Matthew 15
15
Iesu vilali ve pupu haure leipe ve oharo iele
1Jerusalem hohoa haealula haela Pharisee haela ila Iesu ve leia ekevehaeai mari maeape: 2Ipileve ave kilea haela uvari vilari ve pupu hahaure leilula ha? Ehovea eapai larive hoa ere oropa mai ma huhelavahaea va ka. 3Are erero kavale mari maeaeape, Ipileve e kara Aualari ve pupu eve overa oharo kekelaki mai ve hararualula ha? 4Ehovea Aualari ve pupu maria ape, Oalou momorapuki — oalou o heaha maeaki la haela, veveke, arero huru havahu hari. 5Kahara, e va mari maealula. Haela ae oa i lou ila maria la maeakilava — Ara meru, ma arave oki ve veveke leiki eharu ma: 6La haela, ehoveala, oalou ila momorapaeaki aue la leikilava, are haeae lei va ka. Laelave e va Aualari ve pupu eve overa oharo kekelaki mai ve naoae naoae leipe. 7Opore haela e, Isaiah peroveta haela oharo e v'ila iele havahu maeaeape 8maria:
Ma vilakao ve ape araro morapaealula, ereve ape iilu kara,
Aka ereve iki oaria ita lahua vea.
9Ere araro morapaealula, iele karia,
Ere va haela ve mai hiki kilealula.
10Are haela oaria itavavahaeape, erero mari maeaeape, Iapaila, kai auhohi iapai. 11Ape larilai la eharu haela hararua va ka, aka ape ve kihoreraki la eharu iele hararuakilai. 12Areve kilea haela la hoa arero kai iki mari maeape, Pharisee haela aro hihiri ehovea a lamaeaila la oharo. 13Kahara, are kavale maeaeape, Arave kaia ve Oa apoporaukue la kora mere oaria are hareakilai. 14Ere va apea. Ere ovohae kariri haela kari auvahaeaki ovohae kariri haela. Ovohae kariri haela ovohae kariri kake ra lai aukilava, erealila hareho karu ve le hohoakilai. 15Peter arero kavale maeape, Ma parabole elaro hihika kileavahae. 16Iesu maeaeape, E kara aiai ma hoa auhohi iapa va ka ha? 17E va iki kekela va ka ha? Ape lari la eharu eharau ureve ra hoaukilai, kai e le heavakilai. 18Kahara, ape ve kihoreavaki la eharu oaria ere va iki ure ve kihoreavalula, leia va haela hararualula. 19Ehovea iki ureve kihoreavalula — leia va — ikikekela haeae, haela haea mai, airi pavora mai, mai heahaha oaria, korea mai, opore heheavalula mai, Aualari ve rare o heaha arura mai. 20La oaria hareho haela hararualula, aka mai hirihiri ila eapai laralula mai, leia va haela hararua va ka.
Ita lahua mari lei makuripe
21La hoa Iesu leia harepai, Tyre, Sidon ila ve ukaki elaupe. 22Iapaki: Canaan ve uamari la ukai ve kihorerape kai arero ara hai mari itavape, Amua e, David ve akore, araro ikiheroe leila: arave mari ovehahu arape. 23Kahara are arero kavale au maeaila. Areve kilea haela arero here leipe maria, Mavaila are k'aula, ehovea are elaro leve itavaro. 24Are kavale mari maeaeape, Araro kiparaeape iele ehovea Israel haela ve titavape mamoe hiki. 25Are areve oropa ve ekaopi mari maeape, Amua e, araro hukapa. 26Are arero kavale maeape, Veveke va ka akoremari ve eapai kaivi avita la aiarakive. 27Are maeape, Iele havahu, Amua, aka avita ereve oalou la ve eapai pipiki laralula. 28La hoa are arero kavale maeape, Uamari e, ave ikikekela va eapapo. A ve ikivere hovea, lahovea leikilai. La hoa havahu areve mari veveke le leipe.
Haela oaria lei makukuripe
29Iesu leia harepai Galilee ma haru maeamaea ve aupe: are kela pekai leia le avape. 30Haela oaria arero kai ekevahaeape — loa heahaha haela, ovohae kariri haela, o haveva haela, maea hohara haela lahua lahua oaria kara ere areve oropa ve kari ekevahaeape: Are erero lei makukuripe. 31O haveva haela oharo le ape, maea hoharai haela maea veveke leivahaeape, loa heahaha la haela loa ehohoe leivahaeape, ovohae kariri haela ovohae le eavape. Laelave haela oaria ikihorahora leivahaeai, Israel ve Aualari morapaeape.
4,000 haela eapai aiarape
32Iesu areve kilea haela itavavahaeape kai erero mari maeape, Ara ma haela oaria ikihuru havahu ehovea ere ara i lapeairava hare irehoila, eapai ve ka, ara erero va ereka va paparaeha va ka, ere okiharo aitara areauki ave. 33Kilea haela arero maeape, Ela va ma ita merava eapai lahoaki avi ma haela eharau huharakive ha? 34Iesu erero maeaeape, Eve leia pai leavaila ha? Ere mari avahaeape, 7, ae va ekaka titaeka perehekai. 35Are haela oaria maeaeape ere au avakive. 36Are pai 7 ekaka ila kailai, thank you oharo ape kai haivavaelai kilea haela aiarape; ere haela oaria aiarape. 37Ere oaria lalavahaeai eharau huharavahaeape. Ere va eapai hohoi kaili hara 7 heheloekoavape. 38La eapai lalavahaeape haela va 4,000, uavila i akoremari ila kepea kara. 39Are haela oaria elare ita paparaehape kai vevaea horeai Magdala ukai elaupe.
Currently Selected:
Matthew 15: ORO
Highlight
Share
Compare
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
