape la oharo hovea.
49Arave terona kaia ve:
Arave loa pavaki haha meahaiapo ve.
E va ara v'ila le la hovea uvi kukilai ha?
Arave iki paraeaki ita lahoa?
50Arave mai ma eharu oaria au karikila ha?
51E iki pelaea i avako ipi hahuru haela. E va mea oaria ove veveke hahaure leilula; eve houva haela leivahaeape la mai e kara leivahaelula. 52Eve vilali haela lela peroveta haela au haila ha? Oropaki mai ehoe haela ve ekeki oharo maeaeape la haela e haeape — e va ma hoa ereve hihila epaki haealula haela iele. 53E va aneru kileape la pupu kaivi kiva au leila.
Stephen ve apape hari
54Ere va ma oharo iapai iki heaha eapapo leivahaeai, are v'ila kao heheavape. 55Aka are Ove Veveke ila kaia ve ovohae iupei Aualari ve haharika i Iesu areve mai ore ukai ve epavila eavi mari maeaeape, 56“Iapaila — ara kaia hapai haela ve Akore Aualari ve mai ore ukai ve epavila eavave.” 57Ere āra eapapo hai avako kokaukavahaeai vivila arero mai paeape. 58Ere arero karikara mahokaea ve huikapai paraeai have koavape. Are v'ila vavavape la haela ereve pura, haela rare Saul ve loa ipi ve aipevahaeape. 59Ere Stephen have koavape. Are Amua itavi mariape “Amua Iesu — arave ove kaivaki.” 60Are loa ari haiavi āra eapapo mari hape, Amua, ma haeae ve kavale erero kavararue. Are mari avi le apape.
Currently Selected:
Horova 7: ORO
Highlight
Share
Compare
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
