Mark 16
16
Iesu ve api kai uroupe hari
1Sabati hare kari leipe — Mary Magdalene i Mary James ve lou i Salome ila muramura muo veveke avikepe ehovea areve maea haririkive. 2Vevelare mea vitovito, hebedoma ve oropa hare, ere va kapu ita kai hoahukape, hare pekaki la hoa. 3Ere elare oharo maria hukavape, Elav'ila leita kapu ita ve have avarurakilai? 4Ere kai ovohae eavape — have overa avarura — ehovea are va have eapapo. 5Ere kapu ita ra hoahukai harokou haela mai ore ukai avai titavi la eavape: areve pura houhuka heaikiapo — ere kai oaoka eapapo iele. 6Are erero maeaeape, E oaoka kalaivahaelue — e va Iesu Nazareth haela satauro hape la haela ra haroparo — are overa urou — are maia va ka: ere arero aipepe la ita eavaila. 7E va elare ukaki auila — areve kilea haela i Peter ila maeaeakive — Are va Galilee eve oropa ve le ai. E arero leia eavakilai, are ero la hovea kileape. 8Ere elavelave hoahuka kapu ita ve hukaupe, ehovea ere oaoka lei uki hareape. Ere haela ka oharo au maeaila, ehovea ere oaoka eapapo iele.
9Iesu vevelare havahu uroupe la hepedoma ve oropa hare, arero oropa eavape Mary Magdalene, Iesu areve ovehahu 7 haruapape la uamari. 10Are kai areve haelakaru oaria, ere hivavara ape la hoa, la oharo kileape. 11Ere va Iesu ve ovokake kai Mary arero eavape la oharo iapai, iele au kelavaila.
12Aireaki are kai maea lahua koelari haela orahoka oropa ve epavape, erealila kaipure loa loa veavelaripe la hoa. 13Ere va auvahaeape ereve uku haela la oharo kileape — Ere kai erealila ve oharo kara au iapaila.
14Aireaki are haela eleven oropa ve erero aihukamaeape, ehovea ereve ikikekela iele karia, kai iki aheke iele, ehovea are urai la eavape la haela ve oharo ere va au iapaila. 15Are erero maeaeape, E va meahaiapo ita oaria auila, vilaipipi oaria haela iroro oharo ari. 16Haela ra iapakilava, kai bapatiso ra leikilava, are ovokake leikilai, kai iapaki aue ra leikilava la haela are le apakilai. 17Kai ikikelavalula haela ma ihova kai laukilava, ere va arave rare ve ovehahu haruapakilai — ere va uri are ra hukavakilai. 18Ere va ekaroa kailakilai — kai ere ma heaha ra lalavahaeakilava, ere kakare koara va ka — ere va maea heahaha haela mai paeai erero lei makukurikilai.
19Amua la oharo erero oropa maeaeape, aire are kaia ve le pekape, kai Aualari ve mai ore ukai ve avape. 20Ere hoahukai ita ita oaria iroro avahaeape — Ehovea Amua ere i hareho horova leipe ereve oharo i ihova ila iele aheke le leipe.
Currently Selected:
Mark 16: ORO
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
