Luka 24
24
1Na musi wa kuwoka ghati ya misi ila mifungate, magheri ma heyawo kerre, wakaza mbireni, wekitika vindu vila weokie wekiareha, na wengi hamwe nawo. 2Wakawona ibwe libingilishwa mbireni. 3Wakaingia, wasiwone muri wakwe Mzuri Yesu. 4Ikaoka wekirighiwa hena vindu ivi, yoa, wandu weri wakaimuka msongorana wawo wedokie suke ja kumereteka: 5na wekinagurwe ni fole na wekinainamije wusho si, wakawawurra, Nini kumwenda eoho na moo ghati ya wefwie? 6Teoho aha, awuka; kumbukeni sandu emburrire unywi, ekioka ghati ya Galilaya, 7ekiteta, ti yambe Mwana wa Adamu kung’olwa mikononi ha wang’oki, na kuwanikwa, na kuwuka musi wa katatu. 8Wakakumbuka viteto vyakwe, 9wakahunduka mbireni, wakaliya mburi ya vindu ivi vyose hena wala ikumi na mwe na wala wengi wose. 10Wakaoka Maryamu Magdalene, na Yoanna, na Maryamu mee Yakobo, na wengi hamwe nawo, wewawurrire wasu vindu ivi. 11Kake viteto ivi viokie hawo sa sola, nete teweviitikija. 12Kake Petro akawuka, akasara kutonga mbireni, akainama akawona suke jila tiki, akatonga, ekirighiwa ngoroni hena vindu viokie.
13Na yoa, musi ulaula, weri wawo weokie wekitonga kiongo, izina lakwe Emmao, kufuma Yerusalemi stadio makumi matandatu. 14Wakaoka wekitederisho vindu vila vyose viokie hawo. 15Ikaoka wekioka wekitederishiana, wekiwujanyana, Yesu mwenye akawasongeria, akatonga hamwe nawo. 16Kake meso mawo makaoka mekiswijwa wasimtwarije. 17Akawawurra, Ni viteto ani ivi muviteta mukisela? Wakaimuka, wekiyoa kikikiwa. 18Na mwe wawo, izina lakwe Kleopa, akatalwa akamburra, Niwe mjenye ghati ya wagheni wa Yerusalemi usitisiwe vindu viokie ghati yakwe misi ii? 19Akawawurra, Vindu ani? Wakamburra, Vindu vya Yesu Mnazareti, eokie Mroti, mwenye zinya hena kuareha na kuteta, msongorana wa Izuwa na msongorana wa wandu wose; 20na sandu wakara wabaha na wabaha wetu wemng’olie hena uchili wa kukoma, wakambanika. 21Na uswi tweing’idaki ti niye enekombola Israeli. Na hamwe na vindu ivi vyose, yoo ni musi wa katatu too vindu ivi viokie. 22Henawa wache wa hetu, wakatuirutuja, wetongie mbireni heyawo; 23wasiwone muri wakwe, wakaza, wekiteta ti wefumiwe ni malaika, wawawurra ti eoho na moo. 24Na wengi wa wala wa hetu wakatonga mbireni, wakawona huwo sandu wache wetetie, kake ye mwenye tewembonie. 25Akawawurra, Unywi mutomoda, na wenye ngoro jiemee, ghati ya kuitikija viteto vyose mroti wevitetie! 26Teimbe Masihi kunyamarwa uku, na kuingia ghati ya kirumi chakwe? 27Na ekiwoka too Musa na waroti wose akawatindia ghati ya vitamo vyose, viteto vya mburi yakwe. 28Wakasongeria kiongo wekikitonga; naye akakuitaa sa ekundie kuvetia. 29Wakamsingirija, wekiteta, Ikaa hamwe na uswi, amu ni chamagheri, na haswa. 30Akaingia kuikaa nawo. Ikaoka ekiikaa kidjoni hamwe nawo, akauha ibumunda, akalitasia, akalibaa, akawainga. 31Meso mawo makajughuka, wakamtwarija; naye akamerukia asiwonekane nawo. 32Mwe wawo akamburra mughenji, Ngoro jetu tejiokie jikiaka ndeni hetu, ekioka ekiteta na uswi nzieni, ekitutindia vitamo. 33Wakawuka magheri mala, wakahunduka Yerusalemi, wakawona wala ikumi na mwe wewunganyike, 34na wala hamwe nawo, wekiteta, Mzuri awuka kididi, akamfumia Siman. 35Nawo wakawaliya mburi ila ya nzieni, sandu atwarijike nawo ekiwabaiya ibumunda.
36Na wekioka wekiteta, Yesu mwenye akaimuka ghati yawo, akawawurra, Luworo henyu. 37Wakaituka, wakaingiwa ni fole, wakaitaa watewona kisuka. 38Akawawurra, Nini kuituka na nini kuitalua ngoroni henyu? 39Yoeni mikono yangu na maghu mangu, ti ni mi mwenye; nibabateni, yoeni; amu kisuka tekina nyama na mawindi, sandu mwaniwona mi kuoka namo. 40Na ekinatete huwo, akawawondja mikono na maghu. 41Na wekioka teweitikija hena kuizihirwa wekirighiwa, akawawurra, Muna kindu cha kula aha? 42Wakamwinga kibarandu cha nguluma kishotiwe. 43Akakiuha, akala msongorana wawo.
44Akawawurra, Ivi ni viteto vyangu namburrire nikinaoke hamwe na unywi, ti yaviwe kufishwa vyose vitamiwe ghati ya kiteto cha Musa na waroti na malumbo hena mburi yangu. 45Akawawijia kucha, nesa watwarije vitamo. 46Akawawurra, ti Huwo vitamiwe, Masihi anyamarwe na kuwuka ghati ya wefwie musi wa katatu; 47na ti kuchwamuti na kushigiwa kwa ng’oki kutindwe ghati ya wandu wose, hena izina lakwe, kukiwoka Yerusalemi. 48Na unywi ni wang’ola mburi ya vindu ivi. 49Na yoeni, namwingijija lutemiano lwa Apa wangu wanga yenyu, na unywi muikae ghati ya kiongo mtano muneikamudokwe na zinya jifuma wanga.
50Akawatika mtano Betania, akawushija mikono yakwe akawatasia. 51Ikaoka, ekioka ekiwatasia, akakukemba hawo, akakwejwa wanga. 52Nawo wakamwinamia, wakahunduka Yerusalemi hena kuizihirwa kubaha. 53Wakaoka hekaluni misi yose, wekimwisisa Izuwa.
KUIDIWIKA.
Currently Selected:
Luka 24: TAVETA
Highlight
Share
Copy
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
