Rome 10
10
Mai ehoe okiharo are haela oaria v'ila
1Apavara, ara va ikivere eapapo, kai mea oaria ivaiva leivila, Israel haela lei ovokake leivahaeakive. 2Ehovea ara ere v'ila vavavavaivila: ere va horova veveke ikivere, aka ere va iki ore havahu au leila. 3Ehovea ere va Aualari ve mai ehoe iele haveva, kai elare mai ehohoe hiki leivahaelula, laelave ere va Aualari ve mai ehoe iki mekari au kelavaila. 4Ehovea ikikelavalula haela oaria v' ore, pupu ve iele Keriso la, mai ehoe ve ukai ve.
5Ehovea Moses pupu ve mai ehoe ve mari maeape, pupu ve mai ehoe leivila la haela, la mai v'ila ovokake leikilai. 6Aka ikikekela ve mai ehoe ve oharo maria: Iki ureve kakekelarue — Kaia akea ve leita pekakilai? (la oharo ve iele, Keriso akea ve lai kihoaukive). 7Aeva ipi iele leita la hoaukilai? (la oharo ve iele — Keriso kapu ita ve lai pekakilai). 8Aka oharo learia maeape? La oharo ero maea iele aeavila, o iele, ave ape ureve kai ave iki ureve; la va ikikekela oharo iele, elaviila iroro arura la oharo iele. 9A va Amua Iesu ve rare a havahu ve ape ve la vavavakilava, kai iki ure maria la kekelakilava, Aualari arero karu ve lai urapape, a va ovokake le leikilai. 10Ehovea haela va iki ureve kekela lei ehoe leikilai: are va ape ve la vavavakilava, are lei ovokake leikilai. 11Buka oharo maria hape: Areve rare ikikekela la haela, aireaki makiri lei va ka. 12Ehovea Jew haela i Greek haela ila lahua lahua leivahaea va ka, ehovea haela oaria ve Amua areve rare itavaki la haela oaria lei ikiheheroe leivahaeakilai. 13Ehovea Amua ve rare itavavahaeaki la haela oaria ovokake leivahaeakilai.
14Laelave, ere iki au kelavaila la rare learia itavavahaeakilai? Ere va ore au laila la haela, ere areve rare leari ikikelavakilai? Ereve iroro arive karia la leikilava, ere learia iapakilai? 15Haela erero paparaehaki aue la leikilava, ere iroro oharo learia arilai. Oharo maria hape, Havila ve iroro oharo veveke arula la haela, kai eharu mekakure ve hari veveke arula la haela, ereve loa hara mekaka iele. 16Aka ere oaria oharo veveke au iapaila. Ehovea Isaiah maria maeape, Elave kilea oharo leita la iapape? 17Laelave — haela iapa veveke la leikilava, iki le kekelakilai. Iapaki la oharo ve iele Aualari ve oharo.
18Aka ara ero maeaeaive, Ere au iapaila ha? Kaire:
Ereve oharo meahaiapo ukai ukai iapape,
Ita oaria ereve iroro oharo iapape.
19Aka ara ero maeaeaive, Israel ore au leila ha? Oropa Moses maria maeape:
Ara rare aue la vilaipipi v'ila ero lei iki heaha leivahaeakilai.
Ehovea ikihaveva la vilaipipi, e va hihiri leivahaeakilai.
20Aka Isaiah ape aheke ape maria
Araro au haropaila la haela araro koarape.
Ara v'ila velavela au leila la haela ve oropa ve ara hihika leipe.
21Aka are Israel haela maria maeaeape:
Ara iapaki aue, oharo hahari hiki arula haela,
Ara va mai hiki haravaeape.
Currently Selected:
Rome 10: ORO
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society 1963-1972
