Luke 8

Iesu koarape uavila

1Aireaki hare, haiapo ka, are karikara ehoaha i titaeka ila Aualari ve basileia ve oharo veveke iroro avila loa veape. Areve kilea haela 12 are i hareho auvahaeape. 2Are ovehahu ve haruapape kai maea mekaka leivahaeape uavila uku kara arero koarai auvahaeape: Mary rare itavape Magdalene, areve ureve ovehahu 7 ila haruapape la uamari, 3Joanna, Chuza, Herod ve horova kiva haela ve uva, i Susanna i uavila oaria kara. Ere va elare eharu v'ila arero kiva leipe.

Wheat hae puravai velaripe parabole

4Haela oaria karikara oaria ve kihoahuka korukaiavahaeape la hoa are erero parabole oharo kileavahaeape. 5Hae puravae velariki haela hae puravaevelaripe. Are puravae velaripe la hoa hae uku oki poe ve hohoape — haela erero loa ve haiharoavape — ori kara erero kaili lalavahaeape. 6Uku have akea ve hohoape — Ere va ahaai haiapo ka le haroropape, ehovea la ita huruhuru ka. 7Hae uku kora mamareke ureve hohoape: kora mamareke ere i hareho aheai erero havuapape. 8Uku hae kekele vovohoro ve hohoape — ere aheai iele oaria horeravahaeape — hoa 100 hovea. Are ara mari hape — Avako ipi ila haela — iapakilai.

9Areve kilea haela ma parabole ve iele arero velavala leivahaeape. 10Are erero kavale maeaeape. Aualari ve basileia ve muruhari eharu e va ore leivahaeakive, heroe: aka haela oaria ara va parabole oharo hiki maeaeakilai: ere va eavakilai, iele eavava ka, iapakilai, iki iele kelava va ka. 11Parabole ve iele ma: Hae va Aualari ve oharo. 12Oki poe ve hohoape la hae va maria: Haela oharo la iapakilava aka diabolo iki ereve iki ureve la oharo le hareavakilai: ere iapai kekela lei ovokake leiki ave. 13Have akea ve hohoape la hae — are v'oharo iki veveke lei iapape haela hovea: aka ereve elele karia, laelave ereve ikikekela perehekai kai amuraeharae hoa ere le hihilaukilai. 14Kora mamareke ureve hohoape la hae ere va maria — haela oharo la iapakilava, aka elare oki ai meahaiapo ve heraho i erohoho i ikiveveke leiki eharu kelavi are va hae veveke horeravahaea va ka. 15Kekele vovohoro hohoape la hae va maria: Ehoe i oharo iele hukavi la haela oharo iele la iapakilava, are aheke iele paeai hae veveke oaria le kakilai.

Lamepa ve kileaki oharo

16Haela lamepa a avelaeakilava, are arero maua haro ve kokauka va ka, kai haha ihau ve aepa va ka. Are arero haha akea ve aepakilai, laelave uvi pekahavaki haela oaria ovava eavakilai. 17Ehovea aiarapape la eharu oaria hihika leivahaeakilai, muruhari eharu oaria haela oaria ore leivahaeai eavakilai. 18Eve iapaki mai kiva leiki — ehovea eharu ila la haela ere va aiarakilai, eharu karia la haela are aeape la eharu perehekai ere kai le hareavakilai.

Apavara mai iele

19Areve lou i malaita ila areve leia ekevehaeape, aka ereve areve leia ve auki oki karia, ehovea haela oaria iele. 20Haela arero maeape, Ave lou i malaita ila arai ve apearo, ere a ve ila aro. 21Are erero kavale maeaeape, Aualari ve oharo iapai leivahaeaki la haela va arave lou i malaita ila va la.

Iesu mea heaha lei here leipe

22Hare ae are boti horerape — are i kilea haela ila hareho. Are erero maeaeape, Elaviila ma haru ukai ve elahukakilai. Ere kai horeavape. 23Ere horeavape la hoa are avuku le uavape. Mea heaha eapapo ma haru ve pavape: boti ma kaitopape, heloe koaki va maea iele; ere va heraho eapapo leivahaeape. 24Ere iki areve leia arero hurapai mari maeape, Haelapo e, elaviila ma ihahakive leiro. Are urai mea i ma aroaro ila oropai maeaeape. Ere va karia lei ma here le leipe. 25Are erero aihukamaeape, Eve ikikekela lahoa? Ere oaoka lei ikihorahora eapapo leivahaeai elarelare mari hukavape, Ma va leita haela? Are va mea i ma ila la oropai lamaeaila, ere va areve oharo iapa hiki leiro.

Gerasene ovehahu haela lei makuripe

26Ere va Gerasene haela ve ita Galilee ve ukai pekahavape. 27Are huru pekape hoa ovehahu ila haela karikara ve kihorera arero oki ve koarape. Are va haiapo iele pura ka, maheare hiki veaveape kai uvi aea va ka, aka kapu ita hiki aeaveape. 28Are Iesu eavi areve oropa ve ekaopi ara mari hape, Ara va a i learia leikilai ha, Iesu, Akea ve Aualari ve Akore. Ara aro velavela leive — A araro kahararuarue, 29Ehovea are ovehahu oropai maeape — la haela hakurepakive. Ehovea mehaemehae are va arero araiveape: ere arero hare oari auri horou ila hahairoape, are kai auri horou koeraiaveape, kai haelaharihu arero huakara ve avakaiveape. 30Iesu arero velavela leipe, Ave rare leita ha? Are kavale maeape, Legion: ehovea areve ureve ovehahu oaria apearoape. 31Ere arero velavela leipe — erero ita heaha ve kapaparaehaelue. 32Ilaita oaria kela ve leia eapai laeavaroape. Ere arero apevelavela leipe, are va erero la ilaita ve ureve paparaehakive. Are ereve oharo lari iapape. 33Ovehahu la haela harepai hoahukai ilaita ve ureve arahavape. La ilaita oaria hahapa ve hukai hoahukai ma haru ve leia ma ihahape.

34Ilaita laeavaroape haela are leipe la horova eavi oaoka lei hukau karikara i kaipu apeape haela oaria hareho maeaeape. 35Ere hoahuka are leipe la mai ovohae eavakive. Ere va iki Iesu ve leia ovehahu harepape la haela Iesu ve loa ipi avai titavi la eavape: are va pura ila kai ikikekela ehoe havahu leipe. Ere va oaoka eapapo leivahaeape. 36Ovehahu alape la haela veveke laila eavape haela erero la hari maeaeape. 37La hoa Gadarene ita haela oaria hareho arero velavela leipe ereve ita hakurepakive, ehovea ere va oaoka havahu leivahaeape; are kai vevaea horeai ukai elaupe. 38Ovehahu alape la haela arero here leipe — arero koarai aukive. Aka Iesu arero paraeai mari maeape, 39Elare uvi havahu aula — Aualari aro leipe la horova eapapo amoeakive. Are elare ukaki ai karikara haela Iesu arero leipe la mai veveke kileavahaeape.

Jairus ve mari lei ovokake leipe: Apu pavape uamari lei veveke leipe

40Iesu ukai helari elaupe. Haela oaria arero iki veveke ila koarape ehovea ere oaria arero karipe. 41Iapai — haela aea rare Jairus, synagogue akea haela, iki areve oropa ve ekaopi velavela leipe areve uvi leia aukive. 42Ehovea areve mari haroapo iele, are va epape hitolo 12, maea heaha lei uavape, apaki maea iele.

Aka are aupe la hoa haela oaria are i elaru velaru ape. 43Uamari aeva apu pavape hitolo 12, ekepe. Areve eharu oaria heheva haela aiari ka leipe, aka ere va arero veveke va au leila. 44Are iki arero aireaki epavape, kai areve pura kao mai koharape. Areve apu maea hoa haroapo veveke le leipe. 45Iesu maeape: Araro leita mai kolaharila ha? Ere oaria haveva hiki kai Peter i hareho epavape la haela mariape, Haelapo, haela oaria ai elaru velaru leila — ehovealeve a mari avilava araro leita kolaharila ha? 46Iesu maeape, Haela ae araro mai kolaharila: ehovea ara va ore arave aheke uku le titavi. 47La uamari eavape are leipe la mai au avarapaila, laelave are uki hareavahareava i iki areve oropa ekaopape. Are arero mai koharape, kai maea elavelave veveke leipe la oharo are haela oaria ve oropa arero hihika hukavape. 48Are arero maeape, Mari e, iki veveke leila, ave ikikekela aro veveke laleila. Havila avi aula.

49Are la oharo avi synagogue kiva haela ve haela ae iki arero mari maeape, Ave mari le api. A Haelapo kahararuarue. 50Aka Iesu la oharo iapai mariape, Oaoka kalailue — Iki kekela hiki. Are veveke leikilai. 51Are uvi pekape la hoa are haela oaria maeaeape — Uvi kapekahavalue. Are i Peter i James i John i mari hekai ve oa i lou ila hiki pekahavape. 52Haela oaria opaopoi hivavarai ape, aka are maeaeape, Hivavara i opaopoi ila va kaelue. Are va au apakue — are avuku eaeave. 53Ere arero area i ikiheaha leipe ehovea ere va ore are au havahu apape. 54Are erero oaria haruapai mari mai pai itavape maria, Mari e, urou! 55Are ve ove are iki le alape. Are urou hiki le leipe. Are erero maeaeape, Arero eapai avaraila. 56Areve oa i lou ikihorahora leivahaeape: aka are erealilara maeaeape, Are mari leipe la mai haela kamaeaelue.

Currently Selected:

Luke 8: ORO

Highlight

Copy