Kufuma 34
34
1Mzuri akamburra Musa, ukusongoiye maboho meri ma mabwe sa mala ma kuwoka nami ninetama wanga ya maboho viteto vioho ghati ya maboho ma kuwoka, umabaie. 2Ukuarehie heyawo, ukwee heyawo nduwi Sinai, ukung’ole hangu uko mtoni ha nduwi. 3Mundu asikwee na we, nete mundu asiwonwe ghati ya nduwi yose, nete mafio ma ngonji na ng’ombe masikurishe msongorana wa nduwi ila.
4Akasongoa maboho meri ma mabwe sa mala ma kuwoka; Musa akawuka heyawo kerre, akakwea na nduwi Sinai, sandu Mzuri emwaghanyie, akauha mkononi hakwe maboho meri ma mabwe. 5Mzuri akasea na ijumbi, akaimuka naye hala, akalitoranya izina la Mzuri, 6Mzuri akavetia msongorana wakwe, akatoranya, Mzuri, Mzuri Izuwa, mwenye lusario na kididi. 7Mwenye lusario hena maghana meingi, eshigia owiwi na matekwa na ng’oki: nete kushigiria teshigiriaye; ekiwaihija waana owiwi wa wawawee, na waana wa waana pia, mtano irika la katatu na la kanne. 8Musa akasara, akainamija mtwi si akaomba. 9Akaghamba, Kwakicha nawona mvono mesoni hako, Mzuri, nakusemba, Mzuri wangu atonge ghati yetu; amu niwo wandu wa singo lidindie; utushighie owiwi wetu na ngoki yetu, utuuhe hena uhodjo.
10Akaghamba, Yoa, naareha lutemiano: msongorana wa wandu wako wose nineketa marighio, sa mesimeketwa ghati ya masanga mose, nete ghati ya mbare yose: na wandu wose, ghati yawo uoho we, wenewona ndima ya Mzuri: amu nikyo kiteto cha kuitusha ninekuketia. 11Yoa kindu kila nakuaghanya yoo: yoa, nakinya msongorana wako Mwamori na Mkanaani, na Mhitti, na Mperizzi, na Mhiwi na Myebusi. 12Ukuyoe, usiarehe lutemiano na manoti ma isanga ulitongie, lusioke hena mtegho ghati yakwe: 13Kake munenyamara visiko vyawo, munejibaa sanamu jawo, munejitema Ashera jawo: 14Amu touneomba Izuwa lingi: amu Mzuri, izina lakwe Yahuwa, niye Izuwa mneng’i. 15Usiareha lutemiano na manoti ma isanga, nawe kutonga kulangwa maizuwa mawo, na kumatasa maizuwa mawo, na mundu akuitanga, nawe kula cha itasi lakwe. 16Nawe kuuha wa waana wawo wa kiche hena waana wako wa kiume, na waana wawo wa kiche kutonga kulangwa maizuwa mawo, na kujuta waana wako wa kiume kutonga kulangwa maizuwa mawo. 17Usikuarehia maizuwa ma menya yachangaruke.
18Uneligura itasi la mabumunda mesifushwe. Misi mifungate unela mabumunda mesifushwe, sandu nikuaghanyie, magheri ma mweji Abib: amu magheri ma mweji Abib wafuma na Misri. 19Chose chajughua ndeni changu; na wa mbele ose wa ng’ombe jako, ng’ombe kana ng’onji. 20Kake wa mbele wa njoe unemkombola na kaghonji: na kwakicha usamkombola, niho unembaa singo. Wa mbele wose wa waana wako unewakombola. Na mundu asiwonwe msongorana wangu kihaya.
21Misi mitandatu unehira ndima, kake musi wa kafungate unesowoka, magheri ma kukaghia na magheri ma kufindika unesowoka.
22Na uneligura itasi la juma, la malumbulo ma mafindiko ma ngano, na itasi la kufindika kuidiwika kwa mwaka.
23Kandu katatu waana wa kiume wenyu wose wenewonwa msongorana wa Mzuri Izuwa, Izuwa wa Israeli. 24Amu ninejikinya mbare msongorana wako, na ninenetija mihaka yako; nete mundu tenelienda isanga lako, magheri wakwea uwonwe msongorana wa Mzuri Izuwa wako kandu katatu ghati ya mwaka. 25Using’ole sakame ya itasi langu kimwe na kufusha; nete itasi la pasaka lisishighajike mtana heyawo. 26La kuwoka la malumbulo ma isango lako uneete na nyumba ya Mzuri Izuwa wako. Usirughe kidaghina ghati ya mavee ma mee. 27Mzuri akamburra Musa, Vitama viteto ivi: amu hena mburi ya viteto ivi naareha lutemiano na we na Israeli. 28Akaoka uko hamwe na Mzuri misi makumaane hemusi na kio; nete telaye kidjo nete tenywaye mbombe. Akatama na maboho viteto vya lutemiano, maaghanyo ikumi. 29Ikaoka, Musa ekinasee nduwini, Musa tetisiwaye ti kikonde cha wusho wakwe chawaa ekinatete naye. 30Harun na waana wose wa Israeli wekinawone Musa, yoa, kikonde cha wusho wakwe chawaa; wakaituka kumsongeria. 31Musa akawaitanga; Harun na wabaha wose wa mawunganyiko wakamhundukia; Musa akateta nawo. 32Ikuade waana wose wa Israeli wakasongeria, akawainga hena aghanyo vyose Mzuri emtetie nduwini Sinai. 33Na mtano Musa eidiwe kuteta nawo, egera lumali wushoni hakwe. 34Kake Musa ekinaingie msongorana wa Mzuri atete naye, ehambua mtano ekinafume. Akafuma akateta na waana wa Israeli kila eaghanyiwe. 35Waana wa Israeli wakauwona wusho wa Musa, ti kikonde cha wusho wa Musa chawaa: Musa akagera lumali wushoni hakwewa, mtano eingie atete naye.
Currently Selected:
Kufuma 34: TAVETA
Highlight
Share
Copy
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
