Horova 9
9
Saul iki helaripe
1Saul ikiheaha i hihiri ila oharo Amua ve kilea haela v'ila maeape. Are ai akea oharo haela ve leia aupe. 2Are arero apevelavela leipe — arero Damascus synagogue haela ve pepa aiarakive — ehovea are ma mai kiva leilula haela la koarakilava, vilahoaha i uavila ila hareho, are va erero hahai Jerusalem kari ekekive. 3Are hahi ai Damascus maeamaea ekepe la hoa, kaia ve ovava eapapo kihoai arero helari hupakai makaeape. 4Are mea ve hilaupe kai āra maria iapape Saul, Saul, a araro leve hararuavila ha? 5Are maeape, Amua, a va leita ha? Are maeape, Ara Iesu, a hararuavila la haela. A kurupaeaki eharu haure lei v'arekaea. 6Are paiala paiala i horahora lei maria maeape, Amua, a ikivere ara learia leikilai? Amua arero maeape, Urou, karikara pekaki. A leari leikilai ere aro kileakilai. 7Are i hareho loaloape haela ikihorahora lei muruha le epavape, ehovea ere āra iapai, haela au eavaila. 8Saul mea ve urai ovohae kohelaukai, eharu au eavaila. Ere arero mai pai Damascus lai pekape. 9Are va hare 3 ovohae kariri lei eapai i ma ila au laila.
Saul Damascus leia
10Damascus aeaveape kilea haela rare Ananias. Amua arero ivahi hoa maeape, Ananias. Are maeape, Amua, ara ma. 11Amua arero maeape, Urou, ehoe rare itavape la okiharo ai Judas ve uvi ve, Saul Tarsus haela v'ila apevelavela leiki — iapai, are ivaiva leivila. 12Are haela rare Ananias arero mai koharakive ovohae veveke leikive ekevila la eavave. 13Aka Ananias kavale maeape, Amua, ara ma haela v'ila haela oaria ve oharo iapape. Are ave Jerusalem apealula hehe haela heaha eapapo leipe. 14Are ave rare ve ivaiva leilula haela oaria hahakive, oharo haela ve pepa ila, ekepe. 15Aka Amua arero maeape, Ave oki aula, ehovea are ara ikivere leipe haela, arave rare ita lahua i amua haela i Israel akoremari oaria kileakive. 16Ara arero amoeakilai, are va kakare oaria ara v'ila koarakilai. 17Ananias ai la uvi pekape. Are arero mai kohari mari maeape, Saul, akoreheari, Amua Iesu, a okiharo ekevila eavape la Amua, araro kiparaeape, ehovea a ovohae veveke lei Ove Veveke iki ure le avakive. 18Areve ovohae ve oro‐oro, (eharu keke hovea) hohoavape — are ovohae le eavape. 19Are urai bapatiso lei eapai lala aheke le leipe.
Are hare uku kilea haela i hareho Damascus apeape. 20La hoa havahu are synagogue ureve Iesu Aualari ve Akore vavavape. 21Areve oharo iapavahaeape haela oaria ikihorahora eapapo leivahaeai maria maeape, Ma va Jerusalem rare v'ila ivaiva leivahaeape haela oaria hararuape haela va ka ha? Are kara laelave ekepe ehovea erero hahai oharo haela ve oropa ve kari aukive. 22Aka Saul aheke iele lei Damascus apealula Jew haela lei horahora leivahaeape — ma Keriso iele hihika vavavila.
23Hare oaria karia lei, Jew haela elare oharo hukavape, ehovea arero harive. 24Aka ere ikikekelape horova Saul ore leipe. Ere hare i oroa ila karikara okiape kiva leivahaeape ehovea arero harive. 25Aka areve kilea haela arero oroa hareavi hara parae kara ura ve mahokaea ve paraeape.
Saul Jerusalem i Tarsus ila leia
26Are Jerusalem pekai kilea haela oaria leia hareho pekakive ikivere leipe. Ere oaria arero oaoka leivahaeape, ehovea ereva iki au kekelaila are va kilea haela iele. 27Aka Barnabas arero kaivi aposetolo haela ve leia lai aupe. Are erero hihika maeaeape — Are va Amua okiharo eavi arero oharo la hukavape, kai Damascus leia ape karava ila Iesu ve rare v'ila iroro ape. 28Are ere i hareho aula kelari ape kai Amua ve rare v'ila ape karava iroro ape. 29Are Greek Judea haela oharo hahari ape — ere arero harive oki haropape. 30Apavara la oharo iapai arero Caeasarea lai ai Tarsus karikara leia paraeape.
31Laelave Judea i Galilee i Samaria ila la ekalesia lei aheke lei havila ila apearoape. Ere oaria Amua i Ove Veveke ila kelavi ikiveveke lei oaria iele leivahaeape.
Peter Lydda leia haela lei makukuripe
32Peter ita oaria helari ai Lydda karikara hehe haela eavakive aupe. 33Haela ae rare Aeneas, hitolo 8 maea heaha ila aeaveape, ehovea are epe‐apo heheva maea leipe. 34Peter arero maeape, Aeneas — Iesu Keriso aro lei makurive — urou elare kile kariki. Are elavelave uroupe. 35Lydda i Sharon ila apeape la haela oaria eavi Amua iki le kelavape.
Dorcas
36Joppa karikara aeaveape kilea uamari rare Tabitha (uri aea ve rare Dorcas) are va horova veveke oaria leivila uamari, kai mea oaria Aualari v'ila meru veveke aiarape. 37Are la hoa maea kakare lei le apape. Ere areve maea huhela akea lalava aipepe. 38Lydda karikara Joppa maeamaea, laelave ere iapape Peter leia aeape. Ere haela orahoka areve leia paraeai arero here leipe, Elaro kai elavelave ekeki. 39Peter urai erealilaro koarai aupe. Are uvi ekepe la hoa ere arero akea lalava lai pekape — uavila dedehi oaria are i hareho hi ila epavi, Dorcas ere i hareho apearoape hoa kokorape la pura oaria arero amoeape. 40Aka Peter erero oaria mea ve haruapai, loa ari avi ivaiva leipe. Are areve maea ve ukai ve helari maeape, ‘Tabitha, urou. Are ovohae kohelaukai Peter eavi le uroupe. 41Are mai avihorapai arero lai urapape. Are kai hehe haela oaria itavavahaeai arero ovokake ila erero avarape. 42La hari Joppa haela oaria iapavahaeape, laelave haela oaria Amua ve iki kelavape. 43Iapai, are hare oaria Joppa haela loa iilu hahavila haela rare Simon i hareho aeaveape.
Currently Selected:
Horova 9: ORO
Highlight
Share
Compare
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
