Rome 13
13
Amua haela ve pupu iapai kiva leivahaeakive
1Haela oaria gavana Haela ve pupu kiva leivahaeaki — ehovea ita oaria ve gavana Haela ere va Aualari ve horova haela — ereve horova ipi ve Aualari ve. 2Laelave gavana haela ve pupu hahaure leivahaeaki la haela ere Aualari ve pupu kara hahaure leivahaealula. La hahaure leilula la haela heaha kavale avakilai. 3Mai veveke haela gavana haela oaoka leivahaea va ka, mai heaha haela hiki. A va ikivere ka heheavaki haela oaoka leikive ha? Heroe, a horova veveke la leikilava, ave rare lei veveke leikilai. 4Ehovea are va ave horova kiva haela veveke. Aka a va heaha la leikilava, a oaoka leiki va heroe, ehovea are heheavaki rare naoae au availa. Are Aualari ve horova haela, ehovea haeae leiki la haela kavale avarakilai. 5Laelave, e va areve oharo iapa hiki, heroe, ehovea hihiri oaoka hiki va ka, aka ehovea iki kara ehoe leikive. 6Laelave, e va tax kavale kara leilula, ehovea tax korukaiavahaeaki haela ere va Aualari ve horova haela, ereve horova ma haroapo. 7Haela oaria ve kavale ehoe hiki leivahaeaki: tax haela areve tax moni, gavana haela areve la pupu hovea, akea haela lei momorapuki.
Apavara mai
8Haela ae ape karava kalaivahaelue — elarelare ikiheheroe leivahaeaki: ehovea ikiheheroe leilula haela pupu iele kiva leilula. 9Ehovea pupu maria, Airi pavora mai kalailue, korea kalailue, opore kahukavalue, haela ve eharu ikivere kalailue. Ma pupu oaria ipi ve iele ma, A i hareho aeavila haela — elare maea hovea ikiheroe leiki. 10Ikiheroe haela are i hareho aeavila la haela haiae lei va ka; laelave — pupu ve iele va ikiheroe.
Keriso ve hare kihorerakilai
11Aeka, e va ma hoa ore, avuku ve urouki hoa ma, ehovea ma hoa elaviilave ovokake hoa maia iele, elaviila oropa kelavape la hoa hovea ka. 12Oroa maeamaea karia leilai, hare hoa maia iele. Laelave elaviila muru hoa ve la horova haitapa va heroe, ovava ve eharu ikivere va heroe. 13Elaviila mai ehoe ila auvahaeakilai, hare hoa loalula hovea — elaviila ihape mai i mai heaha ila leivahaea va arekaea; korea mai kalaivahaelue; hahari i hihiri mai v'arekaea. 14Aka Iesu Keriso ve la mai veveke leivahaeaki — aeva aivau ve eharu i meahaiapo ve mai heaha kelava v'arekaea.
Currently Selected:
Rome 13: ORO
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society 1963-1972
