Luke 22

Judas ve hihila epape hari

1Muramura aue pai ve hurae hoa kihorera maea iele, la hurae ve rare Passover. 2Oharo haela i hohoa haealula haela ila arero harive okiharo haropape, ehovea ere haela oaria oaoka leivahaeape.

3Satan Judas (rare aea Iscariot) ve iki ure araeape: are 12 ve haela ae va la. 4Are ai oharo haela i kapena haela ila hareho oharo hukavape, ehovea Iesu erero leari lei avarakive. 5Ere va ikiveveke leivahaeai arero moni avaraki okoare la maeape. 6Are ereve oharo iapai, Iesu erero avaraki oki ve kekelape, haela oaria ve korukaiaki aue hoa.

Hita eapai ve oropa karikiki hoa

7Muramura aue la pai ve hare kihorerape, ere va elare passover mamoe akore maea morava leiki la hare. 8Are Peter i John ila paparaehai mari maeaeape, Evali auila, elaviila ve Passover oropa karikiki, elaviila hurae eapai larilai. 9Erealila arero maeape, Ave ikivere elalila lahoa karikilai ha? 10Are erealilara maeaeape, Eali karikara pekahavaki la hoa eali haela ma hahu oraiauvila mai la eavakilai. Are pekaki la uvi ve arero airekai pekakilai. 11Evali la uvi haela mari maeaki, Haelapo ve oharo maria — Hahi lalava lahoa ela i kilea haela ila hareho passover hurae eapai larilai la lalava? 12Are ealilara akea ve lalava eapapo overa karikiki kimaeakilai, leia hurae ve ita oropa karikikive. 13Erealila ai are erealilara maeaeape la oharo hovea eavape. Erealila passover hurae ita leia karikipe.

Iesu hita eapai lape hoa

14Hurae hoa havahu, are i aposetolo haela ila hareho avape. 15Are erero maeaeape, Ara va ikivere eapapo overa leipe e i hareho ma passover hurae oropa larilai, arave kakare leiki hoa aireaki. 16Ehovea ara ero maeaeaive — Ara va aireaki passover eapai le va ka aiai are va Aualari ve basileia ureve iele la horerakilai. 17Are hekako avi, thank you, oharo a, mari maeape, Maia kaivaila, elarelare hamureaki. 18Ehovea ara ero maeaeaive Ara va aireaki vine apu le va ka aiai Aualari ve basileia kihorerakilai. 19Are kai pai avi thank you oharo a, pai la haivavaelai erero aiari mari maeaeape, Ma arave maea e v'ila avarape. E va maria lei araro iki kekekakive. 20Ere eapai karia lei are hekako kara hareavi mari maeaeape, Ma hekako okoare are arave apu v'ila, e v'ila hakaitapape. 21Iapaila, araro hihila epaki la haela ve mai ara i hareho ma eapai paeakilai. 22Ehovea haela ve Akore overa maeape la oharo hovea aukilai. Aka heaha iele arero hihila epaki la haela. 23Ere elarelare oharo hukavape arero ma mai leita leikilai ha?

Akea mai veveke iele

24Ere va elare hahari hahari maea ape ehovea ereve oropa haela leita leikilai. 25Are erero maeaeape, Ita lahua haela ve amua ereve oropa haela leilula. Aeva ereve akea haela ere rare iki amua rare la maeaelula. 26Aka e va laria va arekaea. Eve oropa haela akoreheari hovea leikive, heroe: eve amua haela eve horova haela hovea leikive. 27Ehovea akea haela leita ha? Eapai ve haiavavila la haela, aka arero kiva leivila la haela? O iele, eapai ve haiavavila la haela. Aka ara eve aru hihi ve horova haela hovea aeavila.

28E va ara i hareho amuraeharae hoa apealula la haela. 29Ara ero basileia avarakilai, hoveahovea arave Oa araro avikiarape. 30E ara i hareho arave eapai haha ve basileia hoa avakilai. E va terona 12 akea ve Israel ve eravo 12 heheavakive avakilai.

Peter aireaki hehepo leikive la oharo

31Simon, Simon, Satan a v'ila velavela leipe, areva ikivere aro wheat hae hovea lalaeapakive. 32Kahara, ara a v'ila ivaiva leipe ave ikikekela karia leiki ave. A va aireaki iki helariki la hoa ave apavara kara aheke leivahaeakilai. 33Are arero maeape, Amua, ara va a i hareho uvi muru aka apakive aukive hoveahovea. 34Are arero maeape, Peter, ara aro maeaive: a va mahau hare arav'ila hehepo oropa leikilai, hoa ilehoila, kokora mea hi aire arilai.

35Ara ero pausi aue, aroa aue, i loa iilu aue paparaehape la hoa e va eharu aea ikivere leivahaeape ha? Ere kavale maeape, Ka! 36Are erero maeaeape, Aka ma hoa, pausi ila la haela arero kaiva, aroa ila la haela kara. Karia la haela are va akea pura ilaea lei lelao mare avaki. 37Ehovea ara ero maeaeaive, Ma overa hape oharo ara v'ila horerakilai — Ere mai heahaha haela are ila hareho korukaiape — ehovea ara v'ila hape la oharo iele horerakilai. 38Ere arero maeape, Amua eava! Lelao orahokaila mae. Are erero maeaeape, Kahara, hovea.

Gethsemane

39Areve mea oaria ve leiveape mai hovea are mea hoai Olivet kela pekape. Kilea haela oaria areve airekai pekahavape. 40Are la ita pekai haiavape la hoa are erero maeaeape, Ivaiva leila, eva kurupaeaki hoa hihilaukaki ave. 41Are ere v'ila perehekai arai ve pavape, haela have koaki heaikiapo hovea. Are loa ari avi ivaiva mariape: 42Oa, a va ikivere la leikilava, ma arave hekako hareavaki — Heroe, arave ikivere va ka, a havahu ve iki hiki. 43Aneru kaia ve kihoai arero lei aheke leipe. 44Ehovea are va iki kakare eapapo, are ivaiva aeka aheke ape, areve maea ve orovahe apu hovea mea ve hitaupe. 45Are va ivaiva ve uroupe la hoa are iki areve kilea haela ve leia avuku eapealula eavape, ehovea ere va ikihuru iele. 46Are erero maeaeape, E va avuku leve apearo. Urahuka ivaiva leila, ero kurupaeaki hoa lei hihilauki ave.

Ere Iesu mai paeape

47Are la oharo avi la haela oaria ekevahaeape. Judas rare itavape la haela, haela twelve are la, ereve oropa ve ekepe. Are iki Iesu ape popoa overa hihipe. 48Aka Iesu arero maeape, Judas, a va haela ve Akore ape va popoavila hihila epakilai ha? 49Are i hareho epavape haela aire leiki horova la kelavi mari maeape, Amua ela erero lelao haeakilai ha? 50Ereve haela ae akea oharo haela ve horova haela avako ore lelao koa le koerapape. 51Aka Iesu kavale maeape, E va hahari apeaki. Are va areve avako mai kohari lei veveke leipe. 52Iesu oharo haela i Hehe Uvi kapena haela i haela hoaha ila arero paeakive ekevahaeape la haela oaria mari maeaeape, E va lelao i haru ila, korea haela paeakive hovea leikevahaeaila ha? 53Ara hare oaria e i hareho Hehe Uvi la loalula hoa eve mai au haravaiaila araro mai paeakive: aka eve hoa ma, muru hoa ve aheke ve hiki.

Peter ve hehepo

54Ere arero mai pai lai ai akea oharo haela ve uvi lai pekape. Peter arai ve arero airekai aupe. 55Ere uvi mailare a ilila hareho le avape. Peter kara ere i hareho haiavape. 56Mari ae arero a ve ovava ve eavi ovohae auhohi eavi mari maeape, Ma haela kara are i hareho veaveape haela. 57Aka are hehepo lei mari maeape, Mari e, ara arero ore va ka. 58Aireaki, haiapo ka, haela ae arero eavi maeape, A ka areve haela la. Peter maeape, Haelakaru, ara va ka. 59Hour haroapo hovea haela aeva iki ape aheke maeape, O iele havahu ma haela are i hareho veaveape, ehovea are va Galilee haela. 60Aka Peter maria ape, Haelakaru, ara ave la oharo horahora leive. Are la oharo avi la kokora mea hi le ape. 61Amua helari Peter ovohae le eavape. Peter Amua ve oharo iki kekelape, ehovea are arero maeape, Ma hare kokora mea hi aire arilai, a va ara v'ila hehepo hoa ilehoila oropa leikilai. 62Are mea hoai hi eapapo le ape.

63Iesu paeape la haela arero heheo maeai haru le koavape. 64Ere areve ovohae pura hahai arero velavela leipe maria, Peroveta oharo e la, aro leita lakoaila ha? 65Ere arero o vere oharo lahua lahua oaria i o heaha ila maeape.

Iesu Akea Oharo Haela oropa ve

66Vevelare, mea vitovito hoa, haela hoaha i oharo haela i hohoa haealula haela ila hareho korukaiavahaeape. Ere arero ereve oharo hukavaki ita lai ai mari maeape, A va Keriso la leikilava, elaro kimaeaeaki. 67Aka are erero maeaeape, Ara ero la maeaeakilava, e va kekela va ka; 68Ara ero velavela la leikilava, e kavale oharo kimaeaea va ka, kai araro paraea va ka. 69Aka aireaki, haela ve Akore Aualari ve aheke ve mai ore ukai ve mea oaria haiavakilai. 70Ere oaria arero maeape, A va Aualari ve Akore iele ha? Are kai erero maeaeape, E va araro lari ave. 71Ere maeape, Ela va arero hahaki oharo ae va leve haropakive ha? Ela havahu areve ape ve la oharo le iapaila.

Currently Selected:

Luke 22: ORO

Highlight

Copy