Luk 11

Yesus wai ke osep ke elio ka itawai itau ke Ida Tapolngon

(Matyu 6.9-15 e Matyu 7.7-11)

1Ke oklou gesa Yesus wai itau ke Ida Tapolngon ke omur kene. Alo ka iye wai itau yagos deka ila disaipel gesa pmi iye langane. “Ipem Puda amnasi imi ke elio ka imawai itau ke Ida Tapolngon langka Jon nasi ila disaipel ine.” 2E Yesus wai ke isak langane. “Alo ka umawai itau umawai langane. ‘Pmemi omlua imi ma imodue anit ke wom. E imawaiki omur ka amplaue me ke taklak. 3Ke oklou kene kene amkar ipem ngangon ke imi. 4E amsak limem elio epmes ina e omlua imi ma imasak elio soulu ka osep tidue ke imi. E silang omsongon tokngon ma polou ke imi kovok.’”

5Deka Yesus wai ke isak langane. “Langka gute kene ke umu ila aten dong e umala ke iye ke epmes airavu e umawai langane. ‘Ate amkar bret eklu ke ngong. 6Kesua lou aten la ke ila langan e polou ke ngong oku ane e ngangon dong ka ngakaranga ngakare ke iye kovok.’ 7E gute tonari dong ke ila ninu e koli wai langane. ‘Omdue elio langane ka opru ngong kovok. Ngadiva ekreng bitna kodong e ngong e dirgu imomunu ke limem kova. Ngakaranga ngatipa e ngalua wom kovok.’ 8E ngawai lokono ke umu langane. Lama gute tonari waiki tipa e kar ngangon ke ila aten batne iye pmi gute tonari ine kovok dau langka gute dong pmi pmi ine gute tonari ma tipa e kar iye wan ka iye waiki due. 9E ngawai ke umu langane. Langka umepmi Ida Tapolngon ke wan ma iye kare ke umu e langka umekrim ke wan ma umapadoe e langka lupmu nopolpol ke ekreng bitna ma Ida Tapolngon kloke ma umakaranga umesep ke ninu. 10Kesua osep ka pula keniye ka tipmi iye ke wan ma tidue e osep ka tikrim wan ma tipadoe e osep ka limsak nopolpol ke ekreng bitna ma Ida Tapolngon kloke ke isak.”

11“E langka otopmu gesa pmi timla ke lodu ma gute tonari kar iye mota? Aurou. 12Koke langka iye pmi iye ke kwako tovutno ma gute tonari kar iye gitu? Aurou. 13Umu osep ka umodue elio soulu e dau umakar wan itau ke otopmu. Deka Pmomu ka dong ke omur heven ma mole lumu elio tonari e kar Ano Itau ke osep ka tipmi iye ine.”

Osep tiwai Yesus due Satan ila bokongon

(Matyu 12.22-30 e Mak 3.20-27)

14Aling kene Yesus sapir angelo soulu ka due gute ka iye dong ke iye karanga wai kovok. E angelo soulu la kodong deka gute tonari wai e osep tidigrik ine. 15E osep leklou tiwai langane. “Iye sapir angelo soulu ke Belsebul ka plau angelo soulu ila arit.”#11.15 — Angaine Belsebul angaine silang ke Satan. 16E osep leklou tiwaiki titok iye e tiwai ke iye ma iye due elio arit ina ka nisngen ka omur heven ina.

17E Yesus ile wan ka aitno lisak mter ine deka iye wai ke isak langane. “Langka osep ke kantri kene timluk pulu deka elio ari due pogle ke kantri tonari. E langka osep ke osua kene timluk pulu isuk boto ma isak yagos. 18E langka Satan sapir angelo soulu isuk boto omur ka Satan plaue ma yagos. Kesua umawai ngasapir angelo soulu ke Belsebul ila arit. 19Langka ngasapir angelo soulu ke Belsebul ila arit deka osep ka tididi umu tidue sei ila arit e tisapir angelo soulu? E ke batne langane osep ka tididi umu ma tiwade umu. 20E langka ngadidi Ida Tapolngon ila arit e ngasapir angelo soulu deka elio are nisngen ke umu langane. Omur ka Ida Tapolngon plaue polou olwo boto ke umu kodong.”

21“Alo ka gute ka ila arit omba dong e ila ola e ila osua dong kap iye e iye plau ila ninu deka ila wan bitna bitna tidong itau. 22E langka gute silang ke ila arit mole gute tonari me e due evlei e mole iye deka ma iye pi gute ila ola e ila osua ka iye waiki lua iye e tapre isak la. Deka ma iye due gute tonari ila wan bitna bitna keniye e tongo isak ke osep leklou.”

23“Langka gute gesa boko kap ngong kovok iye waiki dangdang ngong e gute ka gom osep ma time ke ngong kovok due isak tidardar kla ke ngong.”

Angelo soulu songon gute deka iding ke iye

(Matyu 12.43-45)

24“Alo ka angelo soulu so-ngon gute gesa iye la ke omur ka aki dong ine kovok e krim omur ka iye karanga munu ine e langka iye padoe kovok aitno mter langane. ‘Ma ngaiding ke ninu ka ngasongone.’ 25Alo ka iye polou ke ninu tonari iye vati osep tigire eip e wan bitna bitna ine tidong itau. 26Deka iye la pado angelo soulu lumorwo leklou ka urok elio soulu mole ila elio soulu e tisep tidong ke gute are. E gute ila mosongon soulu lokono e mole ila mosongon ka dong oglou alo ka angelo soulu songon iye mgo.”

Yesus wai ke osep seisei ka aitno lisak neser

27Alo ka Yesus wai langane apmang ka dong ke osep pulu pula are daiku omba langane. “Apmang ka divir wom e painim sisu ke wom aitno itau itau.” 28E Yesus koli wai langane. “Wan ka itau itawai osep ka tiklingen e tini Ida Tapolngon ila pelengon aitno lisak itau itau.”

Osep tiwaiki Yesus due elio arit ina ka nisngen

(Matyu 12.38-42 e Mak 8.12)

29Osep ka tidong are tires tipolou pula pula e Yesus wai ke isak langane. “Osep ka tidong ke taklak oku ane isak osep soulu bitna. Tiwaiki tivati nisngen gesa e ma tivati nisngen ke gute napaprangan ina Jona vala. 30Eriar langka Jona polou nisngen ke osep Ninive ina io Gute Ka Polou Langka Osep iye nisngen ke osep ka tidong oku ane. 31E alo ka Ida Tapolngon wade osep deka apmang ka vri mgo ke omur ka dong saut ke umu ma vri e mulu osep ka tidong oku ane. Kesua oglou iye due langan alang ma iye klingen gute Solomon ila pelengon e ila ilengen ka omba. E oku ane gute ka mole Solomon dong kap umu. 32E silang alo ka Ida Tapolngon wade osep deka osep Ninive ina ma tivri e timulu osep ka tidong oku ane. Kesua alo ka Jona napapra ke isak tibauluk aitno lisak. E oku ane gute ka mole Jona dong kap umu.”

Amtada langka lam

(Matyu 5.15 e Matyu 6.22-23)

33“Osep tibik lam deka tidue dong ke ovuk ke ninu bisna koke tikadinge ke gimare kovok. Aurou. Tidue dong ke wan ka lam dong ine e bublo ma osep ka tisep ke ninu tikaranga tivati wan malak. 34E omtomu langka lam ka bublo ke pampamu lumu. Langka omtomu itau deka wan langka esluk bublo ke pampamu lumu ongwa ine keniye. E langka omtomu sasi deka pampamu lumu ongwa ine keniye langka aivoro. 35Deka umaplau umu itau lama esluk ka bublo ke pampamu lumu polou aivoro. 36Langka pampamu lumu ongwa ine keniye bublo e ongwa ine leklou aivoro kovok deka pampamu lumu ma bublo langka lam bublo ke umu.”

Osep Farisi ina e osep ka tile itau ke Moses ila sogongon tidue elio soulu

(Matyu 23.1-36 e Mak 12.38-40 e Luk 20.45-47)

37Alo ka Yesus wai yagos gute Farisi ina gesa me ke iye e pmi iye ma iye me ngen kap iye. Deka iye la sep ke ninu e dong ke bota. 38E gute Farisi ina digrik kesua Yesus grong limla mgo kovok deka ngen. 39E Ida Puda wai ke iye langane. “Umu osep Farisi ina umeris kap e dis dogur itau e aitno lumu bon ke elio ka umawaiki umodue mani pula e elio soulu. 40Umu osep ka kaka. Gute ka due wan dogur due wan aitno blang. 41E umakar wan ka dong ke aitno lumu ke osep ka urok wan isuk boto vala e ma wan bitna bitna tipolou eip ke umu.”

42“Aisudo umu osep Farisi ina. Kesua umawade wan bitna bitna ka tidue ngangon galou e marapngan bitna bitna ka tidong ke lumu yage ke emkil songotno ka eriar e umakar emkil kene ke Ida Tapolngon ma ila wan. Umodue wan daudeng langane e are itau e dau umengelek ke elio omba langka umodue elio osuk ke osep e elio ka umu lana umu ke Ida Tapolngon. Wan ka itau umodue elio omba e silang blang umodue elio daudeng tonari blang. 43Aisudo ke umu osep Farisi ina. Kesua umawaiki umodong ke bota itau alo ka umodong ke duningen ina ninu e umawaiki osep tiwai ‘oklou itau’ e tidue anit ke umu ke bilmu. 44Aisudo ke umu osep Farisi ina. Kesua umu langka denga ka osep tivati kovok e tilila ine e tile ine kovok e ke elio ane tipolou amum ke Ida Tapolngon bitna.”

45Deka gute gesa ka ile itau ke Moses ila sogongon wai ke Yesus langane. “Gute parerengen ina alo ka amwai langane amwai soulu ke imi blang.” 46E Yesus koli wai ke iye langane. “Aisudo ke umu ka umeile itau ke Moses ila sogongon blang. Kesua umu langka umegilgil wan ka anit ke osep dogursak ka engil ma tikalke e dau umawaiki umolua isak ine kovok. 47Aisudo ke umu. Kesua umouri ninu metengen ina ke osep napaprangan ina e dau lumu seia isak osep ka tidue burwa ke isak. 48E elio ane langka nisngen aitno lumu itau ke wan ka lumu seia tidue. Kesua tidue burwa ke osep napaprangan ina deka umouri urok ninu metengen ina. 49Oglou Ida Tapolngon ka ila ilengen ombatno wai langane. ‘Ma ngapagei osep napaprangan ina e osep aposel ina ke osep. Ma osep tidue burwa ke isak leklou e ma tidue agegeng ke isak leklou silang.’ 50Deka osep napaprangan ina ka osep tidue burwa ke isak nogrum ke alo ka Ida Tapolngon tapol taklak oku urok metengen batne munu pes umu osep ka umodong oku ane. 51Tidue burwa ke osep napaprangan ina nogrum ke Abel me iding ke Sekaraia ka tidue burwa ke iye airavu ke Ida Tapolngon ila ninu e bota ka tidue elio opmu ina ine. Ngawai lokono ke umu. Osep tonari urok metengen batne ma munu pes umu ka umodong oku ane.”

52“Aisudo ke umu ka umeile itau ke Moses ila sogongon. Kesua umadangdang osep ka tiwaiki tididi ekreng itau ma tidue ilengen itau ine. E umu tona umedidi ekreng tonari kovok e umadangdang osep ka tiwaiki tididie.”

53Alo ka Yesus songon ninu are osep Farisi ina e osep ka tile itau ke Moses ila sogongon aitno lisak amnga ke iye e tipmi iye ke pmingen pula ma iye wai ke wan bitna bitna. 54Tidue langane kesua tiwaiki tiyak iye ke urok pelengon ma iye wai pelengon soulu e tikaranga tisin elio vri ke iye batne ke ila pelengon.

Currently Selected:

Luk 11: ANT

Highlight

Copy