Luk 9

Yesus pagei ila disaipel songotno orwo ma tidue ila bokongon

(Matyu 10.5-15 e Mak 6.7-13)

1Yesus gi ila disaipel songotno orwo ma tiduni pulu e iye kar arit ke isak ma tikaranga tisapir angelo soulu e tidue osep ka tipaia tipolou itau blang. 2E iye pagei isak ke osep ma tinapapra pelengon ke omur ka Ida Tapolngon plaue e ma tidue osep ka tipaia tipolou itau blang. 3E iye wai ke isak langane. “Umodue wan ke lumu langan kovok. Umodue kerka koke bret koke mani koke matu koke siot orwo kovok. 4E alo ka umesep ke ninu deka umodong ine la lama umosongon armok. 5E langka umopolou ke armok gesa e osep tipli umu deka alo ka umosongon armok tonari umasak taklak ina group ke kopmu. E elio ane nisngen ke urok elio soulu.” 6Deka isak kla ke armok armok e tinapapra omon itau e tidue osep ka tipaia tipolou itau blang.

Herot waiki ile ke Yesus

(Matyu 14.1-2 e Mak 6.14-16)

7E alo ka Herot ka vri mgo ke omur emkil ari klingen wan ka Yesus due aitno mter pula ine e dau iye ile ine itau kovok. Kesua osep leklou tiwai Jon ka paunim osep poga tito ke ina denga. 8E osep leklou tiwai Elaija polou e osep leklou blang tiwai gute napaprangan ina silang ka oglou dong poga tito ke ina denga. 9E Herot wai langane. “Ngadue osep tiblou Jon otuk ine kopuk e oku ane gute ane ka ngaklingen ine iye sei?” E aling pula Herot waiki vati Yesus.

Yesus kar ngangon ke osep 5,000

(Matyu 14.13-21 e Mak 6.30-44 e Jon 6.1-13)

10Alo ka osep aposel tiding ke Yesus tipalongo ila ke wan keniye ka tidue. Deka iye due isak vala e tisongon osep leklou e isak kla ke armok kene ka angaine Betsaida. 11E alo ka osep pula pula tile ke omur ka isak kla ine tididi isak. E alo ka tipolou ke Yesus deka aitno itau ke isak. Deka iye wai ke isak ke omur ka Ida Tapolngon plaue e due osep ka tipaia tipolou itau blang.

12Kirui polou kodong deka ila disaipel songotno orwo tipolou ke iye e tiwai langane. “Ampagei osep pula pula are isak kla ke armok armok ka dong olwo boto ma tidue inarak ngangon e tipado omur ka timunu kudung ine. Kesua osep tidong ke omur ane kovok.” 13E Yesus koli wai ke isak langane. “Umakar ngangon ke isak ma tingen.” Deka tikoli tiwai langane. “Ipem ngangon pula kovok. Bret elme e lodu orwo vala. Koke amwaiki imala imekli ngangon karanga ke osep pula pula ane?” 14Kesua osep arang langka inarak sasa 5,000 tidong are. Deka iye wai ke ila disaipel langane. “Umawai ke isak ma tiduni pulu langka iselme iselme e tidong ke taklak.” 15Ila disaipel tidue langane e osep keniye tidong ke taklak. 16Deka Yesus due bret elme e lodu orwo e bitna tito ke omur heven e iye wai tenkyu ke Ida Tapolngon ine. Deka iye tuktuk isak e kar isak ke ila disaipel e tikar isak ke osep pula pula are. 17E osep keniye tingen e tigot. E ila disaipel titagom bret e lodu emkil emkil e tidue sep ke kerka songotno orwo e tipolou bon.

Pita wai Yesus iye Krais

(Matyu 16.13-19 e Mak 8.27-29)

18Aling kene Yesus kene vala wai itau ke Ida Tapolngon e ila disaipel tidong kap iye. Deka iye pmi isak langane. “Osep pula pula tiwai ngong sei?” 19E tikoli tiwai langane. “Osep leklou tisir wom Jon ka paunim osep e osep leklou tisir wom Elaija e osep leklou blang tisir wom gute napaprangan ina gesa ka dong ke oglou e iye poga tito ke ina denga.” 20Deka Yesus pmi isak langane. “E aitno lumu lange? Ngong sei?” E Pita koli wai langane. “Wom gute Krais ka Ida Tapolngon rere ma omlua osep ke urok elio epmes ina.”

Yesus wai ke ina metengen e ila baulukngon

(Matyu 16.21-28 e Mak 8.30—9.1)

21Deka Yesus wai dagar lo-kono ke isak ma tipalongo osep ke wan ane kovok. 22E iye wai langane. “Ida Tapolngon waiki Gute Ka Polou Langka Osep iye namani elio soulu pula ke osep namormor e osep loulou ina ka omba e osep ka tile itau ke Moses ila sogongon e ma tipli iye. E timter iye ma iye mete deka mase oklou eklu mela yagos ma iye poga tito ke ina denga. E wan are ma polou.”

23E Yesus wai ke ila disaipel keniye langane. “Langka gute gesa waiki didi ngong ma iye pli tarna e aling aling didi ngong. Iye due langane e langka osep tidue elio soulu ke iye e iye mete are wan gesa kovok. 24Kesua gute ka waiki ila mosongon dong ke taklak ane ma ila mosongon imina la. E gute ka ila mosongon imina ke taklak ane batne ke ngong ma iye pado ila mosongon. 25Langka gute due wan keniye ke taklak ane e dau iye imina la wan tonari karanga lua iye koke aurou? Aurou. 26Langka gute mnak iye ke ngong koke lou pelengon ma ngong ka Gute Ka Polou Langka Osep mnak ngong ke iye alo ka ngaiding ngame ke lou bublongon e ke Livou ila bublonon kap ila ensel ka itau lokono. 27Ngawai lokono ke umu langane. Umu leklou ma dau umodong alo ka omur ka Ida Tapolngon plaue polou.”

Yesus pampamu ine bublo

(Matyu 17.1-13 e Mak 9.2-13)

28Mase oklou epmes lumeklu mela yagos deka Yesus kap Pita e Jon e Jems titito ke gigri ma iye wai itau ke Ida Tapolngon. 29E alo ka Yesus wai itau bitna polou silang e ila klos polou okou lokono e bublo. 30Deka lokono Moses orwo Elaija tipolou e tiwai kap iye. 31Tipolou ke bublongon ka itau lokono e tiwai ke elio ma iye due ke Jerusalem e ke elio ka isuk boto ma iye songon taklak. 32Pita kap osep orwo silang amtarsak bunga e alo ka titipa tivati Yesus ila bublongon e osep orwo tivri kap iye. 33Deka alo ka Moses e Elaija isuk boto songon Yesus Pita wai langane. “Ipem Puda are itau imodong ane. Ma imouri pengau elku. Imouri kene ke wom e kene ke Moses e kene ke Elaija.” Pita wai langane e dau iye ile malak ke ila pelengon kovok. 34E alo ka iye dau wai gaup polou e kading isak e tilim alo ka tisep ke gaup. 35Deka kreine wai ke gaup langane. “Gute ane Erigu Arang ka ngarere. Umoklingen ke iye.” 36E alo ka kreine wai yagos tivati Yesus kene vala dong are. E alo ari ila disaipel eklu tiwai ke gute gesa ke wan ka tivati ari kovok.

Yesus sapir angelo soulu ke gute auram

(Matyu 17.14-21 e Mak 9.14-29)

37Deka ke oklou silang alo ka tiduru ke gigri osep pula pula tisoson Yesus. 38E lokono gute kene ke isak gi ke Yesus langane. “Gute parerengen ina ngawai ke wom dagar ma omo amvati erigu arang ka iye erigu kene vala. 39Kesua aling pula angelo soulu due e lokono iye ngangir omba e nakarkar e ene buswok. Angelo soulu tonari due asmel ke iye e waiki songon iye kovok. 40E ngapmi lem disaipel dagar ma tisapire e tikaranga tidue kovok.” 41Deka Yesus koli wai langane. “Umu osep ka umodong oku ane aitno lumu la dagar ke Ida Tapolngon kovok e lumu elio soulu. Ma ngadong kap umu tauni e nganamani lumu elio soulu koke aurou? Aurou. Ampaur etim arang ke ngong.” 42E alo ka tipaur iye ke Yesus angelo soulu uri iye ke taklak e iye nakarkar omba. E Yesus wai dagar ke angelo soulu ma iye songon mimi la deka Yesus due polou itau blang e kar iye iding ke timla. 43E osep ka pula keniye are tidigrik ke elio ka Yesus due. Kesua elio tonari nis isak ke Ida Tapolngon ila arit ka ombatno.

Yesus wai aling orwo ina ke ina metengen

(Matyu 17.22-23 e Mak 9.30-32)

Alo ka osep dau tidigrik ke wan ka iye due Yesus wai ke ila disaipel langane. 44“Umoklingen itau ke lou pelengon ane. Osep ma tikar ngong ka Gute Ka Polou Langka Osep ke osep leklou limsak.” 45E ila disaipel tile ila pelengon lana ine kovok kesua Ida Tapolngon bisi lana ine ke isak ma tikaranga tile lana ine kovok. E tilim ma tipmi iye ke ila pelengon lana ine.

Yesus ila disaipel tikot pelengon pulu

(Matyu 18.1-5 e Mak 9.33-37)

46Alo ari Yesus ila disaipel tikot pelengon pulu langka gute sei ke isak mole isak leklou. 47E alo ka Yesus ile wan ka aitno lisak mter ine deka iye due mimi me vri ke galna. 48E iye wai ke isak langane. “Gute sei ka lua mimi ane batne iye didi ngong lua ngong blang. E gute ka lua ngong lua gute ka pagei ngong ngame blang. Kesua gute ka angaine daudeng lokono ke umu ma mgo ke umu.”

Langka gute gesa upu oul kovok iye lumu aten

(Mak 9.38-40)

49Deka Jon wai ke iye lang-ane. “Ipem Puda imavati gute kene sir angain wom e sapir angelo soulu e imawaiki imadangdang iye kesua iye dong kap ite kovok.” 50Deka Yesus koli wai langane. “Umadangdang iye kovok kesua gute ka dangdang umu ke lumu bokongon kovok iye lua umu.”

51Taim ka Ida Tapolngon waiki due Yesus tito ke omur heven isuk boto polou deka aitno mter dagar ke elio ka iye la ke Jerusalem. 52E iye pagei osep leklou timgo ke iye. E tipolou ke armok kene ke osep Samaria ina ma tikere wan bitna bitna ke iye. 53E osep ka tidong ke armok tonari aitno lisak itau ke Yesus kovok kesua aitno mter dagar ma iye la ke Jerusalem. 54E alo ka ila disaipel orwo Jems e Jon tivati elio ane tipmi Yesus langane. “Ipem Puda amwaiki imepmi Ida Tapolngon ma iye uri eiou ke omur heven ma duru e ngen isak?” 55Tiwai langane deka Yesus bauluk e iluk isak. 56Deka isak kla ke armok silang.

Yesus wai ke elio ka osep tididi iye

(Matyu 8.19-22)

57Alo ka tilila ke ekreng gute kene wai ke Yesus langane. “Ma ngadidi wom ke omur omur ka amla ine.” 58E Yesus koli wai ke iye langane. “Pokis tidong ke urok ovuk e monuk tidong ke urok onuk e Gute Ka Polou Langka Osep ila omur dong ma iye munu ine ke taklak ane kovok.” 59E Yesus wai ke gute silang langane. “Emdidi ngong.” Deka gute tonari koli wai langane. “Puda omsongon ngong ma mgo ngala ngayas livou.” 60E Yesus wai ke iye langane. “Omsongon osep ka isak langka timete tiyas osep ka timete kodong e amla amnapapra omon ka la ke omur Ida Tapolngon plaue.” 61E gute silang wai ke iye langane. “Puda ma ngadidi wom e dau mgo omsongon ngong ma ngala ngavati lou osua.” 62Deka Yesus koli wai ke iye langane. “Gute ka due yage e kul taklak ke namngan e dau bitna la ke dogurne iye karanga due ila bokongon itau kovok. Eriar langane ke Ida Tapolngon ila bokongon. Gute ka waiki due Ida Tapolngon ila bokongon e dau aitno mter ke wan silang iye karanga due bokongon itau ke omur ka Ida Tapolngon plaue kovok.”

Currently Selected:

Luk 9: ANT

Highlight

Copy