Luke 19

Zacchaeus

1Are Jericho araeai le aupe. 2Iapai, haela ae rare Zacchaeus, akea tax korukaia haela erohoho iele, leia aeveape. 3Are va ikivere Iesu ovohae eavaki are va leita la, aka are au eavaila, ehovea haela oaria, are kara haela ka hekai, 4Are oropa vivila kora eapapo pekai haiavape, ehovea Iesu la oki aukilai. 5Iesu iki la ita epavi ovohae iupei arero le maeape, Zacchaeus, elavelave kihoau, ara va mahau hare ave uvi ai pekakive. 6Are va elavelave kihoau, ikiveveke lei arero auhohi leipe. 7Haela oaria lari eavi mari maeape, Are va mai heaha haela ve uvi aeakive pekape. 8Zacchaeus epavi Amua mari maeape, Amua e, iapa, arave eharu ara hamureai ukai ara merava haela aiarakilai. Ara haela ae va eharu korea va lailava ara la eharu hoa 4 hovea aiarakilai. 9Iesu arero maeape, Mahau hare ma lalava haela ovokake le laleivahaeaila, ehovea ma haela kara Abraham ve meamari. 10Ehovea haela ve Akore ekepe, havoavape la eharu haropi lei makurikive.

Talent ve parabole

11Ere ma oharo iapai, are kai parabole aeka maeape, ehovea are va Jerusalem maeamaea, aeka ereve ikikekela Aualari ve basileia la hoa havahu la kihorerakilai. 12Laelave are maeape, Amua haela ae ita apehai aupe, ehovea basileia ae avakive, kai aireaki kai ekekilai. 13Are areve horova kiva haela 10 itavavahaeai £10 erero aiari mari maeaeape, E va ma eharu horova va laila, ara va aireaki kai ekekilai. 14Aka areve la karikara haela arero ikiheaha leivahaeai arero airekai paraeape oharo maria, Ela va ikivere ka ma haela elave amua leikive. 15Areva basileia avi aireaki ekepe la hoa are moni avarape la haela itavakive maeape, ehovea are ereve horova leivahaeape la kavale kai ore leikive. 16Oropa haela iki areve oropa ve mari maeape, Amua, ave la £1 aeka £10 la koarape. 17Are arero maeape, A veveke leipe, horova haela mekakure e: ehovea a va eharu perehekai kiva auhohi leipe, a va ma hoa karikara 10 kiva leikilai. 18Aire la haela iki arero maeape, Ave la £1 aeka £5 koarape. 19Are arero kara maeape, A va karikara five kiva leivahaeakilai. 20Haela aeva iki arero mari maeape, Ave £1 ma, ara va pura hahai auhohi aipepe. 21Ehovea ara aro oaoka leipe, ehovea a va mai aheke haela, a va au aipeila la eharu a kaivavila, a va au apoporauila la hae a va ikaeavila. 22Are arero maeape, Ave la oharo aro le heheavakilai, a va horova haela heaha e: a va ore overa leipe ara va haela aheke, ara au aipeila la eharu ara kaivavila, kai au apoporauila la eharu ara ikaeavila. 23Laelave, ehovealeve a arave moni kakavae horova haela au avaraila, ehovea arave ekeki hoa ara va kepea le koarakilai ha? 24Are are i hareho epavape haela maeaeape, Areve la £1 hareavi £10 ila la haela avaraki. 25Ere arero maeape, Amua, areva £10 overa aeape. 26Ara ero maeaeaive, Eharu ila la haela ere aeka aiarakilai, eharu karia la haela, ereve la perehekai ere hareavakilai. 27Arave iri haela, araro amua leikive ikivere au leila la haela, erero kari iki arave oropa huru haeakive.

Iesu Amua hovea Jerusalem pekape

28Are lari avi ereve oropa ai Jerusalem oki aupe. 29Iapai, are Bethphage i Bethany ila maeamaea kela rare Olivet ekepe. 30Are kilea haela orahokaila paparaehai mari maeaeape, Ari ai oropaki la karikara: leia haela au horeai loakiaue asini mere au hahape le la pavila: arero helauka lai ekela. 31Haela ealilara la kimaeakilava, evalila arero leve helaukaro, evali kavale mari maeaki, Amua laila ve. 32Au paparaehape la haela ai are erealilara maeaeape la o hovea le koarape. 33Erealila asini akore helaukape la hoa la haela erealilara maeaeape, Eva asini akore leve helaukaro ha? 34Erealila maeape, Amua laila ve. 35Erealila arero Iesu ve lai ekepe. Ere ereve pura areve kaka akea ve hurukavi Iesu la akea ve haiavape. 36Ere auvahaeape la hoa ere ereve pura oki ve hurukavahaeape. 37Are va karikara maeamaea Olivet kela ipi ve aupe la hoa kilea haela oaria hareho ikiveveke lei Aualari ara hai morapaeape, ehovea ere eavape la horova veveke oaria. 38Ere maeape, Amua ve rare v'ila ekeki la Amua lei morapaeaki; kaia akea havila ila, akea ve haharika veveke iele. 39Pharisee haela uku haela oaria ve aru hihi ve arero maeape, Haelapo, ave kilea haela aihukamaeaki. 40Are erero maeaeape, Ara ero maeaeaive, ma haela ve ape kolakaukakilava, ipi ve la have ara hai itavakilai.

Iesu Jerusalem ve ikihuru leipe oharo

41Are iki karikara maea iele epavi hi la maria le ape, 42Aro havila avaraki eharu a v'ore va laila, ma hoa kara: aka mahau la eharu a v'ila le aiarapape. 43Ehovea hare a v'ila kihorerakilai, la hoa ave iri haela ave hereavaki kara hahakilai, ere aro helari hupakai le kokaukakilai. 44Ere aro koa ipi ve huikapai paraeakilai: ave akoremari ila hareho: ere va have ae have ae akea ve hakurepa va ka, ehovea a va ore au leila ave lei makuri hoa.

Iesu Hehe Uvi huhelape

45Are kai Hehe Uvi pekai ilaea leilula haela haruapai mari maeaeape: 46Oharo mari hape, Arave uvi ivaiva uvi la leikilai, e va arero korea haela ve loro hovea leipe. 47Are va hare oaria Hehe Uvi kiriveape, aka oharo haela i akea haela oaria arero harive oki haropape. 48Aka ere va oki au koaraila, ehovea haela oaria areve oharo auhohi iapai ikivere leivahaeape.

Currently Selected:

Luke 19: ORO

Highlight

Copy