John 3
3
Iesu i Nicodemus ila ve oharoharo
1Pharisee haela ae rare Nicodemus — Jew haela ve amua. 2Are iki oroa hoa Iesu ve leia arero maeape, Haelapo, ela v'ore a va Aualari ve ekepe kilea haela — ehovea a leivahaevila ma ihova oaria Aualari koarai aeavila haela hiki ore. 3Iesu arero kavale maeape, O iele, O iele, ara aro maeaive — haela ae va āre epaki aue la leikilava, are Aualari ve basileia eava va ka. 4Nicodemus arero maeape, Haela eapapo are kai learia kai le epakilai? Are aeka areve lou ve eharau ureve araeai āre kai epakilai ha? 5Iesu arero kavale maeape, O iele, O iele, ara aro maeaive. Haela ma i ove v'ila epaki aue la leikilava, are Aualari ve basileia araeakive hovea lei va ka. 6Aivau ve epape la eharu aivau hiki, ove ve epape la eharu are va ove. 7A horahora kalailue, ehovea ara aro lamaeaila, a va āre kai epakilai, heroe. 8Mea are havahu ve ikivere ve kiveveaivila; a va areve uara iapaivila, aka are va lahoa ve ekepe aka lahoa aukilai a va ore va ka. Ove ve erarura la haela oaria kara laria. 9Nicodemus arero maeape, Ma eharu leari leive ha? 10Iesu arero kavale maeape, A va Israel haela ve kilea haela, aka ma eharu iapa va ka ha? 11O iele ara aro maeaive, Ela va ore la eharu ela hukavalula, ela eavape la eharu ela vavavaelula, aka elave oharo e kelava va ka. 12Ara ero meahaiapo eharu lamaeaila — e va iapaki aue va laila, ara ero Kaia ve eharu la kileakilava e va learia kelavakilai ha? 13Haela ae kaia ve au pekaila, kaia ve kihoaupe la haela hiki: Kaire! Kaia ve aeavila haela ve Akore, are hiki. 14Hovea hovea, Moses huakara ve la ekaroa akea ve urapape, are haela ve Akore laria urapakilai. 15Ehovea ikikelavaki haela are v'ila ovokake leivahaeakilai.
16Ehovea Aualari meahaiapo ikivere havahu leipe, laelave are are havahu epape akore avarape, ehovea arero ikikekelaki la haela ovokake haiapo avakilai. 17Aualari areve akore meahaiapo heheavakive au kiparaeaila, aka ehovea meahaiapo are v'ila lei makurikive. 18Arero ikikekelaki la haela are heheava va ka, aka ikikekelaki aue la haela ere overa heheavape, ehovea are Aualari havahu epape la Akore ve rare iki au kekelaila. 19Heheavaki oharo ma — ovava meahaiapo kihoaupe, aka haela mea muru ikivere eapapo leivahaeape, kai ovava ikivere eapapo au leila, ehovea ereve horova kara heaha leivahaeape. 20Heaha leilula la haela oaria ovava ikihairihairi, kai ovava ve ekevehaea va ka, ereve mai heahaha hihika leivahaeaki ave. 21Aka mai iele leivila la haela ovava ekevila, ehovea areve horova oaria hihika leikive, Aualari v'ila leivahaeape la horova.
John Baptist Iesu v'ila vavavape oharo
22Ma oharo kari lei, Iesu i kilea haela ila Judea ita hoahukape. Are ere i hareho bapatiso horova leilula apearoape. 23John kara Aenon, Salim maeamaea, bapatiso leivahaeape, ehovea leia va ma oaria. 24La hoa ere John uvi muru au paraeaila.
25John ve kilea haela i Jew haela haroapo ila maea veveroro leiki mai v'ila hahari oharo ape. 26Ere iki John ve leia mari maeape, Jordan ukai ve a i hareho veape la haela, a are v'ila vavavape la haela; iapai, are bapatiso leivahaevila, haela oaria areve leia korukaiavahaelula. 27John kavale maeape, Haela ae ve eharu kaia ve kihoauki aue la leikilava areve eharu iele karia. 28E havahu ara v'ila vavavape ehovea ara mariape, Ara Keriso va ka, aka ara areve oropa kiparaeape haela. 29Uva maepaki haela, are va vila havahu — aka vila are ve kake are are i hareho epavi oharo iapaki la haela, are va ikiveveke leivila ehovea vila are ve āra — laelave ara va ikiveveke le leipe. 30Are va eapapo leikilai, ara va aireaki hekai le leikilai.
31Akea ve kihoauvila la haela are va haela oaria ve akea ve. Meahaiapo ve la haela are meahaiapo ve, are kai meahaiapo oharo hukavavila, kaia akea ve kihoauvila la haela are va haela oaria ve akea ve. 32Are eavape kai iapape la eharu are vavavavila, areve vavavaki oharo haela ae ikivere va ka. 33Areve oharo iapape la haela areva ma oharo koarai mari ape — Aualari va iele. 34Ehovea Aualari kiparaeape la haela Aualari ve oharo hukavavila. Are ove au hamuri avara va ka. 35Oa areve akore ikivere havahu, kai eharu oaria areve mai ve aiarape. 36Akore ve rare ikikekelaki la haela are ovokake haiapo avakilai. Aka Akore ve oharo iapaki aue haela ovokake eava va ka, aka Aualari ve hihiri areve ureve aeakilai.
Currently Selected:
John 3: ORO
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
