Matthew 17
17
Iesu ve maea koelaripe
1Hare aukava ila karia leilai, Iesu Peter i James i areve akoreheari John ila kela heaikiapo kari pekape. 2Areve maea ereve oropa ve lahua koelaripe, kai areve oropape hare hovea heauapape, areve pura hauhuka leipe, ovava hovea. 3Iapaila: Moses Elias ila ereve oropa ve hihi leivahaeape, erealila Iesu i hareho oharo hukavape. 4Peter Iesu kavale mari maeape, Amua, veveke, ela maia lakivikavahavaila; ave ikivere ra leikilava, ela maia kovo uvi irehoila kukueakilai, aeva ave, aeva Moses ve, aeva Elias ve. 5Are oharo ape leia, meuru ovava ila erero aerape. Iapaila meuru ureve ara hape maria, Maia va ara iki akore, ara arero ikivere havahu. E areve oharo ra iapai. 6Areve kilea haela la oharo iapape kai oropape ekakaopape kai oaoka leivahaeape. 7Iesu erero kai iki mai papaehaupe, kai mari maeaeape, Urahukaila, oaoka kalaivahaelue. 8Ere ovohae iupevahaeape la hoa, ere haela aeva au eavaila, Iesu hiki.
9Ere kela ve ra kihoahukape hoa Iesu erero ahilavahaeape maria, E laeavila la eharu haela kamaealue — aiai haela ve Akore api kai uroukilai. 10Areve kilea haela arero velavela leipe maria, Ipileve hohoa haealula haela maria arula, Elias oropa kihorerakilai ha? 11Iesu erero kavale maeaeape, Iele Elias oropa kihorerakilai, eharu oaria veveke leikive. 12Ara ero maeaeaive — Elias overa kihorerape, aka ere arero ore au leila, ereve ikivere arero lari mai leipe. Lahovea kara haela ve Akore ere kakare avarakilai. 13La hoa kilea haela ore leipe are erero John Baptist rare oharo maeape.
Haiaru hekeheke arape akore
14Ere va haela oaria ve leia kihoahukape la hoa haela ae iki areve oropa ve ekaopi mari maeape, 15Amua e, arave akore ikiheroe hela leila, ehovea are haiaru hekeheke arape, heraho eapapo iele, mehae mehae are a ve hiki oauvila, mehae mehae ma ve hareauvila. 16Ara arero ave kilea haela kai leia lai ekepe, aka ere arero lei makuri va haveva. 17Iesu erero kavale maeaeape, Iapaki aue, iki haeae vilakao e! Ara e i hareho aeavila hare va leavaila ha? Ara va ero heraho leivila hare leavaila ha? Arero maia lai ekerurava. 18Iesu ovehahu aihukamaeape — are arero harepape. La hoa havahu akore veveke le leipe. 19Iesu ve kilea haela muruhari Iesu kai ekevahaeai arero mari maeape, Ipi leve elave aheke ovehahu avakakive hovea au leila ha? 20Iesu erero mari maeaeape, Ehovea eve ikikekela hekai iele. Ehovea, o iele, ara ero maeaeaive, Eve ikikekela mustard hae haroapo hovea ra leikilava — e va ma kela ra maeakilai, Lale ita apehai aula, kai are aukilai. Horova oaria eve aheke hoveahovea leikilai. E va eharu ae va aupovearaila. 21Lae vi va, ovehahu mahovea, ivaiva ere aheke ila hiki avakakive hovea.
Iesu areve aireaki apaki maea aeka kileape
22Ere va Galilee apearoape la hoa Iesu erero maeaeape, Haela ve Akore haela ve mai ve aireaki hihila maepaila. 23Ere arero harilai kai hare irehoila are kai le uroukilai.
Hehe Uvi ve tax kavale leipe
24Ere va Capernaum pekahavape la hoa — tax aeape la haela Peter kai ekevehaeai mari maeape, Ave haelapo tax kavale leivila ha? 25Are kavale maeape, Kaire. Are uvi pekape la hoa Iesu overa maeape maria, Ave iki leari kekelave ha? Leita haela amua oaria ve tax kavale leilula ha, ereve akoremari havahu ha, aka haela lahua ve ha? 26Peter arero maeape, Haela lahua ve. Iesu arero maeape, Laelave akoremari oaria tax kavale lei va ka. 27Lae vi va — ela erero lei hihiri leivahaeaki ave — a ma haru poe ve hoauki kivai ra paraea — a oropa koheravaki la ekaka kaivi areve ape ra hapai, a ureve shilling haroapo leia koarakilai, erero ra aiaraki, elavaila ve rare ve.
Currently Selected:
Matthew 17: ORO
Highlight
Share
Compare
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
