Luk 1

Luk sogo pas ane uti la ke Tiofilus

1Osep pula tinogrum ma tisogo basikngen ke elio omba ka polou airavu ke imi. 2Eriar langka osep ka tidong oglou lila me tivati wan ka tipolou e tinapapra omon itau deka tiwai ke imi ine blang. 3E aitno lungong mter are itau ma ngong blang ngasogo ine kesua ngaboko engil ma ngaile omur ke wan ka polou batne la gurno. E ngasogo pelengon ane ke wom gute namor Tiofilus. 4Ngadue langane ma amkaranga emile omur ke wan ka lokono ka osep tiparere wom ine.

Ensel wai ke Sekaraia ke Jon ina divirngen

5Alo ka gute Herot vri mgo ke omur Judia gute loulou ina kene dong ka angaine Sekaraia. Iye dong ke gute Abiya ila osua e ila asap angaine Elisabet. E Elisabet dong ke gute Aron ila osua. 6Isak orwo tidong itau e osuk ke Ida Tapolngon bitna e tididi Moses ila sogongon lokono e tididi wan ka Ida Puda wai ine e wan gesa vri ke isak kovok. 7E titorok tidong kovok kesua Elisabet opon e isak orwo lapun kodong.

8E oklou polou ka osua ke osep loulou ina ka Sekaraia dong ine tiboko ke Ida Tapolngon bitna. 9E tididi inarak apu e tiuri opmu ka nisngen dong ke isak e ke elio ane tirere Sekaraia ma iye sep ke Ida Puda ila ninu e kamlu paura ka ina amnangan itau e amnangan itau tonari tito la ke Ida Tapolngon. 10E alo ka Sekaraia la kamlu paura osep pula tidong ke Ida Tapolngon ila ninu dogur e tiwai itau ke Ida Tapolngon.

11Deka Ida Puda ila ensel gesa polou ke Sekaraia e vri olwo boto ke bota ka tikamlu paura ine galna odung. 12E alo ka Sekaraia vati ensel iye digrik e ulou tarna ke iye. 13E ensel wai langane. “Sekaraia omulou tarna lugom sakam kesua Ida Tapolngon klingen lem pmingen itau kodong. E lem asap Elisabet ma divir etim arang e ma ambaski angaine Jon. 14E ma aitno lumu neser e umodong itau ine e osep pula ma aitno lisak neser batne ke ina divirngen. 15Kesua ma iye polou gute ka angaine omba ke Ida Puda bitna. E ma iye inim aki wain koke aki dagar kovok e ma Ano Itau plau iye itau alo ka iye dau dong ke mimi ila armok ke tna pele. E ma Ano Itau dong ke iye aling aling. 16E ma iye due osep Israel ina pula tibauluk aitno lisak ke Ida Puda ka Inarak Tapolngon. 17E Ano Itau due e ma iye due elio e arit langka Elaija e mgo ke Ida Puda e due osep aitno lisak tibauluk ke titorok e due osep ka tini Ida Tapolngon kovok tibauluk aitno lisak la ke elio ka osep itau tidue. Ma iye mosi osep aitno lisak ma tiwaiki tididi Ida Puda.”

18Deka Sekaraia wai ke ensel langane. “Lange ka ngakaranga ngaile lem pelengon lokono? Kesua ngong lapun kodong e lou asap ina tobor pula blang.”

19E ensel koli wai ke iye langane. “Ngong Gebriel e ngavri ke Ida Tapolngon bitna e iye pagei ngong ma ngawai ke wom e ngapalongo lem ke pelengon itau ane. 20Emklingen. Aitno lugom dagar ke lou pelengon kovok deka ke batne ane oku ane ma amkaranga amwai kovok la lama wan ka ngawai ine polou lokono. E lou pelengon ma polou lokono alo ka Ida Tapolngon rere.”

21Alo ka Sekaraia wai ke ensel osep ka tidong tipara ke Sekaraia aitno lisak mter langane. “Ina lange iye dong tauni ke Ida Tapolngon ila ninu?” 22Deka alo ka iye polou ke dogur iye karanga wai kovok. E tile iye vati ano alo ka iye dong ke Ida Tapolngon ila ninu. Iye due nisngen ke limla e dau iye karanga wai kovok.

23Alo ka ila osua urok boko-ngon ke Ida Tapolngon ila ninu yagos Sekaraia iding ke ila ninu. 24Mase ila asap Elisabet somugu e ke taiko elme iye dong ke ninu vala. E iye wai langane. 25“Oku ane Ngau Puda aitno due ngong e due elio itau ke ngong. Oglou ngakaranga ngadivir kovok e ke elio ane ngong mnak ngong ke osep amtarsak. E oku ane iye pi lou mnakngan la.”

Ensel wai ke Maria ma iye divir Yesus

26Alo ka Elisabet somugu taiko lumakene kodong Ida Tapol-ngon pagei ila ensel Gebriel ke armok Nasaret ka dong ke omur Galili. 27Iye la ke apmang ka due elio kap gute dau kovok ka angaine Maria. Osep tiwai kodong ma Maria gi gute ka angaine Josep ka dong ke Devit ila osua. 28Ensel tonari la ke iye e wai langane. “Oklou itau Maria wom ka Ida Tapolngon due mada ke wom. Ida Puda dong kap wom.”

29E Maria aitno kro ke ila pelengon e aitno mter ke ila pelengon batne. 30E ensel wai ke iye blang langane. “Maria emlim sakam kesua Ida Tapolngon aitno itau ke wom. 31Emklingen. Ma omsomugu e emdivir etim arang e ma ambaski angaine Yesus. 32Ma iye polou gute ka angaine omba e osep tisir iye Ida Tapolngon ka dong egim lokono Otno Arang. E Ida Tapolngon ka Ida Puda ma kar arit ke iye ma iye vri mgo langka ila eia Devit. 33E ma iye vri mgo ke gute Jekop ila osua aling aling e omur ka iye vri mgo ine ma dong vala dong.”

34E Maria koli wai ke ensel langane. “Lange ka wan ka amwai ke ngong ine karanga polou kesua ngong dau ngadue elio kap gute kovok e silang blang lou boget dong kovok?”

35Deka ensel koli wai ke iye langane. “Ano Itau ma me ke wom e Ida Tapolngon ka dong egim lokono ila arit ma kading wom. E ke batne langane osep ma tisir mimi ka itau itau lokono ka emdivir iye Ida Tapolngon Otno Arang. 36Emklingen. Silang lem adou Elisabet ka lapun kodong somugu e ma divir mimi. Apmang tonari ka osep tisir iye opon dong ke taiko lumakene ina ke ila somugungon. 37Kesua Ida Tapolngon karanga due wan ka iye waiki due.”

38Deka Maria wai langane. “Ngong Ngau Puda ila apmang bokongon ina. Ma iye due elio itau ke ngong eriar langka amwai ine.” Deka ensel songon Maria.

Maria la vati Elisabet

39Alo ari Maria mosi ila wan e la suong ke armok kene ka dong ke omur ka gigri gigri ke omur Judia. 40E ke armok tonari iye sep ke Sekaraia ila ninu e wai “oklou itau” ke Elisabet. 41E alo ka Elisabet klingen Maria kreine deka mimi toktok ke mimi ila armok ke pele e Ano Itau sep ke Elisabet. 42Deka Elisabet wai omba langane. “Ida Tapolngon aitno itau itau ke wom ka mole elio itau ka iye due ke apmang keniye leklou. E aitno itau itau ke mimi ka ma emdivir iye. 43E ngong sei ma Ngau Puda ina aiya me vati ngong? 44Kesua alo ka ngaklingen kre lugom mimi toktok ke mimi ila armok ke pele lungong kesua aitno itau. 45E aitno lugom itau itau kesua aitno lugom dagar ma wan ka emklingen Ida Puda wai ine ma polou.”

Maria kakai Ida Tapolngon angaine

46Deka Maria wai langane. “Ngakakai Ida Puda angaine lokono ke aitno lungong. 47E anngong neser ke Ida Tapolngon ka Ngau Luangan. 48Kesua aitno mter ke ngong ka ila apmang bokongon ina ka ngadong moli vala. E mase osep ka pula keniye ma tisir ngong apmang ka Ida Tapolngon aitno itau itau ke iye. 49Kesua Ida Tapolngon ka ila arit ombatno due elio itau lokono ke ngong e iye dong itau lokono e elio soulu dong ke iye kovok. 50E aitno due osep ka tidue anit ke iye e elio ka aitno due osep pakes duru ke osep ka pula keniye. 51Iye due elio itau ke ila arit e due osep ka tiwaiki tikakai isak tona angainsak tidardar kla. 52Iye pi osep ka tivri mgo ke omur omur ke urok kova e iye kakai osep ka tidong moli angainsak. 53Iye kar wan itau pula ke osep ka urok wan isuk boto vala e iye sapir osep ka urok wan pula dong ke isak. 54Bitna sisir osep Israel ina ka isak ila osep bokongon ina e aitno due isak. 55Eriar langka iye wai promis ke Abraham e udo seia urok napakngan dong vala dong.” 56E Maria dong kap Elisabet langka taiko eklu deka iding ke ila armok.

Elisabet divir Jon

57E taim ka Elisabet ma divir polou e iye divir mimi arang. 58Ila osua e osep ka tidong olwo boto ke iye tiklingen omon Ida Puda aitno due iye omba e aitno lisak neser kap iye. 59Deka ke oklou lumeklu ina time ma tiulang mimi e tiwaiki tibaski timla angaine Sekaraia ke iye blang. 60E tna wai langane. “Aurou. Ma itabaski angaine Jon.” 61E tikoli tiwai ke iye langane. “Gute gesa dong ke lem osua ka angaine Jon kovok.” 62Deka tidue nisngen ke limsak ke timla ma tile omur langka iye waiki baski angaine sei ke mimi. 63E iye waiki tidue wan ka iye karanga sogo ine e iye sogo langane. “Angaine Jon.” Deka osep tidigrik ine. 64Sekaraia sogo langane deka bale suong iye karanga wai blang e iye wai e kakai Ida Tapolngon angaine. 65Osep ka tidong olwo boto ke iye tilim ine ke elio ane osep ke omur ka gigri gigri ke omur Judia tiwai pulu ke wan ka polou. 66E osep ka pula keniye ka tiklingen ke elio ane aitno lisak mter ine e tipmi langane. “Wansua ma polou ke mimi ane?” Kesua Ida Puda ila arit dong kap iye.

Sekaraia napapra pelengon

67E Ano Itau sep ke timla Sekaraia e iye napapra langane. 68“Ma itakakai Ida Puda ka Ida Tapolngon angaine tito la egim. Iye osep Israel ina Inarak Tapolngon e iye me ke ila osep e kli urok elio epmes ina. 69Ke ila gute bokongon ina Devit ila osua iye due gute polou ka lua ite ke udo elio epmes ina. 70Eriar langka oglou Ida Tapolngon due ila osep napaprangan ina ka isak itau itau lokono aitno lisak deka tiwai ila pelengon. 71Ma gute tonari lua ite ma ida oul e osep ka aitno lisak engil lokono ke ite tivri mgo ke ite kovok. 72Aitno due udo seia e bitna sisir kontrak ka iye wai ine e ma iye tona didie. 73E bitna sisir alo ka iye wai promis ke udo eia Abraham. 74Ma iye pi ite ke ida oul limsak ma tivri mgo ke ite kovok e ma itakaranga itodue ila bokongon e itelim ke osep kovok. 75Ma alo ka itodong ke udo mosongon itodue elio isuk isuk ka itau lokono e elio ka due ite itodong itau ke Ida Tapolngon bitna. 76E wom erigu ma osep tisir wom gute napaprangan ina ke Ida Tapolngon ka dong egim lokono. Wom ma mgo ke Ida Puda e kere ila ekreng. 77Ma ampalongo osep ma tile iye lua isak ke urok elio epmes ina. E iye sak urok elio epmes ina la. 78ye due langane kesua aitno due ite omba. E ma bublongon langka alo ka oklou tito me ke ite ke omur heven. 79E bublo ke osep ka tidong ke aivoro e ka metengen kading isak langka wan ano kadinge ma bublongon tonari nis ite ke ekreng ma itodong aitno lite epen.”

80E mimi tonari polou omba e ano polou dagar blang. Iye dong ke omur ka dong adai vala la lama alo ka iye polou malak ke osep Israel ina amtarsak.

Currently Selected:

Luk 1: ANT

Highlight

Copy