Luke 3

John Baptist: Iroro oharo

1Tiberius Caesar ve hitolo 15, Pontius Pilate Judea gavana haela, kai Herod Galilee ve Tetrarch haela, kai areve apoheari Philip Ituraea i Trachonitis Abilene hoa ve Tetrarch; 2Annas i Caiaphas ila va akea oharo haela leipe la hoa, John, Zacharias ve akore ita merava Aualari ve oharo iapape. 3Are Jordan la ita oaria pekai mai haeae ve ikihuru lei hapuruvaki la bapatiso mai kileape. 4Isaia peroveta haela ve la buka hape oharo hovea hovea maria:

Ara ita merava hape:

Aualari ve okiharo karikikive,

Areve oki ehoe leikive.

5Hahapa oaria roroapakive,

Kela ehoaha titaeka ila haharuka heheapa leikilai:

Hahaeae eharu ehohoe la leivahaeakilai:

Ita pakupaku heheapa leivahaeakilai.

6Aivau oaria Aualari ve lei makukuriki mai eavakilai.

7Are leia bapatiso ve arahavi haela oaria maeaeape, E va ekaroa ve akoremari e, ero aireaki hihiri ve oaoka lei hukaukive leita maeaeape? 8Hahaeae ve ikihuru hihika leivahaeaki. Elare iki ureve maria kakelavarue — Elave oa Abraham me aeave — ehovea ara ero maeaeaive Aualari ma have la Abraham ve akoremari eravahaeaki ore. 9Ma hoa — ila kora ipi ve le aeave: hae mekaka horeraki aue la kora oaria ere hahaeapui a aroukilai.

10Haela oaria arero velavela leipe maria, Ela va learia leikilai ha? 11Are erero kavale maeaeape. Pura orahokaila la haela pura aue la haela ra avaraki. Eapai ila la haela kara lari leiki. 12Tax korukaia haela kara areve leia arahavi mari maeape, Haelapo e, ela ka leari leikilai ha? 13Are erero kavale maeaeape, Eva tax moni hovea hiki maeaeaki. 14Hevehe haela kara arero velavela leipe maria, Ela kara learia leikilai ha? Are erero kavale maeaeape, Haela kahararuarue: eharu haeae kaealue: Eve kavale ve hihiri oharo kailue.

15Haela oaria ve ikihorahora leivahaeai John ve rare elare iki ri ape maria, Are va Keriso la, aka haela lahua. 16John erero oaria kavale mari maeaeape, Ara ero ma hiki bapatiso leivahaeaive, aka arave aire ekeki la haela are va eapapo, ara va hekai, areve loa iilu ve ela ara va hehelaukakive hovea va ka. Are kai ero Ove Veveke ila bapatiso leivahaeakilai. 17Areve mai papahi ila, ehovea wheat hae mekaka uvi ve korukaiakive. Aka are wheat ve au, huhuraki aue la a aroukilai.

18Are kai oharo veveke oaria ila haela oaria oropa ve iroro ape. 19Herod Tetrarch, ehovea John arero ovoro kopape Herodias areve apoheari ve uva v'ila, kai ehovea areve horova hahaeae oaria v'ila; 20Haeae eapapo aeka maria leipe — Are John uvi muru kokaukape.

Iesu ve bapatiso hoa

21Are haela oaria bapatiso overa leivahaeape, Are Iesu kara bapatiso lei ivaiva ape la hoa — Kaia le hapape: 22Ove Veveke hivi akore ve maea koelari areve haro akea ve kihoaupe: Ara kaia ve hape maria, A va ara iki havahu akore — Ara a v'ila ikiveveke eapapo leivila.

Iesu ve vilakao

23Iesu havahu kileaki horova ipopeavape hoa areve hitolo 30: Are Joseph Heli ve akore (haela oaria ve ikikekela la). 24Are Matthat ve akore, Levi ve akore, Melchi ve akore, Jannai ve akore, Joseph ve akore; 25Are Mattathias ve akore, Amos ve akore, Naum ve akore, Elsi ve akore, Nagge ve akore. 26Maath ve akore, Mattathias ve akore, Semei ve akore, Joseph ve akore, Juda ve akore; 27Joanna ve akore, Rhese ve akore, Zorobabel ve akore, Salathiel ve akore, Neri ve akore. 28Melchi ve akore, Addi ve akore, Cosah ve akore, Elmodam ve akore, Er ve akore. 29Jose ve akore, Elieser ve akore, Jorim ve akore, Matthat ve akore, Levi ve akore. 30Simeon ve akore, Juda ve akore, Joseph ve akore, Jonan ve akore, Eliakim ve akore. 31Melea ve akore, Menan ve akore, Mattatha ve akore, Nathan ve akore, David ve akore. 32Jesse ve akore, Obed ve akore, Boaz ve akore, Salmon ve akore, Naasson ve akore. 33Aminadab ve akore, Aram ve akore, Esrom ve akore, Phares ve akore, Juda ve akore. 34Jacob ve akore, Isaac ve akore, Abraham ve akore, Thara ve akore, Nachor ve akore. 35Saruch ve akore, Ragan ve akore, Phalee ve akore, Heber ve akore, Sala ve akore. 36Cainan ve akore, Arphaxed ve akore, Sem ve akore, Noe ve akore, Lamech ve akore. 37Mathusela ve akore, Enoch ve akore, Jared ve akore, Maleleel ve akore, Cainan ve akore. 38Enos ve akore, Seth ve akore, Adam ve akore, Aualari ve akore.

Currently Selected:

Luke 3: ORO

Highlight

Copy