Rome 4
4
Abraham ve ihova
1Elaviila learia oharo arilai? Elaviilave aualau haela Abraham, aivau ve la oki ve, learia ha? 2Abraham ve horova arero lei ehoe va laila, are va pelaea leikive heroe, aka Aualari oropa ve v'arekaea. 3Pupu buka leari oharo hape? Abraham Aualari iki kekelape, laelave areve iki lei ehoe leipe. 4Horova leivila haela aeaki eharu meru va ka, areva kavale iele. 5Aka horova leiki aue haela, mai heaha lei ehoe leiki haela ikikekelavila la haela, areve ikikekela va mai ehoe hovea kekelavila. 6David kara laria — Aualari lei ehoe leiki la haela, kai areve horova hiki kekela va ka, la haela David morapaeape: 7Maria:
Ereve mai hahaeae hapururukaki la haela, kai heahaha hareavape la haela va iki veveke ila.
8Aualari areve mai haeae kekela va ka la haela va iki veveke ila.
9Ma lei veveke oharo peritome leiki haela v'ila hiki ha? aka peritome leiki aue haela v'ila kara ha? Ehovea elaviila Abraham v'ila maria arura, areve ikikekela arero lei ehoe leipe. 10Ere la ikikekela mai ve leari kekelape? — arero peritome leipe la hoa, aka peritome au laila la hoa ha? Peritome leipe la hoa va ka, aka peritome au laila la hoa. 11Are va peritome mai ve ihova avape. Areve peritome leiki aue hoa ve ikikekela ve ihova la. Laria are va ikikelavaki haela oaria ve oa leikilai, peritome leiki aue haela kara hareho, ehovea ere eoaria ehoe le leivahaeakilai. 12Aeva are va peritome mai leilula haela hiki ve oa lei va ka, aka Abraham ve peritome leiki aue hoa ve kekela mai kiva leilula la haela oaria ve oa kara.
13Ehovea Abraham meahaiapo ita oaria ve haruku aeakive la okoare pupu oaria v'ila au maeaila, aka ikikekela mai ehoe v'ila. 14Ehovea pupu hiki kiva leilula la haela basileia la aeakilava, ikikekela mai veveke naoae le leipe, okoare kara iele karia. 15Ehovea pupu ve oki ve hihiri kihorerakilai: pupu karia la leikilava, haeae kara karia.
16Laelave, ipi iele va ikikekelaki mai, ehovea ikiheroe meru hovea leikive: laria, okoare meavohula oaria le aeakilai, pupu kiva leilula la haela hiki ka, aka elaviila oaria ve papa Abraham ve ikikekela hovea leilula haela oaria kara. 17(Overa hape oharo ka laria: Ara aro vilaipipi oaria ve oa leikilai) are ikikekelape la Aualari, elaviila iki kelavakilai, ehovea are apihaeape haela lei ovokake leivahaeape, kai iele karia la eharu are iele le leivahaeape. 18Abraham ikihorahora leipe la hoa kara iki kekelape, laelave are vilaipipi oaria ve oa leipe, arero maeape la okoare hovea — ave meavohula maeakoko leivahaeakilai. 19Are haela eapapo i maea mahuka leipe la hoa are iki horahora au laila, ehovea are va hitolo 100 hovea. Sarah ve lauapau hoa kara, areve ikikekela karia au laila. 20Are Aualari ve okoare karipe hoa ikihorahora au leila, aka iki aheke kekela Aualari morapaeape. 21Ehovea are ore leipe — Aualari okoare maeape la horova are leikilai. 22Laelave la mai arero lei ehoe leipe. 23Arero lei ehoe leiki la oharo are hiki v'ila au haila. 24Aka, elaviila kara, ehovea elaviila elaviilave Amua Iesu karu ve lai urapape la Aualari iele la kelavakilai, elaviila lei ehohoe leivahaeakilai. 25Ehovea Iesu elaviilave haeae v'ila apape. Are elaviilara lei ehohoe leivahaeakive api kai uroupe.
Currently Selected:
Rome 4: ORO
Highlight
Share
Compare
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
