Matyu 15

Ida Tapolngon ila pelengon mole osep urok seia urok pelengon

(Mak 7.1-13)

1Mase osep Farisi ina leklou e osep leklou ka tile itau ke Moses ila sogongon tisongon Jerusalem time ke Yesus e tiwai ke iye langane. 2“Ina lange lem disaipel tidar udo seia urok apu? Kesua alo ka tingen bret tigrong limsak ke elio ka didi udo seia urok apu mgo kovok.” 3E Yesus koli wai ke isak langane. “E ina lange umu umadar Ida Tapolngon ila pelengon dagar ma umedidi lumu apu? 4Kesua Ida Tapolngon ila pelengon palma wai langane.

‘Umodue anit ke sipmomu e titnomu.’

E ila pelengon palma silang wai langane.

‘Gute ka wai soulu ke timla koke tna ma umomluk iye ma iye mete.’

5E umawai langane. ‘Gute karanga wai ke timla koke tna langane. “Ngakar wan gesa ka karanga lua umu ke Ida Tapolngon kodong.”’ 6Langka iye wai langare iye ma due anit ke timla koke tna kovok. E ke pelengon langane umodue lumu apu mole Ida Tapolngon ila pelengon dagar. 7Umu osep ka aitno lumu orwo. Gute Aisaia napapra lokono ke umu langane.

8‘Osep ane tidue anit ke ngong ke orsak e aitno lisak dong mawa ke ngong. 9Tilotuim ngong adai e tiparere osep ke urok pele-ngon langka iye lou pele-ngon dagar.’”

Elio soulu ka dong ke osep aitno lisak due isak tidong soulu

(Mak 7.14-23)

10E mase Yesus gi ke osep pula pula ma time ke iye e wai ke isak langane. “Umoklingen e aitno lumu mter itau ma umeile itau. 11Wan ka gute ngene koke inime due polou soulu kovok. Aurou. Wan ka polou ke aitno due gute polou soulu.” 12Deka ila disaipel time tiwai ke iye langane. “Emile osep Farisi ina tiklingen lem pelengon e aitno lisak soulu ine?” 13E Yesus koli wai ke isak langane. “Wan keniye ka Livou ka dong ke omur heven usake kovok ma iye pie. 14Aitno lumu kro ke isak kovok kesua isak langka osep ka amtarsak evin ka tiwaiki tinis osep leklou ka amtarsak evin blang ke ekreng. Isak orwo ma tigene tiduru ke ovuk.” 15Deka Pita koli wai langane. “Emkere pelengon ano lana ine ke imi.” 16E Yesus wai langane. “Umu dau umeile ine kovok? 17Wan ka gute ngen koke inim sep ke pele e mase iye use koke durie la. Umeile ine koke aurou? 18E elio bitna bitna ka tidong ke gute aitno e tipolou isak wan ka due iye polou soulu. 19Kesua elio ka tipolou ke gute aitno langane. Iye serim e pagam osep e due okwa e isu kap apmang e panako wan e yakyak e wai soulu ke osep. 20Elio tonari wan ka due gute polou soulu e elio ka iye grong limla ke elio ka didi udo seia inarak apu kovok mgo alo ka iye ngen kovok due polou soulu kovok. Aurou.”

Apmang Kenan ina aitno la dagar ke Yesus

(Mak 7.24-30)

21E Yesus songon omur are e la ke omur ka armok orwo Tair e Saidon tidong ine. 22E apmang Kenan ina ka dong ke omur are me ke Yesus e wai langane. “Puda wom ka osep tisir wom Devit Otno Arang aitno lugom due ngong kesua angelo soulu dong ke etim apmang e due pogle ke iye.” 23E Yesus koli wai kovok. Mase ila disaipel time ine e tikel iye langane. “Ampagei apmang la kesua iye didi ite e daiku omba.” 24E iye koli wai langane. “Ida Tapolngon pagei ngong ke osep Israel ina ka isak langka sipsip ka timina vala.” 25E apmang me grum kamla ke Yesus bitna e wai langane. “Puda omlua ngong.” 26E iye koli wai langane. “Langka ngadue agau inarak bret e ngakare ke gemle are itau kovok.” 27E apmang wai langane. “Ee. Puda amwai lokono e dau gemle tingen ngangon emkil emkil ka gene duru ke urok gute ina bota.” 28Deka Yesus koli wai ke iye langane. “Apmang aitno lugom ila dagar omba e ma ngadue wan ka amwaiki ngadue.” E lokono otopmang polou itau blang.

Yesus lua osep pula ka tipaia

29E Yesus songon omur are e lila ke elim Galili ina dingen batne deka iye tito ke gigri e dong ine. 30E osep pula pula time ke iye e tipaur osep ka tikaranga tilila kovok e osep ka kamsak limsak timete e osep ka amtarsak evin e osep ka tikaranga tiwai kovok e osep pula leklou ka tipaia. E tidue isak tidong olwo boto ke Yesus kamla e iye due isak tipolou itau blang. 31E osep pula pula tonari tidigrik alo ka tivati osep ka tikaranga tiwai kovok tiwai blang e osep ka kamsak limsak timete tikaranga tidue wan ke kamsak limsak blang e osep ka tikaranga tilila kovok tikaranga tilila blang e osep ka amtarsak evin tikaranga tivati omur blang. Osep tivati elio ane e tikakai osep Israel ina Inarak Tapolngon angaine tito la egim.

Yesus kar ngangon ke osep 4,000

(Mak 8.1-10)

32E Yesus gi ke ila disaipel e wai ke isak langane. “Aitno lungong kro ke osep pula pula ane kesua tidong kap ngong oklou epmes eklu kodong e tingen ngangon gesa kovok. Ngawaiki ngapagei isak kla oku ane alo ka sapanga due isak kovok lama timete ke ekreng.” 33Deka ila disaipel tiwai langane. “Ma imodue bret karanga ke osep ane ke omur ge? Kesua omur ane omur adai vala e isak pula pula.” 34E Yesus wai ke isak langane. “Bret sesue dong ke umu?” E tikoli tiwai langane. “Bret lumorwo e lodu leklou ka daudeng dong.” 35Deka Yesus wai ke osep ma tidong ke taklak. 36E iye due bret lumorwo e lodu e wai tenkyu ke Ida Tapolngon ine deka tuktuke e kare ke ila disaipel e tikare ke osep pula pula. 37E tingen e tigot deka ila disaipel tidue bret e lodu emkil emkil sep ke kerka omba e kerka lumorwo bon. 38E osep arang ka tingen ngangon inarak sasa osep 4,000 e apmang e agau tidong blang e tidue sasa tonari tito. 39E Yesus pagei isak kla deka iye sep ke bot e la ke omur Magadan.

Currently Selected:

Matyu 15: ANT

Highlight

Copy