Genese 39
39
Iosepa i Potipara ve uva ila
1Ere Iosepa Aigupito lai aupe, Potipara Parao ve hevehe haela ve kapena, Aigupito haela, arero lai kihoaupe la Isamaela haela ve arero ilaea leipe. 2Iehova Iosepa i hareho aeaveape, laelave areve okiharo lei veveke leipe; are areve haelapo, la Aigupito haela, ve uvi aeaveape. 3Areve haelapo ovohae eavape, Iehova arero koarai veape, kai Iehova Iosepa ve mai ve horova oaria hukapai lei mekaka leivahaeape. 4Laelave, are Iosepa ve ukai ve iki veveke lei areve horova oaria kiva leikive maeape, are areve uvi ve ovopaki haela leipe, kai Iosepa areve eharu oaria kiva leivahaeape. 5Are arero areve uvi ve ovopaki haela, kai areve eharu oaria kiva leivahaeakive maeape, aireaki, mea oaria, Iehova la Aigupito haela ve uvi horova oaria lei mekaka leivahaeape, ehovea Iosepa ve harihari; areve uvi ve horova i oru horova ila oaria, Iehova lei mekaka leivahaeape. 6Laelave are areve eharu oaria Iosepa kiva leivahaeakive aiarape; are elare eharu v'ila iki heraho karia havahu; are va hare oaria elare eapai hiki lala, ikihorahora karia.
Kahara, Iosepa ve maea veveke i oropape mekakure ila. 7Hare aea, areve haelapo ve uva Iosepa ovohae eavi arero maeape: “Ara i hareho uavakive, heroe.” 8Aka are haure leipe: are areve haelapo ve uva mari maeape: “Ehovea ara arave haelapo ve eharu oaria kiva leivahaevila, are va uvi eharu ve heraho karia; are areve eharu oaria arave mai ve aikiarape; 9Ma uvi ureve arave akea ve haela karia, are ara v'ila eharu haroapo hiki kiva leikive au avikiaraila, la va a hiki, ehovea a areve uva. Ara learia lei ma haiae eapapo leikive ha, kai Aualari oropa ve heaha eapapo leikilai ha?” 10Are hare oaria Iosepa laria kurupaiveape, aka are areve oharo au iapaila, are i hareho au uavaila, kai are i au veaila.
11Kahara, hare aea are horova leikive uvi ureve pekape la hoa, uvi ve haela ae va karia, 12la hoa are areve maea pura mai pae mariape: “Ara i hareho uavaki.” Aka are oaoka lei vivilape, areve pura uamari ve mai ve hakurepape, are uvi mahokaea ve vivilape. 13Are ovohae eavape, are areve pura areve mai ve hakurepai uvi mahokaea ve vivilape la hoa, 14are areve lalava haela itavi maria maeape: “Eavaila, are Heberu haela elaviilave maia lai ekepe ehovea elaviilara lai haiae leivahaeakive! Are iki ara ve maia maria maeape, ‘Ara i hareho uavaki.’ Ara āra hai eapapo la itavaila; 15are arave āra eapapo la iapaila la hoa, are areve pure hakurepai oaoka uvi mahokaea hoai lavivilaila.” 16Are areve la pura uvi ureve aipe kiva lei lei areve vila kihoaupe hoa, 17are la oharo hovea arero maeape maria: “A va maia lai ekepe la Heberu horova haela iki arave maia ehovea korea leikive; 18aka ara āra eapapo lahila la hoa, are pura hakurepai oaoka lei uvi mahokaea ve la vivilaila.”
19Areve haelapo areve uva arero maeape la oharo iapape maria: “Ave la Heberu haela araro maria laleila” la hoa are hihiri eapapo leipe. 20Iosepa ve haelapo arero kaivi uvi muru paraeape, king ve au hahaki haela ve la uvi muru, are kai uvi muru le aeape. 21Aka Iehova Iosepa i hareho aeape, are arero ikiheroe eapapo lei uvi muru kiva haela oropa arero lei veveke leipe. 22Uvi muru kiva haela uvi muru ureve au hahaeape haela oaria kiva leikive aiarape; leia leivahaeape horova oaria Iosepa kiva leivahaeape; 23Iosepa kiva leivahaeape la eharu oaria uvi muru kiva haela ovohae au eavaila, ehovea Iehova are i hareho aeape; aeva are leivahaeape la eharu oaria Iehova lei mekaka leivahaeape.
Currently Selected:
Genese 39: ORO
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society 1963-1972
