Jon 1

Gute Ka Ida Tapolngon Ila Pelengon

1Oglou oglou ari alo ka Ida Tapolngon dau tapol wan gesa kovok gute ka ina sirngen Ida Tapolngon Ila Pelengon dong kap iye e gute tonari iye Ida Tapolngon blang. 2Iye dong kap Ida Tapolngon alo ka wan gesa dau polou kovok. 3Ida Tapolngon due gute tonari ma iye tapol wan ka pula keniye ka tidong. E wan gesa polou ke ekreng silang kovok. Aurou. 4E gute tonari iye mosongon batne e mosongon tonari langka osep ka pula keniye urok bublongon ka due isak tile omur itau. 5E bublongon tonari bublo ke aivoro e aivoro karanga mole kovok.

6Mase Ida Tapolngon pagei gute ma iye kalke ila omon ka angaine Jon ma iye me polou ke osep. 7Iye me ma iye palongo osep ke bublongon tonari ma tiklingen ila pelengon e aitno lisak la dagar ke bublongon. 8Iye tona bublongon tonari kovok. Aurou. Iye me ma iye palongo osep ke bublongon vala. 9Bublongon tonari iye bublo-ngon ka lokono ka me ke taklak e bublo ke osep ka pula keniye ma tikaranga tile omur itau. 10Bublongon me dong ke taklak e lama Ida Tapolngon due gute tonari tapol taklak e wan ka pula keniye ka tidong ine dau osep ke taklak tile iye kovok. 11Iye me ke ila osua e aitno lisak itau ke iye kovok e tidue kovok. 12E dau osep ka aitno lisak dagar ke iye e tidue io iye kar isak arit ma tikaranga tipolou Ida Tapolngon titno. 13Tipolou Ida Tapolngon titno batne ke elio ka sipmarak e titnarak tikaranga tidivir titorok koke elio ka aitno lisak waiki due langane koke elio ka osep leklou aitno lisak waiki due langane kovok. Aurou. Tipolou titno batne ke Ida Tapolngon aitno vala.

14Gute ka ina sirngen Ida Tapolngon Ila Pelengon polou langka itosep e ke sasi boto iye dong kap ite e itavati ila bublongon e ila arit ka ombatno. Iye dong langane kesua iye Ida Tapolngon Otno Arang ka kene vala e elio ka iye makai ite e wai pelengon lokono bon ke iye. 15Gute Jon daiku e palongo ke iye langane. “Gute ane gute ka ngawai ke iye langane. ‘Gute ka me batne ke ngong iye mole ngong kesau iye dong kodong alo ka nina dau divir ngong kovok.’” 16Makaingan pula lokono dong ke iye e aling aling iye due elio itau lokono ke ite ka pula keniye. 17Oglou Moses sogo Ida Tapolngon ila pelengon dagar e kare ke ite e oku ane Yesus Krais kar Ida Tapolngon ila makaingan e ila pelengon ka lokono ke ite. 18Gute kene vati Ida Tapolngon kovok e dau Otno Arang nis ite malak ke iye ma iteile omur ke iye. Otno Arang tonari iye kene vala e iye dong olwo boto ke Ida Tapolngon e iye Ida Tapolngon blang.

Jon wai e paunim osep

(Matyu 3.1-12 e Mak 1.7-8 e Luk 3.15-17)

19E osep Yuda ina ka tidong ke Jerusalem tipagei osep loulou ina leklou e osep Livai ina leklou isak kla ke Jon ma tiwai ke iye ma tile iye gute ka lange. E Jon ila pelengon ane. 20Iye wai malak ke isak e bisi ine kovok. Iye wai langane. “Ngong gute Krais ka Ida Tapolngon rere ma iye lua osep ke urok elio epmes ina kovok.” 21Deka tipmi iye langane. “Deka lange? Wom gute Elaija koke aurou?” E Jon koli wai ke isak langane. “Aurou. Ngong Elaija kovok.” Deka tipmi iye blang langane. “Wom gute napaprangan ina ka itapara ke iye koke aurou?” E Jon koli wai ke isak langane. “Aurou. Ngong gute napaprangan ina tonari kovok.” 22Deka tipmi iye langane. “Wom gute ka lange? Omkoli limem pelengon ma imakaranga imawai ine ke osep ka tipagei imi imeme ke wom. Amwai lange ke wom tona?” 23E Jon koli wai langane. “Ngong langka kreine ka wai ke omur ka dong adai vala langane.

‘Umodue Ida Puda ila ek-reng osuk.’

Ane pelengon eriar langka oglou gute napaprangan ina Aisaia wai ine.”

24Osep tonari tipolou ke Jon kesua osep Farisi ina tipagei isak kla ke iye. 25E tipmi iye langane. “Langka wom gute Krais koke gute Elaija koke gute napaprangan ina ka itapara ke iye kovok ina lange ampaunim osep?” 26E Jon koli wai ke isak langane. “Ngapaunim osep ke aki e gute kene dong airavu ke umu ka umeile ke iye kovok. 27Iye gute ka me batne ke ngong e dau ngong gute itau ma ngakaranga ngakles ila su kovok.” 28Elio ane polou ke armok Betani ka dong ke aki Jordan burla ke omur ka Jon paunim osep ine.

Yesus iye Ida Tapolngon ila Sipsip Otno

29E ke oklou silang Jon vati Yesus lila me ke iye e wai ke osep langane. “Umavati. Gute are gute ka Ida Tapolngon ila Sipsip Otno ka due osep ke taklak urok elio epmes ina noklok la. 30Gute ane gute ka ngawai ke iye alo ka ngawai langane. ‘Gute ka me batne ke ngong iye mole ngong kesua iye dong kodong alo ka nina dau divir ngong kovok.’ 31Ngong tona ngaile ke iye kovok e ngame ngapaunim osep ke aki ma osep Israel ina tikaranga tile iye.” 32Deka Jon palongo osep langane. “Ngavati Ano Itau duru ke omur heven langka belis e dong ke iye. 33E dau ngaile ke iye kovok e Ida Tapolngon ka pagei ngong ngapaunim osep ke aki wai ke ngong langane. ‘Alo ka amvati Ano Itau duru dong ke gute kene ma emile iye gute ka paunim osep ke Ano Itau.’ 34E ngavati elio ane e ngapalongo lumu gute ane iye Ida Tapolngon Otno Arang.”

Osep leklou tipolou Yesus ila disaipel

35E oklou silang Jon vri kap osep orwo ka isak ila disaipel. 36E alo ka iye vati Yesus lila iye wai langane. “Umavati. Gute are Ida Tapolngon ila Sipsip Otno.” 37Alo ka disaipel orwo tiklingen Jon wai langane tididi Yesus. 38Tididi iye deka Yesus bauluk e vati isak tididi iye e pmi isak langane. “Umawaiki umeile wansua?” E tikoli tiwai langane. “Rabai omdong ge?” Pelengon palma rabai lana ine gute parerengen ina. 39E Yesus koli wai ke isak langane. “Umomo e umavati omur ka ngadong ine.” Deka isak kla kap iye e tivati omur ka iye dong ine e tidong kap iye ke oklou are. Kesua alo ari langka 4 kilok ke kirui. 40E gute kene ke isak ka tiklingen Jon ila pelengon e didi Yesus angaine Andru e iye gute Saimon Pita ina tovro. 41Ke kotkotu alo ka Andru songon Yesus lokono iye la pado ina aiver Saimon e wai ke iye langane. “Imavati gute ka Mesaia kodong.” Pelengon palma Mesaia lana ine gute ka Ida Tapolngon rere Krais ma iye lua osep ke urok elio epmes ina. 42E iye paur Saimon la ke Yesus e Yesus vati iye deka wai ke iye langane. “Wom Saimon e abo angaine Jon. Ma osep tisir wom Sifas.” E angaine Sifas eriar langka angaine Pita e lana ine opmu.

Yesus gi Filip e Nataniel ma tididi iye

43Oklou silang polou e Yesus aitno mter ma iye la ke omur Galili. E alo ka iye la iye pado Filip e wai ke iye langane. “Emdidi ngong.” 44E Filip ila armok batne armok Betsaida ka Andru e Pita urok armok batne blang. 45Deka Filip la pado gute Nataniel e wai langane. “Imapado gute ka Moses sogo ine ke ila sogongon e osep napaprangan ina tisogo ine ke urok sogongon blang. Iye Yesus ka Josep otno arang e iye me ke Nasaret.” 46E Nataniel koli wai langane. “Wan itau karanga polou ke Nasaret koke aurou?” E Filip wai langane. “Omo e amvati iye.” 47Alo ka Yesus vati Nataniel me olwo boto iye wai langane. “Gute ane gute Israel ina lokono e elio yakngan dong ke iye kovok.” 48E Nataniel pmi iye langane. “Lange ka emile ngong?” E Yesus koli wai ke iye langane. “Alo ka omdong ka akai fik batne e Filip dau wai ke wom kovok ngavati wom kodong.” 49Deka Nataniel wai ke iye langane. “Rabai wom Ida Tapolngon Otno Arang. Wom gute ka vri mgo ke osep Israel ina.” 50E Yesus koli wai langane. “Aitno lugom dagar kesua ngawai ke wom ngavati wom omdong ke akai fik batne. Ma amvati elio pula ka mole elio ane.” 51E Yesus wai blang langane. “Ngawai lokono ke umu langane. Mase ma umavati omur heven noklok e Ida Tapolngon ila ensel langka titito e tiduru ke Gute Ka Polou Langka Osep.”

Currently Selected:

Jon 1: ANT

Highlight

Copy