Matyu 24

Yesus wai ma osep tidue agegeng ke Ida Tapolngon ila ninu

(Mak 13.1-2 e Luk 21.5-6)

1Alo ka Yesus songon omur ka lelei Ida Tapolngon ila ninu ila disaipel tinis iye ke Ida Tapolngon ila ninu e ninu ninu ka tidong lelei ke Ida Tapolngon ila ninu. 2E Yesus wai ke isak langane. “Umavati ninu keniye ane i? Ngawai lokono ke umu mase osep ma tidardar ninu keniye ane e opmu kene ma dong napal munu ke opmu silang kovok.”

Yesus wai elio soulu pula ma tipolou

(Mak 13.3-13 e Luk 21.7-19)

3Mase alo ka Yesus dong ke gigri Oliv ila disaipel time ke iye e tiwai ke iye vala langane. “Ampalongo limem lesen ma wan ka amwai ine polou. E nisngen sua nis osep ke alo ka ma emiding omo e nis osep ke taklak ane ina yagosngon.” 4E Yesus koli wai ke isak langane. “Umaplau umu itau lama osep tiyak umu. 5Kesua osep pula ma tiwai langane. ‘Ngong gute Krais ka Ida Tapolngon rere ma ngalua osep.’ E tiyakyak osep pula ma tididi isak. 6E ma umoklingen ngusngon ke evlei olwo boto ke umu e umoklingen omon ke evlei mawa ke umu. E umaplau umu itau lama umedigrik ine kesua elio ane didi Ida Tapolngon aitno e taklak ina yagosngon ma polou dau kovok. 7Kantri kene ma due evlei ke kantri silang e gute ka vri mgo ke omur kene ila osep ola ina ma tidue evlei ke gute ka vri mgo ke omur silang ila osep ola ina. E sapanga omba e orgi pula ma tipolou ke omur omur. 8Elio ane langka apmang namani doro alo ka isuk boto mimi ngen iye.”

9“Alo ari osep ma tidue umu umevri ke kot bitna deka tiules umu e tidue burwa ke umu. E ma osep ka pula keniye aitno lisak soulu lokono ke umu batne ke ngong. 10E osep pula ma tisongon aitno lisak ila dagar e lai urok pulu e aitno lisak soulu lokono pulu. 11E osep napaprangan yakngan ina pula ma tipolou e tidue osep pula tididi elio soulu. 12E ma osep tidue elio soulu e elio epmes ina pula lokono e ke batne langane ma osep pula tisongon elio ka isak lana isak ke osep leklou. 13E gute gesa ka aitno dong dagar la lama wan yagos ma Ida Tapolngon lua iye. 14E osep ma tinapapra omon itau ka la ke omur ka Ida Tapolngon plaue ke omur ka pula keniye ke taklak ma osep tikaranga tiklingen ine deka taklak ina yagosngon ma polou.”

Elio soulu lokono ma polou

(Mak 13.14-23 e Luk 21.20-24)

15E Yesus wai blang langane. “Mase ma umavati wan ka soulu lokono ka gute napaprangan ina Daniel wai ine dong ke Ida Tapolngon ila ninu.” E gute ka ritim pelengon ane ma aitno mter itau ine. 16“Alo ari osep ka tidong ke omur Judia ma tiulou kla ke omur ka gigri gigri. 17E osep ka tidong ke ninu tona ma tiduru ke ninu ma tidue urok wan kovok. 18E gute ka boko ke ila yage ma iding ke ila ninu ma iye due ila molo kovok. 19Aisudo. Taim ari itau kovok ke apmang ka tisomogu e ke apmang ka tipainim keke. 20Umawai itau ma taim ari polou alo ka omur epen epen koke polou ke oklou sabat kovok. 21Kesua ke alo ari agegeng ombatno ma polou ka mole agegeng ka tipolou alo ka Ida Tapolngon tapol taklak la lama iding ke oku ane. E agegeng ma polou langane blang kovok. 22E langka Ida Tapolngon due alo ari ina taim yari duru kovok osep ka pula keniye ma timete ine. E Ida Tapolngon aitno mter ke osep ka iye rere isak ila osep e iye due alo ari ina taim yari duru. 23Deka langka gute wai ke umu langane. ‘Umoklingen. Gute Krais ka Ida Tapolngon rere ma iye lua osep dong ane.’ Koke iye wai ‘gute Krais dong are.’ Aitno lumu la dagar ke ila pelengon kovok. 24Kesua osep yakngan ina ma tipolou ka tisir isak Krais koke tisir isak osep napaprangan ina. E ma tidue elio arit ina ka omba ma osep tididi isak ke elio soulu. E tiwaiki titok osep ka Ida Tapolngon rere isak ila osep blang. 25Umoklingen. Ngawai ke umu oku ane ke wan ka ma polou. 26Deka langka osep tiwai ke umu langane. ‘Umoklingen. Gute Krais dong ke omur ka dong adai vala’ umala ari kovok. E langka tiwai ke umu iye dong ke ninu aitno io aitno lumu la dagar ine kovok. 27Kesua Gute Ka Polou Langka Osep ma iding me langane. Iye polou langka aragu egle ka polou ke omur ka oklou tito ine ke sirva e la ke omur ka oklou duru ine ke sirva. 28Ke omur ka ongwa koke osep ka timete pampamu lisak tidong ine monuk ka tingen metengen okurne ma tiduni pulu are.”

Mase Gute Ka Polou Langka Osep ma iding me

(Mak 13.24-27 e Luk 21.20-24)

29“Agegeng ke taim tonari yagos deka lokono oklou ma polou aivoro e taiko ma bublo kovok e gigimo leklou ma tiduru ke sirva e gigimo leklou tidardar kla ke omur omur. 30Deka nisngen ke Gute Ka Polou Langka Osep ma polou ke sirva e osep ka pula keniye ke taklak ma tikngis. Ma tivati Gute Ka Polou Langka Osep me ke gaup ke sirva. Iye me kap ila bublongon e ila arit ka ombatno. 31E kuliep ma wai omba e iye pagei ila ensel ke omur ka pula keniye ke taklak e tigom osep ka pula keniye ka iye rere isak ila osep.”

Yesus wai pelengon ano ke akai fik

(Mak 13.28-31 e Luk 21.29-33)

32“Aitno lumu mter itau ke akai fik e umodue ilengen itau ine. Alo ka fik tetna polou evir e omuk e elilo polou umeile isuk boto oklou lana polou. 33E langane blang ke elio ane. Alo ka umavati elio tonari polou ma umeile isuk boto Gute Ka Polou Langka Osep ma iding me. 34Ngawai lokono ke umu langane. Osep ka tidong oku ane ma timete kovok deka wan ka pula keniye tonari ma polou. 35Sirva e taklak ma tipolou yagos e dau lou pelengon ma polou yagos kovok.”

Ida Tapolngon vala ile lesen ma Yesus polou

(Mak 13.32-37 e Luk 17.26-30 e Luk 17.34-36)

36“E gute gesa ile ke oklou koke aua alo ka Gute Ka Polou Langka Osep ma iding me kovok. Aurou. Ensel ka tidong ke omur heven e Ida Tapolngon Otno Arang tile ine kovok blang. Ida Tapolngon vala ile ine. 37Elio ka osep tidue alo ka Gute Ka Polou Langka Osep ma iding me isak eriar langka elio ka osep tidue oglou alo ka Noa dong. 38Kesua mgo ke alo ka ongon ombatno me osep tingen e tinim e tigi e tikar titorok ke gingen la lama alo ka Noa sep ke sip omba. 39E osep tile ine kovok la lama ongon ombatno me paunim isak ka pula keniye e timete ine. E alo ka Gute Ka Polou Langka Osep ma polou eriar langka alo ari. 40Osep orwo ma tidong ke yage e ensel pi gute kene e gute kene ma dau dong. 41E apmang orwo ma tidong timtung wit otna e ensel pi apmang kene e apmang kene ma dau dong. 42Io umaplau umu itau kesua umeile oklou ka Upu Puda ma iding me kovok. 43E umeile itau ke wan langane. Langka ninu ina gute ile alo ka gute panakongon ina ma me ke epmes iye plau ninu itau e songon gute tonari sep ke ila ninu kovok. 44E umu blang ma umodong redi kesua Gute Ka Polou Langka Osep ma iding me alo ka aitno lumu mter ine kovok.”

Yesus wai pelengon ano ke wokboi nating

(Luk 12.42-46)

45E Yesus wai blang langane. “Wokboi nating sei iye ile itau e didi ina puda ila pelengon alo ka ina puda la ke langan? E ina puda ma due iye plau osep bokongon ina leklou ma iye kar isak inarak ngangon alo ka ina puda rere. 46E alo ka gute iding e vati ila wokboi nating didi ila pelengon ma gute bokongon ina tonari aitno itau itau. 47Ngawai lokono ke umu. Gute tonari ma due wokboi nating plau ila wan keniye. 48E langka wokboi nating iye soulu ma iye wai langane. ‘Ngau puda iding me dau kovok.’ 49Deka iye nogrum mluk wokboi nating leklou e ngen e inim aki dagar kap osep ka tinim pula ma amtarsak balilu. 50Deka wokboi nating tonari ina puda ma iding me ke oklou e aua ka gute tonari aitno mter ine kovok. 51E ma iye ules iye omba e due dong kap osep ka aitno lisak orwo. Ke omur ari osep tikngis omba e tisak orsak erine pulu kesua tarna lisak doro doro lokono.”

Currently Selected:

Matyu 24: ANT

Highlight

Copy